(ភ្នំពេញ)៖ តាមបទបញ្ជា និងដឹកនាំកិច្ចប្រតិបត្តិការ ដឹកនាំដោយលោក ឃួង ស្រេង ប្រធានគណៈបញ្ជាការឯកភាពរដ្ឋបាលរាជធានីភ្នំពេញ, កម្លាំងគណៈបញ្ជាការឯកភាពរដ្ឋបាលខណ្ឌពោធិ៍សែនជ័យ និងខណ្ឌឫស្សីកែវ បានចុះបង្ក្រាបទីតាំងសង្ស័យឆបោក Online Scams និងទីតាំងផ្គត់ផ្គង់សម្ភារទីតាំងឆបោក ចំនួន៤ទីតាំង។

ប្រតិបត្តិការនេះ បានធ្វើឡើងនៅភូមិសាស្ដ្រខណ្ឌពោធិ៍សែនជ័យ ចំនួន២ទីតាំង មនុស្សសរុបចំនួន២នាក់ ជនជាតិប៉ាគីស្ថាន និងជនជាតិខ្មែរ។ សម្ភារដកហូតរួមមាន៖ ទូរស័ព្ទបម្រើការងារ ៣១គ្រឿង, សុីមកាតបរទេស មួយចំនួន និងលិខិតឆ្លងដែន១ក្បាល។

សម្រាប់ភូមិសាស្ដ្រខណ្ឌឫស្សីកែវចំនួន២ទីតាំង មនុស្សសរុបចំនួន៤នាក់ ជនជាតិខ្មែរ៣នាក់ និងម៉ាឡេស៊ី១នាក់។ សម្ភារដកហូតរួមមាន៖ ទូរស័ព្ទបម្រើការងារ ៥៨៥គ្រឿង, សុីមកាតបរទេសចំនួន១៥៤ស៊ឹម និងស៊ឹមកាតមួយចំនួនធំ, CPU ចំនួន២១គ្រឿង, MONITOR ចំនួន១៤គ្រឿង, ម៉ូតូម៉ាក KAWASAKI ពាក់ផ្លាកលេខ ភ្នំពេញ1KC-6839 ចំនួន១គ្រឿង, លិខិតឆ្លងដែន៨ក្បាល, LAPTOP ចំនួន៣គ្រឿង, ALL IN ONE ចំនួន១០គ្រឿង និងដុំ ROUTER WIFI ចំនួន៥គ្រឿង។

សន្និដ្ឋាន ជនសង្ស័យខាងលើប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា Online Scams ក្រោមរូបភាពស្វែងរកអតិថិជនធ្វើការងារខ្យល់ និងផ្គត់ផ្គង់សម្ភារបម្រើទីតាំងឆបោក៕