(កំពង់ស្ពឺ)៖ ស្នងការដ្ឋាននគរបាលខេត្តកំពង់ស្ពឺ បានចេញសេចក្តីបំភ្លឺជាសាធារណៈជុំវិញព័ត៌មានមួយចំនួនដែលបានបង្ហោះចែកចាយលើបណ្តាញសង្គមហ្វេសប៊ុក ដោយចោទប្រកាន់ទៅលើលោកអនុសេនីយ៍ឯក យន់ ចំណាប់ ឋានៈជានាយរងប៉ុស្តិ៍នគរបាលរដ្ឋបាលព្រះនិពាន្វ។

ព័ត៌មានទាំងនោះបានលើកឡើងថា លោក យន់ ចំណាប់ បានចូលបម្រើការងារជានគរបាល ដោយសូកប៉ាន់ចំនួន ១៥,០០០ ដុល្លារអាមេរិក។

ក្រោយទទួលបានព័ត៌មាននេះ ស្នងការដ្ឋាននគរបាលខេត្តកំពង់ស្ពឺ បានចាត់ក្រុមការងារប្រតិកម្មរហ័ស សហការជាមួយការិយាល័យបុគ្គលិក និងអធិការដ្ឋាននគរបាលស្រុកគងពិសី អញ្ជើញសាមីខ្លួនលោកអនុសេនីយ៍ឯក យន់ ចំណាប់ មកធ្វើការសាកសួរ និងបំភ្លឺពាក់ព័ន្ធករណីចោទប្រកាន់ខាងលើ។

នៅថ្ងៃច័ន្ទ ទី២៤ ខែសីហា ឆ្នាំ២០២៦ សាមីខ្លួនបានបង្ហាញឯកសារផ្ទាល់ខ្លួនដែលមានសុពលភាព រួមមានអត្តសញ្ញាណបណ្ណសញ្ជាតិខ្មែរ (ថ្ងៃខែឆ្នាំកំណើត ១៣.០៤.១៩៩០) សញ្ញាបត្រថ្នាក់បរិញ្ញាបត្រគ្រប់គ្រងពាណិជ្ជកម្ម ឯកទេសគ្រប់គ្រង ឆ្នាំ២០១៦ និងប្រកាសស្តីពីការតាំងស៊ប់ក្នុងក្របខ័ណ្ឌមន្ត្រីនគរបាលជាតិ។

ជាមួយគ្នានេះ លោកក៏បានបង្ហាញវិញ្ញាបនបត្រសិក្សា ចុះថ្ងៃទី១៣ ខែមីនា ឆ្នាំ២០២០ ដែលបញ្ជាក់ថា លោកបានចូលរួមប្រឡងប្រជែងជ្រើសរើសក្របខ័ណ្ឌមន្ត្រីនគរបាលជាតិ ឆ្នាំ២០១៩ ដោយពុំមានការសូកប៉ាន់ផ្តល់ប្រាក់ទៅបុគ្គលណាម្នាក់ឡើយ។

ជាក់ស្តែង លោកអនុសេនីយ៍ឯក យន់ ចំណាប់ បានដាក់បណ្តឹងប្តឹងបុគ្គលអនាមិកដែលបានយករូប និងបរិហារកេរ្តិ៍មកលើរូបលោក នៅការិយាល័យប្រឆាំងបទល្មើសបច្ចេកវិទ្យា ដើម្បីបន្តនីតិវិធី។

ស្នងការដ្ឋាននគរបាលខេត្តកំពង់ស្ពឺ ក៏បានបន្តស្រាវជ្រាវ និងស្វែងរកជនអនាមិកដែលបានយករូបលោកអនុសេនីយ៍ឯក យន់ ចំណាប់ ទៅបង្ហោះចែកចាយលើបណ្តាញសង្គម ដែលធ្វើឲ្យប៉ះពាល់ដល់កិត្តិយស សេចក្តីថ្លៃថ្នូររបស់សាមីខ្លួន និងអង្គភាពស្ថាប័ននគរបាលជាតិ ដើម្បីចាត់ការតាមផ្លូវច្បាប់។

ការបំភ្លឺនេះធ្វើឡើងក្នុងគោលបំណងបញ្ជាក់ការពិត និងរក្សាបាននូវភាពស្អាតស្អំរបស់មន្ត្រីនគរបាលជាតិ។