(ភ្នំពេញ)៖ ដោយក្តីអាណិតអាសូរចំពោះកុមារ នឿន ពេជ្រសារៈ អាយុ១៤ឆ្នាំ ដែលរងគ្រោះដោយគ្រោះថ្នាក់ចរាចរណ៍ បណ្តាលឱ្យបោកក្បាល និងមានឈាមកកនៅក្នុងខួរក្បាល ត្រូវការការព្យាបាល និងវះកាត់ ខណៈក្រុមគ្រួសារមានជីវភាពខ្វះខាតនោះ នៅព្រឹកថ្ងៃទី២១ ខែសីហា ឆ្នាំ២០២៦នេះ លោក សួស កុសល ម្ចាស់ហាងលក់ម៉ូតូ បានចុះសួរសុខទុក្ខ និងនាំយកថវិកា ព្រមទាំងអំណោយមួយចំនួន ជួយសម្រាលការលំបាកដល់ក្រុមគ្រួសារកុមារ។

ក្នុងឱកាសនោះ លោក សួស កុសល បានឧបត្ថម្ភជូនគ្រួសារកុមារ នូវ ថវិកាចំនួន ៥០ម៉ឺនរៀល អង្ករ២បាវ មីចំនួន៥កេស ព្រមទាំងសម្ភារៈមួយចំនួនទៀត សម្រាប់ជួយសម្រាលបន្ទុកក្នុងអំឡុងពេលកុមារកំពុងសម្រាកព្យាបាល។

ការឧបត្ថម្ភនេះ គឺជាទឹកចិត្តមនុស្សធម៌ និងការចូលរួមចែករំលែកទុក្ខលំបាកជាមួយគ្រួសារកុមារ ដែលកំពុងប្រឈមនឹងការលំបាកផ្នែកជីវភាព និងបន្ទុកក្នុងការថែទាំកូន។

ក្រុមគ្រួសារកុមារ នឿន ពេជ្រសារៈ បានថ្លែងអំណរគុណយ៉ាងជ្រាលជ្រៅចំពោះលោក សួស កុសល ដែលបានចំណាយធនធានផ្ទាល់ខ្លួន និងចុះមកសួរសុខទុក្ខ ព្រមទាំងនាំយកជំនួយមកឧបត្ថម្ភនៅក្នុងគ្រាលំបាកនេះ។

ជាមួយគ្នានេះ ក្រុមគ្រួសារក៏នៅតែសង្ឃឹមថា នឹងមាន ថ្នាក់ដឹកនាំ សប្បុរសជន និងប្រជាពលរដ្ឋមានទឹកចិត្តមេត្តា បន្តជួយគាំទ្រដល់កុមារ ដើម្បីឱ្យកុមារទទួលបានការព្យាបាលពេញលេញ និងមានឱកាសឆាប់ជាសះស្បើយត្រឡប់ទៅជួបជុំក្រុមគ្រួសារវិញ៕