(ភ្នំពេញ)៖ នារសៀលថ្ងៃពុធ ទី១៩ ខែសីហា ឆ្នាំ២០២៦ លោក ក្រាញ់ តូនី រដ្ឋលេខាធិការទីស្ដីការ
គណៈរដ្ឋមន្ដ្រី និងជាប្រធានរដ្ឋបាលស្ដីទី អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) បានដឹកនាំគណៈប្រតិភូ អ.វ.ត.ក. ចូលរួមក្នុងពិធីបុណ្យទក្ខិនានុប្បទានគម្រប់ខួប ៧ថ្ងៃ សពលោក ប៊ូ ម៉េង អតីតអ្នករស់រានមានជីវិតមួយរូបពីមន្ទីរសន្ដិសុខ ស-២១ (គុកទួលស្លែង)។

ពិធីនេះបានប្រព្រឹត្ដទៅនៅភូមិធម្មត្រ័យ ឃុំផ្សារដែក ស្រុកពញាឮ ខេត្តកណ្តាល។

ស្ថិតក្នុងកាលវេលាដ៏ក្រៀមក្រំនេះ លោក ក្រាញ់ តូនី និងគណប្រតិភូបានបង្ហាញនូវសមានចិត្តចូលរួមរំលែកទុក្ខចំពោះការបាត់បង់ដ៏ធំធេងនេះ។ លោកបានលើកឡើងថា មរណភាពរបស់លោក ប៊ូ ម៉េង គឺជាការបាត់បង់នូវសាក្សីប្រវត្តិសាស្ត្រដ៏សំខាន់មួយរូបចំពោះឧក្រិដ្ឋកម្មដ៏ធ្ងន់ធ្ងរដែលបានប្រព្រឹត្តឡើងក្នុងរបបដ៏ឃោរឃៅប្រល័យពូជសាសន៍ខ្មែរក្រហម ជាពិសេសចំពោះប្រវត្តិនិងសោកនាដកម្មដែលបានកើតឡើងនៅអតីតមន្ទីរសន្ដិសុខ ស-២១ (គុកទួលស្លែង) ក្នុងរបបខ្មែរក្រហម។

ជាមួយគ្នានេះ លោកប្រធានរដ្ឋបាលស្ដីទី អ.វ.ត.ក. បានរំលេចពីការរួមចំណែកយ៉ាងសំខាន់របស់លោក ប៊ូ ម៉េង ក្នុងនាមជាដើមបណ្ដឹងរដ្ឋប្បវេណីក្នុងសំណុំរឿង ០០១ និងសំណុំរឿ ០០២ នៅចំពោះមុខអង្គជំនុំជម្រះវិសាមញ្ញក្នុងតុលាការកម្ពុជា។ ការចូលរួមរបស់លោក ប៊ូ ម៉េង បានរួមចំណែកដល់ដំណើរការស្វែងរកយុត្តិធម៌ ការបង្ហាញការពិតអំពីឧក្រិដ្ឋកម្មដែលបានកើតឡើងក្នុងរបបខ្មែរក្រហម និងជួយបន្សល់ទុកនូវសក្ខីកម្មប្រវត្តិសាស្ត្រដ៏មានតម្លៃសម្រាប់មនុស្សជំនាន់ក្រោយ។

សូមបញ្ជាក់ថា លោក ប៊ូ ម៉េង ដែលជាអ្នករស់រានមានជីវិតម្នាក់ក្នុងចំណោមអ្នករស់រានមានជីវិត៧នាក់ចុងក្រោយពីមន្ទីរ ស-២១ ដោយសារជំនាញផ្នែកគំនូររបស់លោក។ អស់រយៈពេលជាច្រើន ទសវត្សរ៍កន្លងមក លោកបានរស់នៅជាមួយរបួសផ្លូវចិត្តដ៏ធ្ងន់ធ្ងរ និងបានរួមចំណែកយ៉ាងសំខាន់ក្នុងដំណើរការស្វែងរកការពិត និងយុត្តិធម៌ជូនជនរងគ្រោះ តាមរយៈការចូលរួមផ្ដល់សក្ខីកម្មនៅចំពោះមុខអង្គជំនុំជម្រះវិសាមញ្ញក្នុងតុលាការកម្ពុជា ក្នុងសំណុំរឿង ០០១ ប្រឆាំងនឹង កាំង ហ្គេចអ៊ាវ ហៅ ឌុច ដែលជាអតីតប្រធានមន្ទីរ ស-២១ និងសំណុំរឿង ០០២ ប្រឆាំងនឹងអតីតមេដឹកនាំជាន់ខ្ពស់នៃរបបកម្ពុជាប្រជាធិបតេយ្យ។

លោក ប៊ូ ម៉េង បានទទួលមរណភាពនៅថ្ងៃសុក្រ ទី១៤ ខែសីហា ឆ្នាំ២០២៦ វេលាម៉ោង ១១:០០ នាទីយប់ ក្នុងជន្មាយុ ៨៥ ឆ្នាំ ដោយជរាពាធ៕