(តាកែវ)៖ នៅវេលាម៉ោង ១១៖០៥នាទី ថ្ងៃទី២៥ ខែសីហា ឆ្នាំ២០២៦ ករណីអគ្គិភ័យមួយបានឆាបឆេះឃ្លាំងស្តុកកំទេចក្រណាត់យ៉ាងសន្ធោសន្ធៅ ស្ថិតនៅក្នុងភូមិតានប់ ឃុំចំបក់ ស្រុកបាទី ខេត្តតាកែវ។ ឃ្លាំងដែលរងការខូចខាតនេះ មានម្ចាស់ឈ្មោះ ហេង ភារិទ្ធ ភេទប្រុស អាយុ៤០ឆ្នាំ។

យោងតាមរបាយការណ៍របស់លោក វរសេនីយ៍ទោ មូល សារ៉ាត់ អធិការនគរបាលស្រុកបាទី បានឱ្យដឹងថា ឃ្លាំងដែលត្រូវអគ្គិភ័យឆាបឆេះមានទំហំ ១៣ម៉ែត្រ × ២០ម៉ែត្រ សាងសង់អំពីដែក ជញ្ជាំងឥដ្ឋ និងដំបូលស័ង្កសី។ ក្នុងហេតុការណ៍នេះ សម្ភារៈដែលរងការខូចខាតរួមមាន កំទេចក្រណាត់ប្រមាណ ៣០តោន ដែលមានតម្លៃប្រមាណ ២,០០០ដុល្លារអាមេរិក និងឃ្លាំងខ្លួនឯងដែលមានតម្លៃប្រមាណ ១០,០០០ដុល្លារអាមេរិក សរុបការខូចខាតប៉ាន់ស្មានប្រមាណ ១២,០០០ដុល្លារអាមេរិក។

ដើម្បីទប់ស្កាត់ និងពន្លត់អគ្គិភ័យ កម្លាំងសមត្ថកិច្ចបានប្រើប្រាស់រថយន្តពន្លត់អគ្គិភ័យចំនួន ៦គ្រឿង មកពីបណ្តាអង្គភាពពាក់ព័ន្ធ រួមមាន រថយន្តពន្លត់អគ្គិភ័យស្រុកបាទី ១គ្រឿង, ស្នងការដ្ឋាននគរបាលខេត្តតាកែវ ២គ្រឿង, ស្រុកព្រៃកប្បាស ១គ្រឿង, ស្រុកសំរោង ១គ្រឿង និងស្រុកត្រាំកក់ ១គ្រឿង។ ប្រតិបត្តិការពន្លត់អគ្គិភ័យបានប្រើប្រាស់ទឹកសរុប ១៧រថយន្ត ស្មើនឹងប្រមាណ ១០២ម៉ែត្រគូប។

ចំពោះមូលហេតុនៃការកើតមានអគ្គិភ័យនេះ មិនទាន់ត្រូវបានបញ្ជាក់នៅឡើយទេ ហើយសមត្ថកិច្ចកំពុងបន្តស្រាវជ្រាវ ដើម្បីកំណត់មូលហេតុពិតប្រាកដ។

ជុំវិញហេតុការណ៍នេះ អគ្គិភ័យមិនបានឆេះរាលដាលដល់រោងចក្រ និងទីតាំងនៅក្បែរនោះឡើយ ហើយមិនបណ្តាលឱ្យមានមនុស្ស សត្វរងគ្រោះ ឬខូចខាតទ្រព្យសម្បត្តិរបស់ប្រជាពលរដ្ឋជិតខាងឡើយ។ ហេតុការណ៍នេះបានបញ្ចប់ដោយសុវត្ថិភាព បន្ទាប់ពីកម្លាំងសមត្ថកិច្ចបានគ្រប់គ្រងស្ថានការណ៍បានទាំងស្រុង។