មន្ទីរសុខាភិបាលខេត្តមណ្ឌលគិរី៖ ការតែងតាំងអនុប្រធានមន្ទីរ និងប្រធានការិយាល័យរដ្ឋបាល ធ្វើស្របតាមនីតិវិធីនានា និងជាការលើកទឹកចិត្តមន្ត្រីមានសមត្ថភាព
19-08-2026 19:04
(មណ្ឌលគិរី)៖ មន្ទីរសុខាភិបាលខេត្តមណ្ឌលគិរី បានចេញមកបញ្ជាក់ថា ការតែងតាំងតំណែង អនុប្រធានមន្ទីរសុខាភិបាល និងប្រធានការិយាល័យរដ្ឋបាល និងបុគ្គលិក នៃមន្ទីរសុខាភិបាលខេត្តមណ្ឌលគិរី បានធ្វើឡើងស្របតាមនីតិវិធីនានា និងជាការលើកទឹកចិត្តមន្ត្រីមានសមត្ថភាព មិនមែនជាការតែងតាំងព្រោះបក្ខពួក ឬសែស្រឡាយនោះឡើយ។
ការបញ្ជាក់របស់មន្ទីរសុខាភិបាល បានធ្វើឡើងតាមរយៈលិខិតបំភ្លឺមួយនាថ្ងៃទី១៩ ខែសីហា ឆ្នាំ២០២៦នេះ។ លិខិតបំភ្លឺនេះ ធ្វើឡើងក្រោយពេលមានការផ្សព្វផ្សាយមួយចំនួន ដែលបានលើកឡើងថា ការតែងតាំងតំណែងខាងលើ ជាការតែងតាំងបក្ខពួក និងសែស្រឡាយ ហើយមិនយុត្តិធម៌សម្រាប់មន្ត្រីដទៃ។
ឆ្លើយតបនឹងការផ្សាយនេះ មន្ទីរសុខាភិបាលខេត្តមណ្ឌលគិរី បានបញ្ជាក់ថា ការតែងតាំង និងដំឡើងតួនាទីមន្ត្រី បានអនុវត្តទៅតាមច្បាប់សហលក្ខន្តិកៈមន្ត្រីរាជការស៊ីវិល និងលិខិតបទដ្ឋានគតិយុត្តជាធរមាន ដោយដំឡើងទៅតាមឋានានុក្រម។ ជាមួយគ្នានេះ រាល់ការតែងតាំងមន្ត្រីរាជការ នៃមន្ទីរសុខាភិបាលខេត្តទាំងអស់ គឺសុទ្ធតែបានឆ្លងកាត់កិច្ចប្រជុំថ្នាក់ដឹកនាំមន្ទីរ ដោយមានកំណត់ហេតុប្រជុំត្រឹមត្រូវ មានហត្ថលេខា និងការឯកភាពពីសមាជិកអង្គប្រជុំទាំងអស់ ប្រកបដោយតម្លាភាពក្នុងការសម្រេចចិត្ត មុននឹងឈានដល់ការដាក់សំណើជូនទៅគណៈអភិបាលខេត្ត ប្រជុំវាយតម្លៃ ពិនិត្យសម្រេចលើសំណើតែងតាំងមន្ត្រី។
ក្នុងលិខិតបំភ្លឺ បានលើកបង្ហាញពាក់ព័ន្ធការតែងតាំងលោក ទាវ សុធារ័ត្ន ជាប្រធានការិយាល័យរដ្ឋបាល និងបុគ្គលិក។ បើតាមលិខិតបំភ្លឺនេះ លោក ទាវ សុធារ័ត្ន បានជាប់ក្របខ័ណ្ឌជាមន្ត្រីសុខាភិបាលជាន់ខ្ពស់ក្នុងឆ្នាំ២០២១ នឹងបានបម្រើការងារជាមន្ត្រីនៅការិយាល័យរដ្ឋបាល និងបុគ្គលិកមន្ទីរសុខាភិបាល នៃរដ្ឋបាលខេត្តមណ្ឌលគីរី។
ដោយសង្កេតឃើញពីការយកចិត្តទុកដាក់ខិតខំប្រឹងប្រែងបំពេញការងាររបស់មន្ត្រីឈ្មោះ ទាវ សុធារត្ន័ និងដោយប្រអប់តួនាទីអនុប្រធានការិយាល័យរដ្ឋបាល និងបុគ្គលិកនៅទំនេរ ដើម្បីពង្រឹងការងារក្នុងការិយាល័យផងនោះ នៅឆ្នាំ២០២៤ មន្ទីរបានរៀបចំកិច្ចប្រជុំពិនិត្យវាយតម្លៃមន្ត្រី ដើម្បីស្នើសុំរដ្ឋបាលខេត្ត ចេញដីកាតែងតាំងទៅកាន់ប្រអប់ដែលនៅទំនេរនោះ។ ដោយពិនិត្យទៅលើលក្ខណៈសម្បត្តិ សមត្ថភាព ការងាររបស់លោក ទាវ សុធារ័ត្ន ថ្នាក់ដឹកនាំមន្ទីរបានឯកភាពគ្នា ស្នើសុំទៅរដ្ឋបាលខេត្ត ដើម្បីតែងតាំងជាអនុប្រធានការិយាល័យរដ្ឋបាល និងបុគ្គលិក នៃមន្ទីរសុខាភិបាលទៅតាមនីតិវិធី។
លុះនៅឆ្នាំ២០២៥ ដោយប្រអប់តួនាទីអនុប្រធានមន្ទីរនៅទំនេរ នឹងជាការលើកទឹកចិត្តដល់មន្ត្រី ថ្នាក់ដឹកនាំមន្ទីរបានបើកកិច្ចប្រជុំវាយតម្លៃមន្ត្រី ដើម្បីស្នើសុំទៅរដ្ឋបាលខេត្ត ចេញដីកាតែងតាំងបំពេញប្រអប់ ដែលនៅទំនេរ។ ដោយពិនិត្យទៅលើតួនាទី សមត្ថភាព អតីតភាពការងារ និងជាការលើកទឹកចិត្ត ថ្នាក់ដឹកនាំ មន្ទីរបានឯកភាពស្នើសុំតែងតាំងលោក ស៊ី គង់ ប្រធានការិយាល័យរដ្ឋបាល និងបុគ្គលិក ជាអនុប្រធានមន្ទីរសុខាភិបាលខេត្ត ហើយក៏បានស្ទើតែងតាំង លោក ទាវ សុធារ័ត្ន អនុប្រធានការិយាល័យរដ្ឋបាល និងបុគ្គលិក ជាប្រធានការិយាល័យរដ្ឋបាល និងបុគ្គលិក ជំនួសលោក ស៊ី គង់ ដែលទៅកាន់តួនាទីថ្មី៕
