(ភ្នំពេញ)៖ ក្រុមការងារប្រតិកម្មរហ័សនៃមន្ទីរប្រឆាំងបទល្មើសគ្រឿងញៀន នៅថ្ងៃទី២២ ខែសីហា ឆ្នាំ២០២៦នេះ បានចេញសេចក្តីបំភ្លឺករណីការបង្ហោះចែកចាយនូវវីដេអូ យុវវ័យប្រុសស្រី ២នាក់ ជក់បារីអេឡិចត្រូនិកឡើងវង្វេងស្មារតី ដែលវីដេអូនោះទទួលបានការចាប់អារម្មណ៍យ៉ាងខ្លាំង ពីអ្នកប្រើប្រាស់បណ្តាញសង្គម។

បន្ទាប់ធ្វើការស្រាវជ្រាវរួចមក ក្រុមការងារប្រតិកម្មរហ័សនៃមន្ទីរប្រឆាំងបទល្មើសគ្រឿងញៀន សូមបញ្ជាក់ជូនថា វីដេអូដែលផ្សព្វផ្សាយនេះ មិនមែនជាករណីទើបតែកើតឡើងថ្មីៗនេះទេ គឺកើតឡើងក្នុងខែកុម្ភៈ ឆ្នាំ២០២៦មកម្ល៉េះ នៅក្នុងក្រុងប៉ោយប៉ែត ខេត្តបន្ទាយមានជ័យ។

យោងតាមសេចក្តីបំភ្លឺព័ត៌មានរបស់អធិការរដ្ឋានក្រុងប៉ោយប៉ែត ចុះថ្ងៃទី១៣ ខែកុម្ភៈ ឆ្នាំ២០២៦ បានបញ្ជាក់ថា ក្នុងការបង្ក្រាបករណីខាងលើនេះ សមត្ថកិច្ចឃាត់ខ្លួនបានមនុស្ស៨នាក់ (ស្រី២នាក់) ក្នុងនោះមានទាំងប្រុសស្រី ដែលមានក្នុងវីដេអូនេះផងដែរ ហើយពួកគេទាំង៨នាក់ ត្រូវបានសមត្ថកិច្ចចាត់ការតាមនីតិវិធី។

ជាមួយគ្នានេះ មន្ទីរប្រឆាំងបទល្មើសគ្រឿងញៀន សំណូមពរដល់សារធារណជន និងបងប្អូនអ្នកសារព័ត៌មាន មុននឹងធ្វើការចែករំលែក និងផ្សព្វផ្សាយព័ត៌មានអ្វីមួយ ពិសេសព័ត៌មានពាក់ព័ន្ធគ្រឿងញៀន សូមមេត្តាពិនិត្យពិច័យ និងផ្ទៀងផ្ទាត់ឱ្យបានច្បាស់លាស់ជាមុនសិន ជៀសវាងការចែករំលែក ឬផ្សព្វផ្សាយព័ត៌មាននោះប៉ះពាល់ដល់សន្តិសុខសណ្តាប់ធ្នាប់សង្គម។

ដើម្បីអាចទទួលបានព័ត៌មានច្បាស់លាសមុននឹងផ្សព្វផ្សាយព័ត៌មានត្រូវសហការជាមួយមន្ទីរប្រឆាំងគ្រឿងញៀន តាមរយៈលេខទូរស័ព្ទចំនួន ៥ខ្សែ៖ 670 ប្រព័ន្ធ Cellcard អាចហៅទូរស័ព្ទចូលដោយឥតគិតថ្លៃ, 093 456 888 (Smart), 011 248 888 (Cellcard), 015 222 226 (Smart), 066 661 661 (Metfone)៕