(ភ្នំពេញ)៖ នាព្រឹកថ្ងៃទី២៥ ខែសីហា ឆ្នាំ២០២៦ នៅស្នងការដ្ឋាននគរបាលរាជធានីភ្នំពេញ បានប្រារព្ធពិធីប្រកាសកែសម្រួលផ្ទេរភារកិច្ច តែងតាំងមុខតំណែង និងបំពាក់ឋានន្តរស័ក្តិជូនមន្រ្តីនគរបាលជាតិ ចំនួន៩៦រូប ក្រោមអធិបតីភាពឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ តំណាងនាយឧត្តមសេនីយ៍ ស ថេត អគ្គស្នងការនគរបាលជាតិ។

ពិធីនេះ មានការអញ្ជើញចូលរួមពីថ្នាក់ដឹកនាំ និងមន្រ្តីនគរបាលជាច្រើនរូប រួមមាន លោក លោកស្រីស្នងការរង នាយការិយាល័យជំនាញទាំង៣៣ អធិការនគរបាលខណ្ឌទាំង១៤ នាយប៉ុស្តិ៍នគរបាលរដ្ឋបាលទាំង១០៥ និងមន្រ្តីនគរបាលមួយចំនួនទៀត។

ក្នុងឱកាសនោះ ឧត្តមសេនីយ៍ឯក ជួន ណារិន្ទ បានថ្លែងអបអរសាទរយ៉ាងកក់ក្តៅចំពោះមន្រ្តីនគរបាលទាំងអស់ ដែលទើបទទួលបានការដំឡើងឋានន្តរសក្តិ និងតែងតាំងមុខតំណែងថ្មី។ លោកបានគូសបញ្ជាក់ថា នេះគឺជាការលើកទឹកចិត្តដ៏ធំធេងពីថ្នាក់ដឹកនាំរាជរដ្ឋាភិបាល ក៏ដូចជាក្រសួងមហាផ្ទៃ និងអគ្គស្នងការដ្ឋាននគរបាលជាតិ ដើម្បីឆ្លើយតបទៅនឹងការខិតខំប្រឹងប្រែងបំពេញភារកិច្ចការពារថែរក្សាសន្តិសុខ សណ្តាប់ធ្នាប់ និងសុវត្ថិភាពសង្គមបានល្អប្រសើរ។

លោកឧត្តមសេនីយ៍ស្នងការ ក៏បានវាយតម្លៃខ្ពស់ចំពោះកិច្ចសហការយ៉ាងជិតស្និទ្ធរវាងគ្រប់ផ្នែក និងជំនាញរបស់កងកម្លាំងនគរបាលរាជធានីភ្នំពេញ ក្នុងការបង្ការ ទប់ស្កាត់ និងបង្រ្កាបបទល្មើសគ្រប់ប្រភេទប្រកបដោយ ប្រសិទ្ធភាពខ្ពស់ រហូតធ្វើឲ្យបទល្មើសមានការថយចុះគួរឲ្យកត់សម្គាល់ក្នុងភូមិសាស្រ្តរាជធានីភ្នំពេញ។

ជាមួយគ្នានេះ លោកបានជំរុញឲ្យបន្តយកចិត្តទុកដាក់ពង្រឹងការអនុវត្តគោលនយោបាយភូមិសង្កាត់មានសុវត្ថិភាពឲ្យបានម៉ឺងម៉ាត់ ជាពិសេសបន្តចូលរួមផ្សព្វផ្សាយអប់រំអំពីច្បាប់ចរាចរណ៍ផ្លូវគោក ផលប៉ះពាល់នៃគ្រឿងញៀន និងបញ្ហាក្មេងទំនើងនៅក្នុងសហគមន៍ និងតាមសាលារៀន ដើម្បីរួមចំណែកកសាងសង្គមជាតិមួយដែលប្រកបដោយសន្តិសុខ សណ្តាប់ធ្នាប់ និងការអភិវឌ្ឍប្រកបដោយចីរភាព៕