(តាកែវ)៖ នគរបាលស្រុកគីរីវង់ បានចុះអនុវត្តវិធានការឃាត់រថយន្តដឹកដីមួយចំនួន ដែលមិនបានគ្របតង់កៅស៊ូត្រឹមត្រូវ បណ្ដាលឱ្យដីធ្លាក់រាយប៉ាយតាមដងផ្លូវសាធារណៈ។ សកម្មភាពនេះ ត្រូវបានធ្វើឡើងក្នុងគោលបំណងអប់រំ និងធ្វើកិច្ចសន្យាជាមួយម្ចាស់រថយន្ត និងអ្នកបើកបរ ដើម្បីបញ្ឈប់សកម្មភាពដឹកជញ្ជូនដែលបង្កផលប៉ះពាល់ដល់បរិស្ថាន និងសុវត្ថិភាពសាធារណៈ។

លោក ជា សុផល អធិការនគរបាលស្រុកគីរីវង់ បានថ្លែងប្រាប់ភ្នាក់ងារព័ត៌មានថា ដោយមានការណែនាំជាប់ជាប្រចាំពីលោកស្នងការនគរបាលខេត្តតាកែវ លោកបានបញ្ជាឱ្យកម្លាំងនគរបាលចរាចរណ៍ចុះត្រួតពិនិត្យ និងឃាត់រថយន្តដឹកដីដែលមិនមានក្រណាត់តង់គ្របត្រឹមត្រូវ បណ្ដាលឱ្យជ្រុះដីរាយប៉ាយតាមផ្លូវ ដែលបង្កឱ្យមានការរិះគន់ពីបងប្អូនប្រជាពលរដ្ឋ។ រថយន្តទាំងនោះ ត្រូវបាននាំយកមកកាន់អធិការដ្ឋាននគរបាលស្រុកគីរីវង់ ដើម្បីធ្វើការអប់រំ និងធ្វើកិច្ចសន្យាបញ្ឈប់ការដឹកជញ្ជូនបែបនេះតទៅទៀត។

លោកអធិការស្រុកបានបន្តថា ក្រោយពីបានធ្វើការអប់រំណែនាំ និងធ្វើកិច្ចសន្យារួចហើយ ប្រសិនបើម្ចាស់រថយន្ត ឬអ្នកបើកបរនៅតែបន្តសកម្មភាពដឹកដីដោយគ្មានការគ្របត្រឹមត្រូវ សមត្ថកិច្ចនឹងចុះឃាត់ម្ដងទៀត ហើយនឹងចាត់វិធានការ តាមផ្លូវច្បាប់ដោយគ្មានការយោគយល់នោះឡើយ។ វិធានការនេះ គឺដើម្បីធានាសណ្ដាប់ធ្នាប់សាធារណៈ ការពារបរិស្ថាន និងលើកកម្ពស់សុវត្ថិភាពចរាចរណ៍ជូនប្រជាពលរដ្ឋក្នុងមូលដ្ឋាន៕