(កំពង់ធំ)៖ លោក សាយ គឹមឡម ប្រធានគណៈបញ្ជាការឯកភាពរដ្ឋបាលស្រុកស្ទោង បានដឹកនាំកងកម្លាំងចម្រុះ ចុះបិទទីតាំងក្រុមហ៊ុនប្រាសាទមាស ភីអេសអិល ឯ.ក ចំនួន២កន្លែង នៅក្នុងស្រុកស្ទោង ខេត្តកំពង់ធំ កាលពីថ្ងៃទី២០ ខែសីហា ឆ្នាំ២០២៦។

ការបិទនេះធ្វើឡើងដោយអនុវត្តតាម ស.ជ.ណ របស់រដ្ឋបាលខេត្តកំពង់ធំ លេខ ៤៣៥/២៦ ស.ជ.ណ ចុះថ្ងៃទី១៨ ខែសីហា ឆ្នាំ២០២៦ បន្ទាប់ពីក្រុមហ៊ុននេះបានធ្វើអាជីវកម្មដោយពុំមានលិខិតអនុញ្ញាតពីស្ថាប័នមានសមត្ថកិច្ច។ ទីតាំងទាំងពីរនោះ រួមមានមួយកន្លែងស្ថិតនៅភូមិឈើទាល ឃុំកំពង់ចិនត្បូង និងមួយកន្លែងទៀតស្ថិតនៅភូមិអង់ឃ្លាំ ឃុំប្រឡាយ ស្រុកស្ទោង។

ការបង្ក្រាប និងបិទទីតាំងអាជីវកម្មគ្មានច្បាប់អនុញ្ញាតនេះ គឺជាវិធានការចាំបាច់មួយក្នុងការអនុវត្តច្បាប់ និងពង្រឹងសន្តិសុខ សណ្ដាប់ធ្នាប់សាធារណៈនៅក្នុងមូលដ្ឋាន។ នេះក៏ជាសារមួយសម្រាប់បណ្ដាក្រុមហ៊ុន ឬអាជីវកម្មទាំងអស់ ដែលប្រតិបត្តិការដោយគ្មានលិខិតអនុញ្ញាតពីស្ថាប័នជំនាញ ត្រូវតែប្រឈមមុខនឹងការបិទ ឬផ្អាកសកម្មភាព។

លើសពីនេះ សកម្មភាពចុះបង្ក្រាបនេះបង្ហាញពីការយកចិត្តទុកដាក់ និងការការពារផលប្រយោជន៍ជូនប្រជាពលរដ្ឋ ដែលជាកាតព្វកិច្ចចម្បងរបស់អាជ្ញាធរគ្រប់លំដាប់ថ្នាក់ ក្នុងការចាត់វិធានការលើអាជីវកម្មខុសច្បាប់ ដើម្បីទប់ស្កាត់ការកេងប្រវ័ញ្ច ការបោកប្រាស់ ឬការធ្វើអាជីវកម្មដែលប៉ះពាល់ដល់ទ្រព្យសម្បត្តិ និងជីវភាពរស់នៅរបស់ពលរដ្ឋ។ ការឆ្លើយតបទាន់ពេលវេលា និងការដោះស្រាយបញ្ហាប្រឈមរបស់ពលរដ្ឋនេះ បានទទួលនូវការសាទរ និងគាំទ្រយ៉ាងពេញទំហឹងពីសាធារណៈជន។

ក្នុងឱកាសនោះ លោក សាយ គឹមឡម ក៏បានអំពាវនាវដល់ប្រជាពលរដ្ឋក្នុងមូលដ្ឋាន និងអាជ្ញាធរពាក់ព័ន្ធ ឱ្យមានការប្រុងប្រយ័ត្នខ្ពស់ចំពោះអង្គភាពកម្ចីដែលគ្មានអាជ្ញាប័ណ្ណត្រឹមត្រូវ ឬដែលមានអត្រាការប្រាក់ខ្ពស់ ហើយត្រូវចូលរួមសហការ និងរាយការណ៍ដល់អាជ្ញាធរពាក់ព័ន្ធ ដើម្បីទទួលបានការអន្តរាគមន៍ទាន់ពេលវេលា៕