(កំពង់ស្ពឺ)៖ លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ បានដាក់បទបញ្ជាយ៉ាងម៉ឺងម៉ាត់ដល់កម្លាំងក្រោមឱវាទ ឱ្យប្រើកណ្តាប់ដៃដែកលើក្មេងទំនើងដែលបង្កភាពអនាធិបតេយ្យក្នុងសង្គម ដោយគ្មានការលើកលែង។

ការបង្ក្រាបនេះធ្វើឡើងក្រោមការចង្អុលបង្ហាញពីនាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងមានការណែនាំពីបណ្ឌិត ជាម ចន្ទ័សោភ័ណ អភិបាលខេត្ត ព្រមទាំងមានការសម្របសម្រួលនីតិវិធីពីព្រះរាជអាជ្ញាអមសាលាដំបូងខេត្ត។

ថ្មីៗនេះ កម្លាំងជំនាញកងរាជអាវុធហត្ថខេត្តកំពង់ស្ពឺ បានធ្វើការបង្ក្រាប និងឃាត់ខ្លួនក្មេងទំនើងដែលចូលចិត្តបង្ហោះម៉ូតូតាមទីសាធារណៈបានជាបន្តបន្ទាប់ចំនួន ០៦នាក់ ក្រោយទទួលបានការប្តឹងរាយការណ៍ពីប្រជាពលរដ្ឋតាមរយៈលេខអន្តរាគមន៍ (Hotline 1292)។

ក្នុងនោះ នៅថ្ងៃទី២២ ខែសីហា ឆ្នាំ២០២៦ កម្លាំងបានឃាត់ខ្លួនក្មេងទំនើង ០៤នាក់ នៅចំណុចទំនប់ទឹកអូរត្រែង ភូមិអង្គសង្គ្រាម ឃុំជង្រុក ស្រុកគងពិសី។ បន្ទាប់មក នៅថ្ងៃទី២៣ ខែសីហា ឆ្នាំ២០២៦ ក៏បានឃាត់ខ្លួនជនសង្ស័យ ០២នាក់បន្ថែមទៀត នៅចំណុចផ្លូវលេង១៣០ ភូមិព្រៃសាលា ឃុំរលាំងគ្រើល ស្រុកសមរោងទង ព្រមទាំងដកហូតម៉ូតូ ០៣គ្រឿង និងទូរសព្ទ ០៦គ្រឿង។

បច្ចុប្បន្នក្មេងទំនើងទាំងនេះ ត្រូវបានកម្លាំងកងរាជអាវុធហត្ថខេត្តកំពង់ស្ពឺ នាំយកមកអប់រំណែនាំ និងធ្វើកិច្ចសន្យាចំពោះមុខមាតាបិតា និងអាណាព្យាបាល ដើម្បីបញ្ឈប់រាល់សកម្មភាពទំនើងដែលនាំឱ្យប៉ះពាល់សណ្តាប់ធ្នាប់សង្គម និងបង្កការភ័យខ្លាចដល់សាធារណជន
។

ចំណែកម៉ូតូត្រូវបានដកហូតរក្សាទុករយៈពេល ០៣ខែ នៅទីបញ្ជាការកងរាជអាវុធហត្ថខេត្តកំពង់ស្ពឺ។ លោកឧត្តមសេនីយ៍ត្រី ម៉េង ស្រ៊ុន ក៏បានអំពាវនាវដល់ប្រជាពលរដ្ឋក្នុងខេត្តកំពង់ស្ពឺ ឱ្យបន្តរាយការណ៍ពីសកម្មភាពក្មេងទំនើង ឬឧបទ្ទវហេតុផ្សេងៗមកកាន់លេខទូរសព្ទអន្តរាគមន៍សង្គ្រោះបន្ទាន់ Hotline 1292 ដោយកម្លាំងអាវុធហត្ថនឹងរក្សាការសម្ងាត់ជូន។