(កំពត)៖ លោកបណ្ឌិត ម៉ៅ ធនិន អភិបាលខេត្តកំពត បានដឹកនាំក្រុមការងារ មន្ត្រីរាជការ កងកម្លាំង អាជ្ញាធរ និងអ្នកពាក់ព័ន្ធក្រោមឱវាទ ចុះផ្ដល់ប័ណ្ណកម្មសិទ្ធិដីធ្លី (វិញ្ញាបនបត្រសម្គាល់ម្ចាស់អចលនវត្ថុ) ប្រមាណជាង ២ពាន់គ្រួសារ នាព្រឹកថ្ងៃទី២៥ ខែសីហា ឆ្នាំ២០២៦ នៅសាលាឃុំស្រែជាខាងត្បូង ស្រុកដងទង់ ខេត្តកំពត។

លោក ព្រាប សុផាត ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកំពត បានឱ្យដឹងថា ការចែកវិញ្ញាបនបត្រសម្គាល់ម្ចាស់អចលនវត្ថុ (ប័ណ្ណកម្មសិទ្ធិដីធ្លី) ជូនប្រជាពលរដ្ឋ នាពេលនេះ មានចំនួន ៣ភូមិ គឺមានភូមិត្រពាំងក្តារ ភូមិខ្ពស់ និងភូមិអូរប្ញស្សី ឃុំស្រែជាខាងត្បូង ស្រុកដងទង់ ដែលមានក្បាលដីសរុបចំនួន ៤១៨៧ក្បាលដី ស្មើនឹង ២២១៧គ្រួសារ។

ការប្រគល់ប័ណ្ណកម្មសិទ្ធិនេះ ធ្វើឡើងក្នុងគោលបំណង ធានាសុវត្ថិភាពផ្លូវច្បាប់លើការកាន់កាប់ដីធ្លីជូនប្រជាពលរដ្ឋ សំដៅកាត់បន្ថយទំនាស់ដីធ្លី និងលើកកម្ពស់ជីវភាពរស់នៅរបស់បងប្អូនប្រជាពលរដ្ឋ ឱ្យកាន់តែប្រសើរឡើង។

នាឱកាសនោះ លោកអភិបាលខេត្តកំពត បានលើកឡើងថា ការផ្ដល់ប័ណ្ណកម្មសិទ្ធិដីធ្លីជូនពលរដ្ឋ គឺជាគោលនយោបាយរបស់រាជរដ្ឋាភិបាល ក្រោមការគិតគូរយ៉ាងយកចិត្តទុកដាក់ពីសំណាក់សម្ដេចតេជោ ហ៊ុន សែន បន្តរហូតដល់សម្ដេចធិបតី ហ៊ុន ម៉ាណែត ដើម្បីឱ្យពលរដ្ឋទទួលបានសិទ្ធិស្របច្បាប់ក្នុងការគ្រប់គ្រងដីធ្លីរបស់ខ្លួន ពិសេសដើម្បីឈានដល់បញ្ចប់វិវាទដីធ្លីទាំងស្រុង។

លោកអភិបាលខេត្ត បានបន្តថា ដោយអនុវត្តតាមកម្មវិធីនយោបាយរបស់រាជរដ្ឋាភិបាល ក្រោមការដឹកនាំយ៉ាងប៉ិនប្រសប់ និងប្រកបដោយគតិបណ្ឌិតរបស់ សម្ដេចតេជោ ហ៊ុន សែន អតីតនាយករដ្ឋមន្ត្រី និងប្រកបដោយគតិ បណ្ឌិតរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានធ្វើឱ្យប្រទេសជាតិទាំងមូល មានសុខសន្តិភាពពេញលេញ ប្រជាពលរដ្ឋរស់ក្រោមម្លប់សន្តិភាពរហូតមកដល់បច្ចុប្បន្ន។ ហើយអស់រយៈកាលច្រើនជំនាន់ មកហើយ ប្រជាពលរដ្ឋស្ទើរគ្រប់តំបន់ មិនមានប័ណ្ណកម្មសិទ្ធិលើដីធ្លី និងផ្ទះសម្បែង ដែលធ្វើឱ្យការប្រើប្រាស់ដីធ្លី និងការទាញយកប្រយោជន៍ពីដីធ្លី មិនអស់សក្ដានុពលនោះទេ។

លោកអភិបាលខេត្ត បានបន្តបញ្ជាក់ថា ដោយអនុវត្តតាមកម្មវិធីនយោបាយ របស់រាជរដ្ឋាភិបាល ពាក់ព័ន្ធនឹងវិស័យដីធ្លី អាជ្ញាធរខេត្តកំពត មន្ទីរជំនាញ រួមនឹងមន្ត្រីក្រុមចុះបញ្ជីដីធ្លីមានលក្ខណៈជាប្រព័ន្ធ នៃកម្មវិធីអនុវិស័យ គឺរដ្ឋបាលដីធ្លីខេត្តកំពត បានខិតខំប្រឹងប្រែងយកចិត្តទុកដាក់ លើការអនុវត្តការងារចុះបញ្ជីដី ជូនបងប្អូនប្រជាពលរដ្ឋឱ្យកាន់តែលឿន និងមានប្រសិទ្ធភាព ស្របតាមកិច្ចចង្អុលការពីសំណាក់សម្ដេចធិបតី ហ៊ុន ម៉ាណែត ធ្វើយ៉ាងណាចេញប័ណ្ណកម្មសិទ្ធិដីធ្លី ជូនពលរដ្ឋក្នុងដែនសមត្ថកិច្ចរបស់ខ្លួន ឱ្យបានឆាប់បំផុត។

លោកក៏បានជំរុញឱ្យពលរដ្ឋដែលទទួលបានប័ណ្ណរួចហើយ សូមយកទៅប្រើប្រាស់ឱ្យចំគោលដៅ និងទាញយកប្រយោជន៍ពីដីធ្លីឱ្យអស់សក្ដានុពលនៃដី ដើម្បីលើកកម្ពស់ជីវភាពរស់នៅប្រចាំថ្ងៃ ក៏ដូចជារួមចំណែក ក្នុងការអភិវឌ្ឍន៍សង្គមផងដែរ។ ទន្ទឹមនោះ ក្រោយពេលដែលទទួលបានប័ណ្ណកម្មសិទ្ធិដីធ្លីរួចរាល់ហើយ សូមបងប្អូនកុំមានវិវាទពាក់ព័ន្ធនឹងដីធ្លីបន្តទៀត ដោយសារមុននឹងបានចេញប័ណ្ណនេះមក គឺមានការឯកភាពគ្នា ទាំងសងខាងរួចមកហើយ សម្រាប់អ្នកនៅជាប់ព្រំដីគ្នា ហើយបើមានជម្លោះ ឬវិវាទ យន្តការនៃការដោះស្រាយក្រៅប្រព័ន្ធតុលាការក៏មិនអាចដោះស្រាយជូនបានឡើយ គឺមានតែដោះស្រាយនៅប្រព័ន្ធតុលាការតែប៉ុណ្ណេះ ដូច្នេះសូមកុំឱ្យកើតមានឡើង នូវវិវាទដីធ្លីក្រោយទទួលបានប័ណ្ណកម្មសិទ្ធិនេះតទៅ៕