(ភ្នំពេញ)៖ ក្រសួងទេសចរណ៍ និងគណៈកម្មាធិការជាតិគ្រប់គ្រង និងអភិវឌ្ឍសហគមន៍ទេសចរណ៍ និងអេកូទេសចរណ៍ នៅថ្ងៃទី២០ ខែសីហា ឆ្នាំ២០២៦ បានចេញសេចក្តីជូនដំណឹង ស្តីពីការដាក់ពាក្យស្នើសុំវិញ្ញាបនបត្រ និងស្លាកសញ្ញា «ស្តង់ដាសហគមន៍ទេសចរណ៍អាស៊ាន» លើកទី៥ ឆ្នាំ២០២៦-២០២៧ និង «ស្តង់ដាផ្ទះស្នាក់សហគមន៍ទេសចរណ៍អាស៊ាន» លើកទី៦ ឆ្នាំ២០២៦-២០២៨។

ក្រសួងទេសចរណ៍ បានឱ្យដឹងថា លេខាធិការដ្ឋានអាស៊ាន នឹងផ្តល់រង្វាន់ជ័យលាភីស្តង់ដាទាំងពីរ សម្រាប់ប្រទេសសមាជិកអាស៊ាន ដែលនឹងត្រូវប្រគល់ជូនក្នុងឱកាសវេទិកាទេសចរណ៍អាស៊ាន (ATF) លើកទី៤៤ នៅអំឡុងខែមករា ឆ្នាំ២០២៧ នៅប្រទេសសិង្ហបុរី។ ក្នុងន័យនេះ ក្រសួងទេសចរណ៍ បានណែនាំដល់ប្រធានសហគមន៍ទេសចរណ៍ និងអេកូទេសចរណ៍ ម្ចាស់ផ្ទះស្នាក់សហគមន៍ និងប្រធានមន្ទីរទេសចរណ៍រាជធានី-ខេត្ត ឱ្យអនុវត្តតាមនីតិវិធីនៃការដាក់ពាក្យស្នើសុំ ដោយចែកចេញជា៥ដំណាក់កាលដូចខាងក្រោម៖

*ដំណាក់កាលទី១៖ ចាប់ពីថ្ងៃទី១ ខែកញ្ញា ដល់ថ្ងៃទី១ ខែតុលា ឆ្នាំ២០២៦

បេក្ខភាពអាចដាក់ពាក្យស្នើសុំវិញ្ញាបនបត្រ និងស្លាកសញ្ញាស្តង់ដាទាំងពីរ ដោយផ្ទាល់នៅក្រសួងទេសចរណ៍ ឬតាមរយៈមន្ទីរទេសចរណ៍រាជធានី-ខេត្ត ក្នុងម៉ោងធ្វើការ។

សម្រាប់ព័ត៌មានបន្ថែម អាចទំនាក់ទំនងតាមទូរសព្ទ/Telegram លេខ ០៩៧ ៤០ ៨៧ ៩៨០។

*ដំណាក់កាលទី២៖ ចាប់ពីថ្ងៃទី២ ដល់ថ្ងៃទី១៥ ខែតុលា ឆ្នាំ២០២៦

គណៈកម្មការវាយតម្លៃ នឹងធ្វើការត្រួតពិនិត្យ និងចុះវាយតម្លៃផ្ទៀងផ្ទាត់ឯកសារពាក់ព័ន្ធ ព្រមទាំងស្ថានភាពជាក់ស្តែងរបស់បេក្ខភាពដែលបានដាក់ពាក្យស្នើសុំ។

*ដំណាក់កាលទី៣៖ ចាប់ពីថ្ងៃទី១៦ ដល់ថ្ងៃទី២០ ខែតុលា ឆ្នាំ២០២៦

គណៈកម្មការវាយតម្លៃ នឹងប្រមូលទិន្នន័យ និងរៀបចំរបាយការណ៍ចុងក្រោយស្តីពីលទ្ធផលជ័យលាភី។

*ដំណាក់កាលទី៤៖ ខែធ្នូ ឆ្នាំ២០២៦

គណៈកម្មការវាយតម្លៃ នឹងជូនដំណឹងអំពីលទ្ធផល និងជ័យលាភីដល់បេក្ខភាពដែលទទួលបានស្លាកសញ្ញាស្តង់ដាទាំងពីរ។

*ដំណាក់កាលទី៥៖ ខែមករា ឆ្នាំ២០២៧

បេក្ខភាពដែលទទួលបានជ័យលាភី នឹងឡើងទទួលពានរង្វាន់ក្នុងឱកាសវេទិកាទេសចរណ៍អាស៊ាន (ATF) លើកទី៤៤ នៅប្រទេសសិង្ហបុរី។

ក្រសួងទេសចរណ៍ បានអំពាវនាវដល់ប្រធានសហគមន៍ទេសចរណ៍ និងអេកូទេសចរណ៍ និងម្ចាស់ផ្ទះស្នាក់សហគមន៍ទាំងអស់ ចូលរួមដាក់ពាក្យស្នើសុំវិញ្ញាបនបត្រ និងស្លាកសញ្ញាស្តង់ដាខាងលើ ឱ្យបានតាមកាលកំណត់៕