(ព្រះសីហនុ)៖ សាលាដំបូងខេត្តព្រះសីហនុ បានចេញដីកាបង្គាប់ឲ្យឃុំខ្លួនជនសង្ស័យចំនួន៤នាក់ (ស្រីម្នាក់) ពាក់ព័ន្ធបទល្មើសដឹកជញ្ជូន និងប្រើប្រាស់ដោយខុសច្បាប់នូវសារធាតុញៀន ដែលក្រុមទាំងនេះជាមុខសញ្ញា យ៉ាងសកម្មចែកចាយ និងលក់យ៉ាងអនាធិបតេយ្យនៅម្តុំរ៉ារថភ្លើងក្រុងព្រះសីហនុ។

ប្រតិបត្តិការចាប់ក្រុមចែកចាយ និងលក់គ្រឿងញៀនដោយចំហរ ហើយត្រូវបានគេចែកចាយតាមបណ្តាញសង្គមនោះ ត្រូវបានធ្វើឡើងដោយកម្លាំងអាវុធហត្ថខេត្តព្រះសីហនុ។

ប្រតិបត្តិការបង្ក្រាបនេះ ធ្វើឡើងក្រោមការដឹកនាំចង្អុលបង្ហាញពីនាយឧត្ដមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងលោក ម៉ាង ស៊ីណេត អភិបាល ខេត្ដព្រះសីហនុ រួមជាមួយការដឹកនាំបញ្ជាផ្ទាល់ពីលោកឧត្តមសេនីយ៍ត្រី ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ និងមានការសម្របសម្រួលពីតំណាងអយ្យការ។

ការបង្ក្រាបនេះបានធ្វើឡើងនៅក្រុមទី១ ភូមិ៣ សង្កាត់លេខ១ ក្រុង-ខេត្តព្រះសីហនុ ដោយដកហូតបានវត្ថុតាងគ្រឿងញៀនប្រហែលជាង ១គីឡូក្រាម។

ជនសង្ស័យទាំង ៤នាក់ ដែលត្រូវបានឃុំខ្លួនរួមមាន៖ ទី១/ ឈ្មោះ សែម សុភ័ក្រ្ត ភេទប្រុស អាយុ៤១ឆ្នាំ (ជាមេខ្លោងធំ) ទី២/ ឈ្មោះ ហឿន សេងហ័ង ភេទប្រុស អាយុ៣១ឆ្នាំ ទី៣/ ឈ្មោះ ឈុំ សុឆាត ភេទប្រុស អាយុ២៦ឆ្នាំ និងទី៤/ ឈ្មោះ ស៊ុំ សុគន្ធា ភេទស្រី អាយុ៣៥ឆ្នាំ។

បច្ចុប្បន្ន ជនសង្ស័យទាំងបួននាក់ខាងលើ ត្រូវបានបញ្ជូនទៅពន្ធនាគារខេត្តព្រះសីហនុ ដើម្បីអនុវត្តទោសតាមនីតិវិធីច្បាប់ជាធរមាន។

សូមបញ្ជាក់ថា រយៈពេល៦ខែ ឆ្នាំ២០២៦ កម្លាំងកងរាជអាវុធហត្ថខេត្តព្រះសីហនុ បានបើកប្រតិបត្តិការបង្ក្រាបទ្រង់ទ្រាយធំ និងបំបែកបទល្មើសគ្រឿងញៀន ដោយបានឃាត់ខ្លួនជនល្មើសរហូតដល់ ៦៥០នាក់ ព្រមទាំង ដកហូតគ្រឿងញៀនមួយចំនួនធំ ដែលនេះបានបង្ហាញពីការចូលរួមយ៉ាងសកម្មរបស់កម្លាំងអាវុធហត្ថ ដើម្បីកម្ចាត់បទល្មើសគ្រឿងញៀនដែលបំផ្លាញសង្គមជាតិរបស់យើង។

យោងតាមរបាយការណ៍របស់បញ្ជាការដ្ឋានអាវុធហត្ថខេត្តព្រះសីហនុ នៅថ្ងៃទី១៧ ខែសីហា ឆ្នាំ២០២៦ បានបញ្ជាក់ថា រយៈពេល ឆមាស១ ឆ្នាំ២០២៦ ល្មើសគ្រឿងញៀនចំនួន ៩៨លើក ត្រូវបានបង្ក្រាបដោយឃាត់ខ្លួន ជនសង្ស័យសរុបចំនួន ៦៥០នាក់ (ស្រី ៩៥នាក់) និងដកហូតសារធាតុញៀនជាង ១០០គីឡូក្រាម។

សម្រាប់ជនល្មើសទាំង ៦៥០នាក់ រួមមាន៖ ជនជាតិខ្មែរ ចំនួន ៥៣៣នាក់ (ស្រី ៧១នាក), ជនជាតិចិនំ ចំនួន ៩០នាក់ (ស្រី ០៧នាក់), ជនជាតិវៀតណាម ចំនួន ១៨នាក់ (ស្រី ១៤នាក់), ស្រ្តីជនជាតិឥណ្ឌូនេស៊ីម្នាក់, ស្រ្តីជនជាតិម៉ាឡេស៊ីម្នាក់, ជនជាតិឥណ្ឌាចំនួន ០៣នាក់, ជនជាតិនេប៉ាល់ម្នាក់, ជនជាតិបារាំងម្នាក់ និងស្រ្តីជនជាតិមីយ៉ាន់ម៉ា២នាក់៕