(​កំពង់ធំ)៖ រដ្ឋបាលស្រុកតាំងគោក បានរៀបចំពិធីប្រកាសបិទផ្សាយទិន្នន័យជាសាធារណៈនូវឯកសារនៃការវិនិច្ឆ័យការចុះបញ្ជីដីធ្លីមានលក្ខណៈជាប្រព័ន្ធស្មើនឹង ៧,២៤៦ក្បាលដី សរុបចំនួនគ្របដណ្តប់លើ ៦ភូមិ រួមមាន ភូមិស្រះបន្ទាយ, ភូមិសៀមរាង, ភូមិត្រពាំងខ្លង, ភូមិប្រាំងសំរោង, និងភូមិអូររំចេក ក្នុងឃុំច្រនាង ស្រុកតាំងគោក ខេត្តកំពង់ធំ។

ពិធីប្រកាសបិទផ្សាយទិន្នន័យជាសាធារណៈនេះ បានធ្វើឡើងនាព្រឹកថ្ងៃទី២៤ ខែសីហា ឆ្នាំ២០២៦នេះ នៅទីតាំងប្រារព្ធពិធីស្ថិតនៅវត្ត សសាំងធម្មរាសី (ហៅវត្តស្រឹង) ភូមិត្រពាំងច្រនាង ឃុំច្រនាង ស្រុកតាំងគោក ខេត្តកំពង់ធំ ក្រោមអធិបតីភាពលោក ហាក់ ម៉ុងហួត អភិបាលស្រុកតាំងគោក។

​នៅក្នុងឱកាសនោះដែរ លោក ហាក់ ម៉ុងហួត បានលើកឡើងអំពីការខិតខំប្រឹងប្រែងយ៉ាងសកម្មរបស់រាជរដ្ឋាភិបាលកម្ពុជា ក្រោមការដឹកនាំដ៏ខ្ពង់ខ្ពស់របស់សម្តេចធិបតី ហ៊ុន ម៉ាណែត នាយករដ្ឋមន្ត្រី រួមជាមួយលោកឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ដែលតែងតែយកចិត្តទុកដាក់ខ្ពស់លើការងារចុះបញ្ជីដីធ្លីជូនប្រជាពលរដ្ឋ ដើម្បីធានាថាប្រជាពលរដ្ឋទាំងអស់ទទួលបានប័ណ្ណកម្មសិទ្ធិ (ប្លង់រឹង) ស្របច្បាប់ និងក្លាយជាម្ចាស់កម្មសិទ្ធិលើដីធ្លីពេញសិទ្ធិគ្រប់ៗគ្នា។

​ជាមួយគ្នានេះលោកអភិបាលស្រុក ក៏បានថ្លែងអំណរគុណ និងកោតសរសើរយ៉ាងជ្រាលជ្រៅចំពោះក្រុមការងារជំនាញចុះបញ្ជីដីធ្លីមានលក្ខណៈជាប្រព័ន្ធ ព្រមទាំងអាជ្ញាធរដែនដី (អាជ្ញាធរភូមិ-ឃុំ) ដែលបានខិតខំប្រឹងប្រែង និងសម្របសម្រួលបង្កលក្ខណៈងាយស្រួលជូនបងប្អូនប្រជាពលរដ្ឋនាពេលកន្លងមក។

​ជាចុងក្រោយលោកអភិបាលស្រុក ក៏បានធ្វើការផ្តាំផ្ញើដល់ប្រជាពលរដ្ឋដែលបានមកចូលរួម ឱ្យជួយផ្សព្វផ្សាយព័ត៌មាននេះបន្តទៅដល់បងប្អូន និងអ្នកជិតខាងដែលមិនបានមកចូលរួមឱ្យបានជ្រាបជាព័ត៌មានអំពីការបិទផ្សាយនេះ ដែលមានរយៈពេល ១៥ថ្ងៃ ប៉ុណ្ណោះ។ លោកបានសង្កត់ធ្ងន់ឱ្យប្រជាពលរដ្ឋរួសរាន់មកពិនិត្យ និងផ្ទៀងផ្ទាត់ទិន្នន័យលើឯកសារក្បាលដីរបស់ខ្លួនឱ្យបានត្រឹមត្រូវ និងច្បាស់លាស់ ដើម្បីជៀសវាងមានបញ្ហា ឬកំហុសឆ្គងផ្សេងៗនៅថ្ងៃខាងមុខ៕