(កំពង់ស្ពឺ)៖ លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ បានដាក់បទបញ្ជាយ៉ាងម៉ឺងម៉ាត់ដល់កម្លាំងជំនាញ និងកម្លាំងអាវុធហត្ថតាមបណ្តាក្រុង-ស្រុក ឱ្យបន្តបង្រ្កាបករណីក្មេងទំនើងដែលបង្កភាព អនាធិបតេយ្យក្នុងសង្គម។

ថ្មីៗនេះ ក្មេងទំនើងចំនួន ០៣នាក់ ត្រូវបានកម្លាំងជំនាញធ្វើការបង្រ្កាប និងឃាត់ខ្លួនបានភ្លាមៗ ក្រោយទទួលបានការប្តឹងពីប្រជាពលរដ្ឋតាមរយៈលេខ Hotline 1292 ករណីបង្ហោះម៉ូតូតាមទីសាធារណៈ បង្កឱ្យប៉ះពាល់ដល់សណ្តាប់ធ្នាប់សាធារណៈ និងសុវត្ថិភាពអ្នកដំណើរ។

ប្រតិបត្តិការនេះបានធ្វើឡើងកាលពីវេលាម៉ោង ២៣:១០នាទី ថ្ងៃទី១៦ ខែសីហា ឆ្នាំ២០២៦ នៅចំណុចដីឡូតិ៍ខាងលិចពន្ធនាគារ ស្ថិតក្នុងភូមិទួលគក សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ។ ក្រុមយុវជនទាំង ០៣នាក់ ដែលត្រូវបានឃាត់ខ្លួនមានឈ្មោះ យឹម វុទ្ធី ភេទប្រុស អាយុ១៩ឆ្នាំ មុខរបរកម្មករ, ឈ្មោះ សាត បញ្ញា ភេទប្រុស អាយុ១៩ឆ្នាំ មុខរបរនៅផ្ទះ និងឈ្មោះ សឿន ចាន់រ៉ា ភេទប្រុស អាយុ១៩ឆ្នាំ មុខរបរនៅផ្ទះ។

ជាមួយគ្នានេះ កម្លាំងជំនាញក៏បានចាប់យកវត្ថុតាងរួមមាន ម៉ូតូ ចំនួន០១គ្រឿង ម៉ាក HONDA BEAT ពណ៌ខៀវ ឆ្នាំ២០១៧ ផ្លាកលេខ ភ្នំពេញ GW-2892 និងទូរស័ព្ទចំនួន ០៣គ្រឿងផងដែរ។

បច្ចុប្បន្ន ក្រុមក្មេងទំនើងទាំង ០៣នាក់ ខាងលើត្រូវបានកម្លាំងជំនាញកងរាជអាវុធហត្ថខេត្តកំពង់ស្ពឺ យកមកអប់រំណែនាំ និងធ្វើកិច្ចសន្យាចំពោះមុខឪពុកម្តាយ និងអាណាព្យាបាល ដើម្បីបញ្ឈប់រាល់សកម្មភាពទំនើងទាំងនេះ ដែលនាំឱ្យប៉ះពាល់ដល់ប្រជាពលរដ្ឋ និងសណ្តាប់ធ្នាប់សាធារណៈ។

ចំណែកម៉ូតូត្រូវបានកម្លាំងជំនាញដកហូតយកទៅរក្សាទុករយៈពេល ០៣ខែ នៅទីបញ្ជាការកងរាជអាវុធហត្ថខេត្តកំពង់ស្ពឺ ដើម្បីជាការព្រមាន និងទប់ស្កាត់បទល្មើសស្រដៀងគ្នានេះកុំឱ្យកើតមានឡើងទៀត៕