(តាកែវ)៖ នៅព្រឹកថ្ងៃពុធ ទី១៩ ខែសីហា ឆ្នាំ២០២៦ លោក សេង មហា សមាជិកគណៈកម្មាធិការកណ្តាលសហភាពសហព័ន្ធយុវជនកម្ពុជា (ស.ស.យ.ក) និងជាអនុប្រធាន ស.ស.យ.ក ខេត្តតាកែវ តំណាងដ៏ខ្ពង់ខ្ពស់របស់លោក សុខ ពុទ្ធិវុធ ប្រធាន ស.ស.យ.ក ខេត្តតាកែវ បានទទួលស្វាគមន៍គណៈប្រតិភូសាកលវិទ្យាល័យចេនឡា ដឹកនាំដោយលោកបណ្ឌិត អ៊ី លីម៉ា សាកលវិទ្យាធិការ។

ក្នុងឱកាសនោះ សាកលវិទ្យាល័យចេនឡា បាននាំយកអាហារូបករណ៍ថ្នាក់បរិញ្ញាបត្ររង និងថ្នាក់បរិញ្ញាបត្រ ចំនួន ០៦ កន្លែង សម្រាប់ឆ្នាំសិក្សា ២០២៦-២០២៧ មកផ្ដល់ជូន ស.ស.យ.ក ខេត្តតាកែវ ដើម្បីបន្តចែកជូនដល់បេក្ខជនដែលបានប្រឡងជាប់សញ្ញាបត្រទុតិយភូមិឆ្នាំ២០២៦ នៅក្នុងខេត្តតាកែវ។ អាហារូបករណ៍ទាំងនេះនឹងគ្របដណ្តប់ការសិក្សាមួយចប់កម្មវិធីសិក្សាទាំងស្រុង។

លោក សេង មហា បានថ្លែងអំណរគុណយ៉ាងជ្រាលជ្រៅចំពោះសាកលវិទ្យាល័យចេនឡា ចំពោះកាយវិការមនុស្សធម៌ដ៏មានតម្លៃនេះ។ លោកបានបញ្ជាក់ថា ការផ្ដល់អាហារូបករណ៍នេះ គឺជាការរួមចំណែកយ៉ាងសំខាន់ក្នុងការជួយទ្រទ្រង់ការសិក្សារបស់សិស្សានុសិស្សក្រីក្រ ដែលមានសមត្ថភាពតែខ្វះលទ្ធភាពបង់ថ្លៃសិក្សានៅមហាវិទ្យាល័យ។

ជាមួយគ្នានេះ ស.ស.យ.ក ខេត្តតាកែវ ក៏បានប្តេជ្ញាបន្តស្វះស្វែងរកអាហារូបករណ៍បន្ថែមទៀត ដើម្បីជួយសម្រួលដល់ទុក្ខលំបាក និងផ្តល់ឱកាសសិក្សាដល់ប្អូនៗនិស្សិតនៅក្នុងខេត្តតាកែវ ដែលបានប្រឡងជាប់បាក់ឌុបឆ្នាំនេះ ឱ្យទទួលបានការអប់រំខ្ពស់ និងក្លាយជាធនធានមនុស្សដ៏មានតម្លៃសម្រាប់សង្គមជាតិ៕