(ភ្នំពេញ)៖ លោក ថូ សំណាង ដែលជាមន្ត្រីបម្រើការងារនៅក្រសួងការបរទេស និងសហប្រតិបត្តិការអន្តរជាតិកម្ពុជា បានបាត់ខ្លួនពីផ្ទះមួយថ្ងៃមួយយប់មកហើយ ដោយមិនដឹងដំណឹងសោះ។ ដំណឹងបាត់ខ្លួននេះ ត្រូវបានលោក ខៀវ កាញារីទ្ធ បង្ហោះតាមបណ្តាញសង្គមនៅយប់ថ្ងៃទី២០ ខែសីហានេះ។

ក្រុមគ្រួសាររបស់លោកបានសម្តែងការព្រួយបារម្ភយ៉ាងខ្លាំង និងបានដាក់ពាក្យបណ្តឹងទៅនាយប៉ុស្តិ៍នគរបាលខណ្ឌជ្រោយចង្វាររួចហើយ កាលពីថ្ងៃទី១៩ ខែសីហា ឆ្នាំ២០២៦។

យោងតាមការបញ្ជាក់ពីសាច់ញាតិ លោក ថូ សំណាង បានបាត់ខ្លួនជាមួយរថយន្តរបស់ក្រសួងការបរទេស។

ក្រុមគ្រួសារបានអំពាវនាវយ៉ាងទទូចដល់អាជ្ញាធរមានសមត្ថកិច្ច ជាពិសេសនគរបាលខណ្ឌជ្រោយចង្វារ សូមមេត្តាជួយពន្លឿនការស្រាវជ្រាវ និងស្វែងរកលោក ថូ សំណាង ឲ្យបានឆាប់រហ័ស។

ទន្ទឹមនឹងនេះ ក្រុមគ្រួសារក៏សូមអំពាវនាវដល់សាធារណជនទាំងអស់ ជាពិសេសបងប្អូនមិត្តភក្តិនៅក្នុងបណ្តាញសង្គមហ្វេសប៊ុក ប្រសិនបើបានឃើញ ឬមានតម្រុយណាមួយទាក់ទងនឹងការបាត់ខ្លួនរបស់លោក ថូ សំណាង សូមមេត្តាជួយផ្តល់ព័ត៌មានមកកាន់ក្រុមគ្រួសារ ឬជូនដំណឹងទៅកាន់អាជ្ញាធរមានសមត្ថកិច្ចដែលនៅជិតបំផុត។