(ភ្នំពេញ)៖ លោក ឃួង ស្រេង សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានគណៈកម្មាធិការគណបក្សរាជធានីភ្នំពេញ បានណែនាំយ៉ាងម៉ឺងម៉ាត់ដល់គណៈបញ្ជាការឯកភាពខណ្ឌច្បារអំពៅ និងចៅសង្កាត់ទាំងអស់ ឱ្យបង្ក្រាបបទល្មើសឆបោកតាមប្រព័ន្ធបច្ចេកវិទ្យា (Online Scams) និងល្បែងស៊ីសងគ្រប់ប្រភេទឱ្យអស់ពីមូលដ្ឋាន ដើម្បីធានាសុវត្ថិភាព និងសណ្តាប់ធ្នាប់សាធារណៈ។

ការណែនាំនេះបានធ្វើឡើងក្នុងពិធីសំណេះសំណាលជាមួយសមាជិក សមាជិកា គណៈកម្មាធិការគណបក្សសង្កាត់ច្បារអំពៅទី១ ច្បារអំពៅទី២ និរោធ និងព្រែកប្រា ខណ្ឌច្បារអំពៅ កាលពីល្ងាចថ្ងៃទី១៩ ខែសីហា ឆ្នាំ២០២៦។

លោក ឃួង ស្រេង បានសង្កត់ធ្ងន់ថា ការចូលរួមពីប្រជាពលរដ្ឋគឺចាំបាច់បំផុតក្នុងការលុបបំបាត់បទល្មើសទាំងនេះ ហើយប្រទេសកម្ពុជាត្រូវការសេដ្ឋកិច្ចពណ៌ស មិនមែនសេដ្ឋកិច្ចពណ៌ខ្មៅ ឬប្រផេះឡើយ។

ជាមួយគ្នានេះ លោកក៏បានណែនាំដល់អាជ្ញាធរខណ្ឌ និងសង្កាត់ទាំងអស់ ឱ្យបន្តយកចិត្តទុកដាក់ផ្ដល់សេវាសាធារណៈជូនប្រជាពលរដ្ឋឱ្យបានល្អ លឿន មានតម្លាភាព តាមរយៈច្រកចេញចូលតែមួយ ដោយជៀសវាងការយកសេវាក្រៅច្បាប់។ លោកបានបញ្ជាក់ថា ចៅសង្កាត់ក្នុងនាមជាសមាជិកបក្ស គឺអ្នកបម្រើប្រជាពលរដ្ឋ។

លោក ឃួង ស្រេង ក៏បានរំលេចពីស្នាដៃដ៏ធំធេងរបស់គណបក្សប្រជាជនកម្ពុជា ក្នុងការនាំមកនូវសន្តិភាព ការអភិវឌ្ឍន៍ និងការសង្គ្រោះជាតិពីវិបត្តិផ្សេងៗ រួមទាំងជំងឺកូវីដ-១៩ ផងដែរ។ គណបក្សបានកំណត់ចក្ខុវិស័យច្បាស់លាស់ក្នុងការធ្វើឱ្យកម្ពុជាក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងចំណូលខ្ពស់នៅឆ្នាំ២០៥០។ ក្នុងនាមជាសមាជិកបក្សកាន់អំណាច ត្រូវរួមគ្នាការពារឧត្ដមប្រយោជន៍ប្រជាពលរដ្ឋ និងកាត់បន្ថយភាពអសកម្មនានា ដែលអាចប៉ះពាល់ដល់កិត្តិយស និងផលប្រយោជន៍បក្ស។

ក្នុងឱកាសនោះដែរ ចៅសង្កាត់ទាំង៤ រួមមាន សង្កាត់ច្បារអំពៅទី១ ច្បារអំពៅទី២, និរោធ និងសង្កាត់ព្រែកប្រា ព្រមទាំងមេភូមិ បានលើកឡើងពីសមិទ្ធផលការងារបស់គណបក្សក្នុងមូលដ្ឋានសម្រេចបាន ជាមួយការលើកឡើងពីផែនការសកម្មភាព ដែលបាននិងកំពុងអនុវត្ត ដូចជាការខិតខំកសាងសមាជិកបក្ស ពិសេសគឺការប្តេជ្ញាចិត្ត ក្នុងការកែប្រែសមាជិកម្នាក់ ក្លាយជាសន្លឹកឆ្នោត ១សន្លឹក ជូនគណបក្សប្រជាជនកម្ពុជា នៅពេលបោះឆ្នោត២០២៧-២០២៨ ខាងមុខនេះ។ បន្ថែមពីនេះ ចៅសង្កាត់ និងមេភូមិ ក៏បានស្នើសុំ ការកសាងហេដ្ឋារចនាសម្ព័ន្ធមួយចំនួន នៅក្នុងមូលដ្ឋានផងដែរ៕