(ភ្នំពេញ)៖ លោក ហួត ហាក់ រដ្ឋមន្ត្រីក្រសួងទេសចរណ៍ និងលោក Dominic Williams ឯកអគ្គរាជទូតវិសាមញ្ញ និងពេញសមត្ថភាពនៃចក្រភពអង់គ្លេស និងសហការីពីស្ថានទូតចក្រភពអង់គ្លេសប្រចាំកម្ពុជា នៅថ្ងៃទី២១ ខែសីហា ឆ្នាំ២០២៦ បានអញ្ជើញធ្វើទស្សនកិច្ចស្វែងយល់អំពីការផ្តល់សេវាបដិសណ្ឋារកិច្ច និងសេវាកម្មនានា ជូនភ្ញៀវទេសចរ និងអ្នកដំណើរជាតិ និងអន្តរជាតិ ព្រមទាំងជួបសំណេះសំណាលជាមួយមន្ត្រីមានសមត្ថកិច្ចប្រចាំការ និងតំណាងវិស័យឯកជន នៅអាកាសយានដ្ឋានអន្តរជាតិតេជោ (KTI)។

ក្នុងឱកាសនោះ លោករដ្ឋមន្ត្រី និងលោកឯកអគ្គរាជទូត បានចុះពិនិត្យ និងស្វែងយល់អំពីដំណើរការទទួលភ្ញៀវ ការបំពេញបែបបទអន្តោប្រវេសន៍ ការប្រើប្រាស់ច្រកទ្វារឆ្លាតវៃ (Smart Gate) និងសេវាកម្មទំនើបៗដែលមានផ្តល់ជូននៅអាកាសយានដ្ឋានអន្តរជាតិតេជោ។

លោក ហួត ហាក់ និងលោក Dominic Williams បានកោតសរសើរ និងវាយតម្លៃខ្ពស់ចំពោះការរៀបចំអាកាសយានដ្ឋានដែលមានលក្ខណៈទំនើប ស្របតាមស្តង់ដារអន្តរជាតិ ព្រមទាំងការត្រៀមខ្លួនរួចជាស្រេចរបស់ភាគីពាក់ព័ន្ធ ក្នុងការទទួលស្វាគមន៍ភ្ញៀវទេសចរមកពីជុំវិញពិភពលោក។

ក្នុងដំណើរទស្សនកិច្ចនេះ ក្រុមការងារក៏បានថតរូបភាព និងវីដេអូ ដើម្បីផ្សព្វផ្សាយពីអាកាសយានដ្ឋានអន្តរជាតិតេជោ ជាពិសេសបង្ហាញពីសមិទ្ធផលថ្មីរបស់កម្ពុជា និងសក្តានុពលនៃវិស័យទេសចរណ៍ និងអាកាសចរណ៍របស់កម្ពុជា ទៅកាន់សាធារណជនជាតិ និងអន្តរជាតិ។

ថ្លែងក្នុងឱកាសនេះ លោក ហួត ហាក់ បានគូសបញ្ជាក់ថា អាកាសយានដ្ឋានអន្តរជាតិតេជោ គឺជាហេដ្ឋារចនាសម្ព័ន្ធដ៏សំខាន់របស់កម្ពុជា ដែលនឹងរួមចំណែកពង្រឹងការតភ្ជាប់ការធ្វើដំណើរតាមផ្លូវអាកាសជាមួយពិភពលោក ជំរុញការផ្សព្វផ្សាយសក្តានុពលទេសចរណ៍ដ៏សម្បូរបែបរបស់កម្ពុជា និងលើកកម្ពស់ភាពប្រកួតប្រជែងរបស់វិស័យទេសចរណ៍។

លោករដ្ឋមន្ត្រីបានបន្ថែមថា អាកាសយានដ្ឋានអន្តរជាតិតេជោ ក៏ជាច្រកទ្វារដ៏សំខាន់ក្នុងការផ្សព្វផ្សាយរូបភាពកម្ពុជា ជាគោលដៅទេសចរណ៍ដែលមានសុវត្ថិភាព ភាពទាក់ទាញ និងបដិសណ្ឋារកិច្ចដ៏កក់ក្តៅ ទៅកាន់ភ្ញៀវទេសចរមកពីជុំវិញពិភពលោក។

គួរបញ្ជាក់ថា អាកាសយានដ្ឋានអន្តរជាតិតេជោ (KTI) គឺជាអាកាសយានដ្ឋានអន្តរជាតិថ្មីកម្រិត 4F របស់កម្ពុជា ដែលត្រូវបានសាងសង់ឡើងក្នុងគោលបំណងបង្កើនសមត្ថភាពទទួលអ្នកដំណើរ ពង្រីកការតភ្ជាប់ផ្លូវអាកាសរវាងកម្ពុជា និងពិភពលោក ជាពិសេសរួមចំណែកគាំទ្រដល់ការអភិវឌ្ឍវិស័យទេសចរណ៍ និងកំណើនសេដ្ឋកិច្ចជាតិ។

អាកាសយានដ្ឋានអន្តរជាតិតេជោ ត្រូវបានសម្ពោធដាក់ឱ្យប្រើប្រាស់ជាផ្លូវការនាថ្ងៃទី២០ ខែតុលា ឆ្នាំ២០២៥ ក្រោមអធិបតីភាពដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត៕