(បន្ទាយមានជ័យ)៖ លោក ប្រាក់ ប៉ូលី អភិបាលរងខេត្តបន្ទាយមានជ័យ នៅថ្ងៃទី២០ ខែសីហា ឆ្នាំ២០២៦ បានដឹកនាំកម្លាំងគណៈបញ្ជាការឯកភាពខេត្តបន្ទាយមានជ័យ បន្តប្រតិបត្តិការចុះត្រួតពិនិត្យរដ្ឋបាល ២ទីតាំងបន្ថែមទៀត ក្រែងលួចបង្កប់បទល្មើស Online Scams នៅសង្កាត់អូរជ្រៅ ក្រុងប៉ោងប៉ែត ដោយរកឃើញជនជាតិថៃ ១២៥នាក់ តែពុំមានការជាប់ពាក់ព័ន្ធបទល្មើសនោះទេ។

ប្រតិបត្តិការនេះក្រោមការដឹកនាំពីលោក អុំ រាត្រី អភិបាលខេត្តបន្ទាយមានជ័យ និងលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តបន្ទាយមានជ័យ។

យោងតាមរបាយការណ៍រដ្ឋបាលខេត្ត បានបញ្ជាក់ឱ្យដឹងនៅថ្ងៃទី២០ ខែសីហា ឆ្នាំ២០២៦ លោក ប្រាក់ ប៉ូលី បានដឹកនាំក្រុមការងារជំនាញអន្ដោប្រវេសន៍ នៃស្នងការដ្ឋាននគរបាលខេត្ត បានចុះត្រួតពិនិត្យចំនួន ២ទីតាំង រកឃើញជនបរទេសចំនួន ១២៥នាក់ ស្រី ៥៤នាក់ ១សញ្ជាតិ ជាជនជាតិថៃ។

+ទីតាំងទី១ (ម្ចាស់ អោម រតនា) អគារ ៧ជាន់ ៥២បន្ទប់ នៅភូមិអូរជ្រៅ សង្កាត់អូរជ្រៅ មានជនជាតិថៃស្នាក់នៅចំនួន ៧៣នាក់ ស្រី៣៩នាក់ មានឯកសារត្រឹមត្រូវ (ស្នាក់នៅមិនបានរាយការណ៍ចំនួន ៩នាក់ ផាកពិន័យតាមប្រកាសអន្ដរក្រសួង១៧៥០ ប្រ.ក) ទីតាំងពុំមានសម្ភារសង្ស័យ។

+ទីតាំងទី២ (ម្ចាស់ ប៊ុន ស្រីហៀក) អគារ ៦ជាន់ ៤០បន្ទប់ នៅភូមិសាមគ្គីមានជ័យ សង្កាត់អូរជ្រៅ រកឃើញជនជាតិថៃ ៥២នាក់ស្រី ១៦នាក់ ១សញ្ជាតិ ជាជនជាតិថៃ មានឯកសារត្រឹមត្រូវ បច្ចុប្បន្នបម្រើការងារនៅកាស៊ីណូ ហូលីដេ។ ទីតាំងពុំមានសម្ភារសង្ស័យនោះទេ៕