(ពោធិ៍សាត់)៖ ក្នុងគោលបំណងលើកកម្ពស់សុវត្ថិភាពក្នុងការធ្វើដំណើរ និងកាត់បន្ថយគ្រោះថ្នាក់ចរាចរណ៍សម្រាប់កម្មករនិយោជិត រដ្ឋបាលខេត្តពោធិ៍សាត់ បានបើកកិច្ចប្រជុំដ៏សំខាន់មួយ ស្តីពី «ការអនុវត្តសាកល្បងគោលនយោបាយស្តីពីសុវត្ថិភាពចរាចរណ៍ផ្លូវគោកកម្រិតរោងចក្រ» នារសៀលថ្ងៃទី១៩ ខែសីហា ឆ្នាំ២០២៦ នៅសាលប្រជុំកោះសំពៅមាស សាលាខេត្ត។

កិច្ចប្រជុំនេះដឹកនាំដោយ លោក លឹម សុខតូ អភិបាលរងខេត្តពោធិ៍សាត់ និងជាអនុប្រធានអចិន្ត្រៃយ៍ តំណាងដ៏ខ្ពង់ខ្ពស់របស់ លោក ខូយ រីដា អភិបាលខេត្ត និងជាប្រធានអនុគណៈកម្មការសុវត្ថិភាពចរាចរណ៍ផ្លូវគោកខេត្ត ដោយមានការចូលរួមពីលោក ស៊ឹម សង្វាពិសិដ្ឋ ប្រធានមន្ទីរសាធារណការ និងដឹកជញ្ជូនខេត្ត មន្ទីរអង្គភាពពាក់ព័ន្ធ អភិបាលរងក្រុង-ស្រុកទាំង៧ ព្រមទាំងតំណាងម្ចាស់ជំនួយ និងអង្គការដៃគូអភិវឌ្ឍន៍នានា។

ក្នុងឱកាសនោះ លោក លឹម សុខតូ បានគូសបញ្ជាក់ថា ការបង្កើត និងអនុវត្តគោលនយោបាយសុវត្ថិភាពចរាចរណ៍នៅកម្រិតរោងចក្រ គឺមិនមែនគ្រាន់តែជាការអនុវត្តច្បាប់ប៉ុណ្ណោះទេ ប៉ុន្តែវាគឺជាសកម្មភាពមនុស្សធម៌ដ៏ចាំបាច់ ដើម្បីការពារអាយុជីវិតបងប្អូនកម្មករនិយោជិត។ ការធ្វើដំណើរដោយសុវត្ថិភាព នឹងធានាបាននូវភាពកក់ក្តៅដល់ក្រុមគ្រួសារ កាត់បន្ថយការបាត់បង់ផលិតភាពការងារ និងចូលរួមចំណែកយ៉ាងសកម្មក្នុងការអភិវឌ្ឍសេដ្ឋកិច្ចជាតិ។

ខេត្តពោធិ៍សាត់ បានសម្រេចជ្រើសរើសយកស្រុកចំនួន២ ជាគោលដៅអនុវត្តសាកល្បងនូវគោលនយោបាយនេះ រួមមាន ស្រុកបាកាន និងស្រុកក្រគរ។ យុទ្ធនាការនេះមានគោលដៅចម្បង គឺដើម្បីធានាសុវត្ថិភាពចរាចរណ៍ និងគាំពារកម្មករនិយោជិត ពេលធ្វើដំណើរទៅមកបំពេញការងារ, បង្កើនផលិតភាពការងារក្នុងរោងចក្រ និងរក្សាស្ថិរភាពប្រាក់ចំណូលជូនកម្មករ និងកាត់បន្ថយអត្រាគ្រោះថ្នាក់ចរាចរណ៍ ដែលជារបាំងនៃការកាត់បន្ថយភាពក្រីក្ររបស់ប្រជាពលរដ្ឋ។

ផ្អែកតាមទិន្នន័យពីអង្គការដៃគូ ការអនុវត្តគោលនយោបាយនេះ នៅតាមរោងចក្រនាពេលកន្លងមក បានបង្ហាញពីលទ្ធផលវិជ្ជមានយ៉ាងត្រចះត្រចង់ ដូចជាការកើនឡើងនៃអត្រាពាក់មួកសុវត្ថិភាព ការផ្លាស់ប្តូរមកប្រើប្រាស់មធ្យោបាយដឹកជញ្ជូនដែលមានកៅអីអង្គុយត្រឹមត្រូវ និងការធ្លាក់ចុះនៃចំនួនគ្រោះថ្នាក់ចរាចរណ៍ពាក់ព័ន្ធនឹងកម្មករនិយោជិត។

រដ្ឋបាលខេត្តពោធិ៍សាត់ រំពឹងថា តាមរយៈការអនុវត្តសាកល្បងនៅស្រុកបាកាន និងស្រុកក្រគរនេះ នឹងក្លាយជាគំរូដ៏ល្អ ដើម្បីពង្រីកវិសាលភាពនៃការអនុវត្តទៅកាន់រោងចក្រដទៃទៀតក្នុងខេត្ត ឆ្ពោះទៅរកការកាត់បន្ថយអត្រាស្លាប់ និងរបួសធ្ងន់ធ្ងរដោយសារគ្រោះថ្នាក់ចរាចរណ៍ឱ្យបាន៥០% ត្រឹមឆ្នាំ២០៣០ ស្របតាមផែនការជាតិទសវត្សរ៍សកម្មភាពសុវត្ថិភាពចរាចរណ៍ផ្លូវគោក៕