(ក្រចេះ)៖ លោក នេត្រ ភក្ត្រា រដ្ឋមន្ត្រីក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះអញ្ជើញចុះសួរសុខទុក្ខ និងសំណេះសំណាលជាមួយបងប្អូនខ្មែរឥស្លាជិត ៨០គ្រួសារ ដែលរងផលប៉ះពាល់ដោយសារគ្រោះទឹកជំនន់ទន្លេមេគង្គ នៅភូមិព្រែកសាម៉ាន់ ឃុំព្រែកសាម៉ាន់ ស្រុកឆ្លូង ខេត្តក្រចេះ។

ពិធីជួបសំណេះសំណាល និងចែកអំណោយនៅរសៀលថ្ងៃទី២៥ ខែសីហា ឆ្នាំ២០២៦ ត្រូវបានរៀបចំឡើងក្នុងគោលបំណងជួយសម្រាលការលំបាក និងបញ្ហាប្រឈមរបស់បងប្អូនខ្មែរឥស្លាម ដែលផ្ទះសម្បែង និងដំណាំកសិកម្មរបស់ពួកគាត់បានលិចលង់ដោយសារទឹកជំនន់ទន្លេមេគង្គ។

អំណោយទាំងនោះបានមកពីគម្រោងឃ្លាំងអាហារសហគមនាគមន៍ ដែលអនុវត្តដោយ អង្គការមូលនិធិអ៊ីម៉ាន់កម្ពុជា ដែលរួមមានអង្ករ និងគ្រឿងឧបភោគ បរិភោគ ផ្សេងៗ ដែលនាំយកទៅចែកជូនដល់ពួកគាត់ ដើម្បីរួមចំណែកសម្រាលការលំបាកក្នុងគ្រាអាសន្ននេះ។

ក្នុងបេសកកម្មមនុស្សធម៌នេះ លោករដ្ឋមន្ត្រី នេត្រ ភក្ត្រា បានចុះពិនិត្យដោយផ្ទាល់ដល់ទីតាំងរស់នៅរបស់បងប្អូនខ្មែរឥស្លាម ពិសេសនៅតាមភូមិព្រែកសាម៉ាន់ នៃឃុំព្រែកសាម៉ាន ដែលជាតំបន់រងផលប៉ះពាល់ដោយសារទឹកជំនន់ជិត១០ថ្ងៃមកនេះ។

លោករដ្ឋមន្ត្រីបានពាំនាំនូវការសួរសុខទុក្ខយ៉ាងកក់ក្តៅពីសំណាក់ថ្នាក់ដឹកនាំរាជរដ្ឋាភិបាល និងបានសម្តែងនូវការយកចិត្តទុកដាក់ខ្ពស់ចំពោះសុខទុក្ខរបស់បងប្អូនប្រជាពលរដ្ឋទាំងអស់។

ជាមួយគ្នានេះ លោករដ្ឋមន្ត្រីបានណែនាំដល់អាជ្ញាធរស្រុក ឃុំ ឱ្យបន្តយកចិត្តទុកដាក់ខ្ពស់តាមដានស្ថានភាពទឹកជំនន់ជាប្រចាំ និងត្រៀមលក្ខណៈជួយសង្គ្រោះប្រជាពលរដ្ឋឱ្យបានទាន់ពេលវេលា ដោយផ្តល់អាទិភាពខ្ពស់បំផុតដល់ការការពារអាយុជីវិត និងសុវត្ថិភាពរបស់ប្រជាពលរដ្ឋ ជាពិសេសកុមារ និងជនងាយរងគ្រោះ។ លោកក៏បានជំរុញឱ្យអាជ្ញាធររៀបចំទីតាំងមានសុវត្ថិភាពសម្រាប់ជម្លៀសប្រជាពលរដ្ឋ និងត្រៀមសម្ភារៈចាំបាច់ ដើម្បីឆ្លើយតបនឹងស្ថានការណ៍បន្ទាន់។

លោករដ្ឋមន្ត្រី នេត្រ ភក្ត្រាក៏បានអំពាវនាវដល់បងប្អូនប្រជាពលរដ្ឋទាំងអស់ ឱ្យបន្តប្រុងប្រយ័ត្នខ្ពស់ចំពោះគ្រោះទឹកជំនន់ និងចូលរួមសហការជាមួយអាជ្ញាធរ ដើម្បីធានាសុវត្ថិភាពផ្ទាល់ខ្លួន និងក្រុមគ្រួសារ។

បងប្អូនខ្មែរឥស្លាម ដែលបានទទួលអំណោយបានសម្តែងនូវក្តីរីករាយ និងថ្លែងអំណរគុណយ៉ាងជ្រាលជ្រៅចំពោះលោករដ្ឋមន្ត្រី នេត្រ ភក្ត្រា ក្រុមការងាររាជរដ្ឋាភិបាលចុះមូលដ្ឋានស្រុកឆ្លូង និងអាជ្ញាធរមូលដ្ឋានដែលបានជួយឧបត្ថម្ភទាន់ពេលវេលា។ ជំនួយទាំងនេះ ពិតជាមានតម្លៃមិនអាចកាត់ថ្លៃបាន ក្នុងការជួយសម្រាលបន្ទុកដឮដែលពួកគាត់កំពុងជួបប្រទះ។

អាជ្ញាធរមូលដ្ឋានក៏បានប្តេជ្ញាបន្តតាមដានស្ថានការណ៍ និងចាត់វិធានការចាំបាច់នានា ដើម្បីធានាសុវត្ថិភាព និងជួយស្តារជីវភាពប្រជាពលរដ្ឋឡើងវិញក្រោយពេលទឹកស្រក៕