(ព្រះសីហនុ)៖ កម្លាំងជំនាញនៃផែនការងារប្រឆាំងគ្រឿងញៀន នៃស្នងការដ្ឋាននគរបាលខេត្តព្រះសីហនុ បានចុះបង្ក្រាបករណីជួញដូរដោយខុសច្បាប់នូវសារធាតុញៀន ដោយឃាត់ខ្លួនជនសង្ស័យជនជាតិចិនចំនួន ២នាក់។

ប្រតិបត្តិការនេះធ្វើឡើងកាលពីថ្ងៃទី១៦ ខែសីហា ឆ្នាំ២០២៦ ដោយអនុវត្តតាមអនុសាសន៍របស់នាយឧត្តមសេនីយ៍ ស ថេត អគ្គស្នងការនគរបាលជាតិ និងក្រោមការដឹកនាំចង្អុលបង្ហាញរបស់ លោកឧត្តមសេនីយ៍ឯក ស រដ្ឋា អគ្គស្នងការរង និងជាស្នងការនគរបាលខេត្តព្រះសីហនុ ស្ថិតក្នុងភូមិសាស្ត្រភូមិ៣ សង្កាត់លេខ៤ ក្រុងព្រះសីហនុ។

យោងតាមរបាយការណ៍របស់សមត្ថកិច្ចបានបញ្ជាក់ថា នាវេលាម៉ោង ២២:៣០នាទី ថ្ងៃទី១៦ ខែសីហា ក្រោមការសម្របសម្រួលនីតិវិធីពីព្រះរាជអាជ្ញារង នៃអយ្យការអមសាលាដំបូងខេត្តព្រះសីហនុ ដឹកនាំកម្លាំងជំនាញដោយលោកវរសេនីយ៍ឯក កាន់ វណ្ណា ស្នងការរង បានបន្តឆែកឆេរបន្ទប់ស្នាក់នៅរបស់ជនសង្ស័យ នៅសណ្ឋាគារមួយកន្លែង ក្នុងភូមិ៣ សង្កាត់លេខ៤ រហូតឃាត់ខ្លួនបក្ខពួកជនសង្ស័យជនជាតិខ្មែរម្នាក់ទៀត។

ជនសង្ស័យទាំង ៣នាក់រួមមាន៖

*ទី១. SU YANCHENG ភេទប្រុស អាយុ ៣៣ឆ្នាំ ជនជាតិចិន
*ទី២. QING FANG CHENG ភេទប្រុស អាយុ ២៣ឆ្នាំ ជនជាតិចិន
*ទី៣. ពៅ សុខបញ្ញា ភេទស្រី អាយុ ២៤ឆ្នាំ ជនជាតិខ្មែរ។

ក្នុងនោះវត្ថុតាងដកហូតសំខាន់ៗរួមមាន៖ ក្រាមពណ៌សសង្ស័យជាសារធាតុញៀន ៩កញ្ចប់ ថ្នាំគ្រាប់ WY ចំនួន ២គ្រាប់ ក្បាលបារីអេឡិចត្រូនិច ១១៤ក្បាល បារីអេឡិចត្រូនិច ៥ដើម ជញ្ជីងថ្លឹងគ្រឿងញៀន ទូរស័ព្ទដៃ ថង់សម្រាប់វេចខ្ចប់គ្រឿងញៀន និងសម្ភារៈពាក់ព័ន្ធមួយចំនួនទៀត ។

បច្ចុប្បន្ន ជនសង្ស័យទាំង ៣នាក់ ត្រូវបានឃាត់ខ្លួននៅស្នងការដ្ឋាននគរបាលខេត្តព្រះសីហនុ ដើម្បីសាកសួរ និងបន្តនីតិវិធី៕