(ភ្នំពេញ)៖ លោកបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) អមដោយសហការី បានជួបពិភាក្សាការងារជាមួយថ្នាក់ដឹកនាំធនាគារវឌ្ឍនៈ (Vattanac Bank) នាថ្ងៃទី២១ ខែសីហា ឆ្នាំ២០២៦ នៅស្នាក់ការកណ្តាលធនាគារ ARDB​ ដើម្បីផ្លាស់ប្តូរទស្សនៈ និងពិនិត្យលទ្ធភាពកាលានុវត្តភាពនៃកិច្ចសហប្រតិបត្តិការរវាងស្ថាប័នទាំងពីរ ក្នុងការគាំទ្រសហគ្រាសក្នុងវិស័យកសិកម្ម ការជំរុញហិរញ្ញប្បទានបៃតង និងការអភិវឌ្ឍវិស័យកសិកម្មប្រកបដោយចីរភាព។

កិច្ចពិភាក្សាបានផ្តោតសំខាន់លើការពង្រឹងលទ្ធភាពទទួលបានហិរញ្ញប្បទានសម្រាប់អាជីវកម្មក្នុងវិស័យកសិកម្ម ការគាំទ្រការអភិវឌ្ឍកសិកម្មប្រកបដោយចីរភាព និងការជំរុញហិរញ្ញប្បទានបៃតង។ លើសពីនេះ ស្ថាប័នទាំងពីរក៏បានស្វែងរកយន្តការសហប្រតិបត្តិការផ្នែកហិរញ្ញវត្ថុដែលអាចគាំទ្រដល់ការវិនិយោគរបស់វិស័យឯកជន និងបានផ្លាស់ប្តូរទស្សនៈលើកាលានុវត្តភាពនៃកិច្ចសហប្រតិបត្តិការក្រោមក្របខ័ណ្ឌកម្មវិធីហិរញ្ញប្បទានអាកាសធាតុនៅកម្ពុជា (Cambodia Climate Finance Facility-CCFF) ផងដែរ។

តាមរយៈកិច្ចសហប្រតិបត្តិការនេះ ធនាគារ ARDB និងធនាគារវឌ្ឍនៈ រំពឹងថានឹងអាចរួមចំណែកយ៉ាងសំខាន់ក្នុងការលើកកម្ពស់វិស័យកសិកម្មកម្ពុជា ឲ្យកាន់តែមានភាពរឹងមាំ ប្រកបដោយនិរន្តរភាព និងឆ្លើយតបទៅនឹងតម្រូវការទីផ្សារ ក៏ដូចជាការប្រែប្រួលអាកាសធាតុនាពេលបច្ចុប្បន្ន​៕