(ពោធិ៍សាត់)៖ នារសៀលថ្ងៃទី២០ ខែសីហា ឆ្នាំ២០២៦ លោក លី សុគន្ធី ប្រធានការិយាល័យប្រជាពលរដ្ឋខេត្តពោធិ៍សាត់ បានដឹកនាំក្រុមការងារចុះផ្សព្វផ្សាយការប្រើប្រាស់កម្មវិធី «មតិយើង» ជូនដល់មន្ត្រីរាជការនៃរដ្ឋបាលស្រុកក្រគរ ក្នុងកិច្ចប្រជុំគណៈបញ្ជាការឯកភាពរដ្ឋបាលស្រុក ដែលប្រារព្ធធ្វើឡើងនៅសាលាស្រុកក្រគរ ក្រោមអធិបតីភាព លោក អ៊ន សុផល្លា អភិបាលនៃគណៈអភិបាលស្រុកក្រគរ។

លោក លី សុគន្ធី ប្រធានការិយាល័យប្រជាពលរដ្ឋខេត្ត បានជម្រាបជូនថា កម្មវិធីផ្សព្វផ្សាយនេះ រៀបចំឡើងដោយទទួលបានការអនុញ្ញាត និងការគាំទ្រយ៉ាងពេញទំហឹង ពីសំណាក់លោក ម៉ក់ រ៉ា ប្រធានក្រុមប្រឹក្សាខេត្ត និងលោក ខូយ រីដា អភិបាលនៃគណៈអភិបាលខេត្តពោធិ៍សាត់ ដើម្បីពង្រឹងទំនាក់ទំនងរវាងរដ្ឋបាលថ្នាក់ក្រោមជាតិ និងប្រជាពលរដ្ឋ។

លោកបានគូសបញ្ជាក់ថា ការិយាល័យប្រជាពលរដ្ឋ គឺជាស្ពានចម្លងដ៏សំខាន់ក្នុងការទទួល និងដោះស្រាយរាល់សំណូមពរ ក៏ដូចជាការត្អូញត្អែរផ្សេងៗពីប្រជាពលរដ្ឋ ពាក់ព័ន្ធនឹងការផ្តល់សេវាសាធារណៈ ឬអំពើមិនប្រក្រតីនានា ដើម្បីធានាតម្លាភាព និងគណនេយ្យភាព។

លោក លី សុគន្ធី បានស្នើសុំដល់លោកអភិបាលស្រុក គណៈអភិបាលស្រុក និងមន្ត្រីរាជការទាំងអស់ ជួយជំរុញ និងប្រើប្រាស់កម្មវិធីនេះឱ្យអស់លទ្ធភាព ដើម្បីលើកកម្ពស់ប្រសិទ្ធភាពការងារ និងការបម្រើសេវាជូនប្រជាពលរដ្ឋក្នុងមូលដ្ឋានស្រុកក្រគរឱ្យកាន់តែល្អប្រសើរ។

ក្នុងឱកាសនោះ លោក ប៉ែន ទុង អនុប្រធានការិយាល័យប្រជាពលរដ្ឋខេត្ត បានធ្វើការបកស្រាយលម្អិត អំពីកម្មវិធីនេះថា កម្មវិធី«មតិយើង» គឺជាឧបករណ៍ឌីជីថលដ៏មានប្រសិទ្ធភាព ដែលអនុញ្ញាតឱ្យប្រជាពលរដ្ឋបញ្ជូនមតិយោបល់ សំណូមពរ ឬរាយការណ៍បញ្ហាប្រឈមក្នុងមូលដ្ឋានបានយ៉ាងឆាប់រហ័ស ងាយស្រួល និងមានសុវត្ថិភាពខ្ពស់ ព្រមទាំងជួយឱ្យអាជ្ញាធរតាមដានការដោះស្រាយបញ្ហាបានទាន់ពេលវេលា។

ឆ្លើយតបនឹងកិច្ចប្រជុំនេះ លោក អ៊ន សុផល្លា អភិបាលស្រុកក្រគរ បានបង្ហាញនូវការគាំទ្រយ៉ាងពេញទំហឹង និងការប្តេជ្ញាចិត្តខ្ពស់ក្នុងការជំរុញឱ្យមន្ត្រីរាជការក្រោមឱវាទទាំងអស់ យកចិត្តទុកដាក់ប្រើប្រាស់ និងផ្សព្វផ្សាយបន្តនូវកម្មវិធី «មតិយើង» នេះ។

លោកបានចាត់ទុកថាវាជាកាតព្វកិច្ចដ៏មានសារៈសំខាន់ ក្នុងការស្តាប់សំឡេងរបស់ប្រជាពលរដ្ឋ ដើម្បីកែលម្អការផ្តល់សេវាសាធារណៈ និងដោះស្រាយបញ្ហាប្រឈមនានានៅមូលដ្ឋានឱ្យកាន់តែមានប្រសិទ្ធភាព និងស័ក្តិសិទ្ធិភាពខ្ពស់។

គួរជម្រាបជូនថា ពិធីផ្សព្វផ្សាយនេះទទួលបានការស្វាគមន៍ និងបរិយាកាសដ៏មានផ្លែផ្កា ដោយអង្គប្រជុំទាំងមូលបង្ហាញពីការត្រៀមខ្លួនរួចជាស្រេចក្នុងការអនុវត្តបច្ចេកវិទ្យាឌីជីថលនេះ ដើម្បីបុព្វហេតុអភិវឌ្ឍន៍ស្រុកក្រគរឱ្យកាន់តែរីកចម្រើនថែមទៀត៕