(ភ្នំពេញ)៖ លោកវរសេនីយ៍ទោ លឿម បូរ៉ា ត្រូវបានប្រកាសតែងតាំងជាផ្លូវការជានាយការិយាល័យស៊ើបអង្កេត និងអនុវត្តនីតិវិធី នៃស្នងការដ្ឋាននគរបាលរាជធានីភ្នំពេញ។ ការតែងតាំងនេះធ្វើឡើងដើម្បីជំនួស លោកឧត្តមសេនីយ៍ត្រី ជា ចិត្រា ដែលត្រូវបានផ្ទេរភារកិច្ចទៅកាន់តំណែងជាស្នងការនគរបាលខេត្តមណ្ឌលគិរី។

ពិធីប្រកាសកែសម្រួលផ្ទេរភារកិច្ច តែងតាំងមុខតំណែង និងបំពាក់ឋានន្តរស័ក្តិជូនមន្ត្រីនគរបាលជាតិចំនួន៩៦រូបនេះ បានប្រព្រឹត្តទៅកាលពីព្រឹកថ្ងៃទី២៥ ខែសីហា ឆ្នាំ២០២៦ ក្រោមអធិបតីភាពរបស់លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ តំណាងនាយឧត្តមសេនីយ៍ ស ថេត អគ្គស្នងការនគរបាលជាតិ។

ក្នុងឱកាសនេះ លោកឧត្តមសេនីយ៍ឯក ជួន ណារិន្ទ បានថ្លែងអបអរសាទរយ៉ាងកក់ក្តៅចំពោះមន្ត្រីទាំងអស់ដែលទទួលបានតួនាទី និងឋានន្តរស័ក្តិថ្មី។ ជាមួយគ្នានេះ លោកក៏បានជំរុញឲ្យមន្ត្រីទាំងអស់បន្តពង្រឹងការងារបង្ការ ទប់ស្កាត់ និងបង្ក្រាបបទល្មើសគ្រប់ប្រភេទឲ្យកាន់តែមានប្រសិទ្ធភាពខ្ពស់។ ពិសេស គឺការបន្តអនុវត្តគោលនយោបាយភូមិ-សង្កាត់មានសុវត្ថិភាព និងការផ្សព្វផ្សាយអប់រំអំពីច្បាប់ចរាចរណ៍ គ្រឿងញៀន និងបញ្ហាក្មេងទំនើង ដើម្បីធានាសន្តិសុខ សណ្តាប់ធ្នាប់សាធារណៈជូនប្រជាពលរដ្ឋ។

លោកស្នងការក៏បានវាយតម្លៃខ្ពស់ចំពោះកិច្ចសហការ និងការខិតខំប្រឹងប្រែងរបស់កម្លាំងនគរបាលរាជធានីភ្នំពេញ ដែលបានរួមចំណែកយ៉ាងសកម្មក្នុងការធ្វើឲ្យបទល្មើសនានាមានការថយចុះគួរឲ្យកត់សម្គាល់ នៅក្នុងភូមិសាស្ត្ររាជធានីភ្នំពេញ៕