(ភ្នំពេញ)៖ សាកលវិទ្យាល័យ វ៉ាន់ ហៀន (Van Hien University) នៃសាធារណរដ្ឋសង្គមនិយមវៀតណាម តាមរយៈសមាគមនិស្សិតកម្ពុជាប្រចាំទីក្រុងហូជីមិញ បានប្រកាសផ្ដល់អាហារូបករណ៍ពេញថ្លៃចំនួន ១០០កន្លែង សម្រាប់និស្សិតកម្ពុជា ក្នុងឆ្នាំសិក្សា ២០២៦-២០២៧ សិក្សារយៈពេល ៥ឆ្នាំពេញ បូកទាំងថ្នាក់ភាសា ក្នុងគោលបំណងពង្រឹងកិច្ចសហប្រតិបត្តិការអប់រំ និងអភិវឌ្ឍធនធានមនុស្សសម្រាប់កម្ពុជា។

អាហារូបករណ៍នេះគ្របដណ្ដប់លើថ្លៃសិក្សា ១០០% សម្រាប់វគ្គសិក្សាទាំងមូល រួមទាំងថ្លៃសិក្សា និងប្រឡងយកវិញ្ញាបនបត្រភាសាវៀតណាម ក៏ដូចជាថ្លៃសិក្សា និងប្រឡងយកវិញ្ញាបនបត្របញ្ចប់ការសិក្សា។ ក្រៅពីនេះ និស្សិតក៏នឹងទទួលបានការគាំទ្រថ្លៃស្នាក់នៅអតិបរមា ៤ ឆ្នាំ (២.០០០.០០០ ដុង/ខែ) ថ្លៃធានារ៉ាប់រងសុខភាព ១០០% កាតាប និងឯកសណ្ឋានកីឡា ព្រមទាំងសេវារដ្ឋបាល និងគាំទ្រនិស្សិតពីសាកលវិទ្យាល័យផងដែរ។

បេក្ខជនត្រូវជាពលរដ្ឋកម្ពុជា មានសញ្ញាបត្រមធ្យមសិក្សាទុតិយភូមិ (បាក់ឌុប) ឬសមមូល និងមានវិញ្ញាបនបត្រសមត្ថភាពភាសាវៀតណាម កម្រិត B2 ឬអាចចូលរួមវគ្គសិក្សា និងប្រឡងយកវិញ្ញាបនបត្រភាសាវៀតណាមដែលរៀបចំដោយសាកលវិទ្យាល័យ។ សាកលវិទ្យាល័យ វ៉ាន់ ហៀន មានជំនាញបណ្ដុះបណ្ដាលថ្នាក់បរិញ្ញាបត្រចំនួន ៤៣ ជំនាញសម្រាប់និស្សិតអន្តរជាតិ ប៉ុន្តែបានណែនាំឱ្យនិស្សិតកម្ពុជាផ្តោតលើជំនាញសំខាន់ៗមួយចំនួនដូចជា វិស្វកម្មបរិស្ថាន វិស្វកម្មសំណង់ស៊ីវិល បច្ចេកវិទ្យាអាហារ បច្ចេកវិទ្យាជីវសាស្ត្រ និងថែទាំវេជ្ជសាស្ត្រ (គិលានុបដ្ឋាក)។

និស្សិតដែលទទួលបានអាហារូបករណ៍នេះ នឹងមានឱកាសចុះអនុវត្តការងារ និងកម្មសិក្សានៅតាមអង្គភាពចំណុះក្រុមហ៊ុន HungHau Holdings និងមានអាទិភាពក្នុងការជ្រើសរើសឱ្យចូលបម្រើការងារបន្ទាប់ពីបញ្ចប់ការសិក្សា។ កាលបរិច្ឆេទទទួលពាក្យគឺចាប់ពីថ្ងៃចេញប្រកាសនេះ រហូតដល់ថ្ងៃទី ៣០ ខែតុលា ឆ្នាំ ២០២៦។ សម្រាប់លេខទូរសព្ទទំនាក់ទំនងស្នើសុំអាហារូបករណ៍៖ លោកស្រី ចាន់ រក្សា 096 862 2115 និង លោក ពៅ ចាន់រ៉ា 097 494 5423 088 836 8628 Telegram Group https://t.me/+9rA_58iHbKJlNzY1 ៕