(ក្រចេះ)៖ កម្លាំងសមត្ថកិច្ចចម្រុះខេត្តក្រចេះ បានបើកប្រតិបត្តិការបង្ក្រាបបទល្មើសជលផលទ្រង់ទ្រាយធំមួយ នៅថ្ងៃទី២១ ខែសីហា ឆ្នាំ២០២៦ ក្នុងឃុំចំនួន២ នៃស្រុកព្រែកប្រសព្វ។ ក្នុងប្រតិបត្តិការនេះ សមត្ថកិច្ចបានរុះរើ ដុតបំផ្លាញចោលនូវសម្ភារៈ និងឧបករណ៍នេសាទខុសច្បាប់ជាច្រើនប្រភេទ ព្រមទាំងបានចាក់លែងកូនត្រីចម្រុះប្រមាណ ១០០ គីឡូក្រាម ចូលទៅក្នុងបឹងធម្មជាតិវិញ ដើម្បីថែរក្សានិរន្តរភាពធនធានជលផល។

ប្រតិបត្តិការនេះដឹកនាំដោយមន្ត្រីជំនាញខណ្ឌរដ្ឋបាលជលផលនៃមន្ទីរកសិកម្ម រុក្ខាប្រមាញ់ និងនេសាទខេត្តក្រចេះ សហការជាមួយគណៈបញ្ជាការឯកភាពស្រុកព្រែកប្រសព្វ កម្លាំងនគរបាលជំនាញការិយាល័យប្រឆាំងបទល្មើសសេដ្ឋកិច្ចខេត្ត រួមនឹងសហគមន៍នេសាទឃុំឫស្សីកែវ និងឃុំចំបក់។ គោលដៅនៃប្រតិបត្តិការគឺនៅចំណុចតំបន់ទំនាបលិចទឹកបឹងក្បាលខ្មោច និងបឹងវែង ស្ថិតក្នុងឃុំចំបក់ និងឃុំឫស្សីកែវ ស្រុកព្រែកប្រសព្វ។

លោក ម៉ុក ពន្លក នាយខណ្ឌរដ្ឋបាលជលផលខេត្តក្រចេះ បានបញ្ជាក់ថា កម្លាំងសមត្ថកិច្ចបានធ្វើការរុះរើ និងបំផ្លាញចោលនូវឧបករណ៍ល្មើសច្បាប់ រួមមាន៖ របាំងព្រួលស្បៃមុងចំនួន ១៥ខ្សែ ប្រវែងសរុប ១.៦៥០ម៉ែត្រ, លូស្បៃមុងចំនួន ១៧មាត់ និងបង្គោលចម្រឹងឫស្សីចំនួន ២៥៥ដើម។ ការចាក់លែងកូនត្រីចូលទៅក្នុងដែនទឹកធម្មជាតិវិញ គឺក្នុងគោលបំណងរួមចំណែកថែរក្សានិរន្តរភាពពូជត្រី និងធនធានជលផល។

លោក ម៉ុក ពន្លក ក៏បានអំពាវនាវដល់បងប្អូនប្រជានេសាទទាំងអស់ ឱ្យចូលរួមគោរពច្បាប់ស្តីពីជលផល និងចៀសវាងការប្រើប្រាស់ឧបករណ៍នេសាទខុសច្បាប់ ដើម្បីរួមចំណែកថែរក្សាធនធានធម្មជាតិ និងផលជលផលឱ្យបានគង់វង្សសម្រាប់កូនចៅជំនាន់ក្រោយ។ ការអនុវត្តច្បាប់នេះ គឺដើម្បីធានាបាននូវនិរន្តរភាពនៃធនធានជលផលសម្រាប់សហគមន៍ និងបរិស្ថានទាំងមូល៕