(ភ្នំពេញ)៖ លោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ មានប្រជាពលរដ្ឋខ្មែរ ដែលចាញ់បោកគេ ទៅធ្វើការនៅលើទូកនេសាទម៉ាឡេស៉ី ប្រមាណ ៤៧នាក់ នឹងត្រូវបញ្ជូនត្រឡប់មកមាតុភូមិវិញ។

លោកថ្លែងបែបនេះ ក្នុងពិធីអបអរសាទរទិវាជាតិអន្តរសាសនាប្រឆាំងការជួញដូរមនុស្ស ក្រោមប្រធានបទ «គ្រប់សាសនានៅកម្ពុជារួមគ្នាបង្ការ ទប់ស្កាត់អំពើជួញដូរមនុស្ស និងឧក្រិដ្ឋកម្មតាមប្រព័ន្ធបច្ចេកវិទ្យា» នាថ្ងៃទី២០ ខែសីហា ឆ្នាំ២០២៦។

ក្នុងឱកាសនោះ លោកអភិសន្តិបណ្ឌិត ស សុខា បានឲ្យដឹងថា ក្នុងចំណោមពលរដ្ឋខ្មែរចាញ់បោកគេ ធ្វើការនៅលើទូកនេសាទម៉ាឡេស៉ី ៤៧នាក់ មានអ្នកខ្លះនាំទាំងគ្រួសារទៅជាមួយផង ដែលមានកូនអាយុ ៧ ឬ ៨ឆ្នាំ។ ប្រការនេះ លោកដាស់តឿនថា ការទៅធ្វើការនៅក្រៅប្រទេសតាមមេខ្យល់ គ្រោះថ្នាក់ខ្លាំងណាស់ ហើយបើចំមេខ្យល់ល្អនោះ មិនមានបញ្ហាអ្វីទេ តែបើចំមេខ្យល់មិនល្អ ច្បាស់ជាខូចអនាគតទាំងគ្រួសារមិនខាន។

លោកអភិសន្តិបណ្ឌិត ស សុខា ក៏បានថ្លែងអំណរគុណដល់រដ្ឋាភិបាលម៉ាឡេស៉ី តាមរយៈស្ថានទូតម៉ាឡេស៉ីប្រចាំកម្ពុជា ដែលបានខិតខំជួយលើអ្វី ដែលហៅថា ការប្រយុទ្ធប្រឆាំងនឹងការងារជួញដូរមនុស្សបែបនេះ។

សូមជម្រាបថា នេះមិនមែនជាលើកទី១ នោះទេ ពោលគឺកន្លងមក តែងតែមានពលករខ្មែរ និងកុមារ ដែលទៅធ្វើការខុសច្បាប់នៅប្រទេសម៉ាឡេស៊ី ត្រូវបញ្ជូនត្រឡប់មកកម្ពុជាវិញជានិច្ច៕