(ពោធិ៍សាត់)៖ នាល្ងាចថ្ងៃទី២៤ ខែសីហា ឆ្នាំ២០២៦នេះ អង្គភាពព័ត៌មាន Fresh News បានទទួលបានសេចក្តីប្រកាសព័ត៌មានផ្លូវការពី រដ្ឋបាលខេត្តពោធិ៍សាត់ ពាក់ព័ន្ធនឹងករណីបុគ្គលម្នាក់បានបង្ហោះសារជេរប្រមាថ និងមើលងាយប្រជាពលរដ្ឋទូទាំងខេត្តពោធិ៍សាត់។

យោងតាមសេចក្តីប្រកាសព័ត៌មាន បានបញ្ជាក់ជូនសាធារណជន និងបងប្អូនប្រជាពលរដ្ឋជ្រាបថា៖

១. នៅថ្ងៃទី២៤ ខែសីហា ឆ្នាំ២០២៦ សមត្ថកិច្ចនគរបាលខេត្តពោធិ៍សាត់ បានចាត់វិធានការយ៉ាងតឹងរឹងភ្លាមៗទៅលើបុគ្គលបង្កហេតុឈ្មោះ ភី យ៉ាងរី ភេទស្រី អាយុ ២៥ឆ្នាំ កាន់អត្តសញ្ញាណបណ្ណសញ្ជាតិខ្មែរលេខ ១៩០៩៥៧៧៦២ មានទីលំនៅបច្ចុប្បន្នភូមិប្រជាធម្មកើត សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។

២. នៅចំពោះមុខសមត្ថកិច្ចនគរបាល ស្ត្រីរូបនេះបានសារភាព និងទទួលស្គាល់ជាសាធារណៈ ថាខ្លួនពិតជាបានបង្ហោះសារនៅលើបណ្តាញសង្គមក្នុងចេតនាជេរប្រមាថ និងប៉ះពាល់ដល់កិត្តិយសសេចក្តីថ្លៃថ្នូររបស់បងប្អូនប្រជាពលរដ្ឋ ក្នុងខេត្តពោធិ៍សាត់ពិតប្រាកដមែន។

៣. បច្ចុប្បន្ន កម្លាំងសមត្ថកិច្ចនគរបាលខេត្ត កំពុងបន្តនីតិវិធីយ៉ាងយកចិត្តទុកដាក់បំផុត ដើម្បីកសាងសំណុំរឿងបញ្ជូនទៅកាន់ស្ថាប័នតុលាការចាត់ការតាមផ្លូវច្បាប់។

៤. រដ្ឋបាលខេត្តពោធិ៍សាត់ បានបញ្ជាក់ពីគោលជំហរយ៉ាងដាច់ខាតក្នុងការបន្តការពារកិត្តិយស សេចក្តីថ្លៃថ្នូរ ក៏ដូចជាលើកកម្ពស់កិត្យានុភាពរបស់បងប្អូនប្រជាពលរដ្ឋ មន្ត្រីរាជការ និងកងកម្លាំងប្រដាប់អាវុធទាំងអស់ក្នុងខេត្ត ឱ្យបានគត់មត់ ស្របតាមច្បាប់ និងបទប្បញ្ញត្តិជាធរមាននៃព្រះរាជាណាចក្រកម្ពុជា៕