(ភ្នំពេញ)៖ ចាប់ពីដើមខែមករា ឆ្នាំ២០២៦ មជ្ឈមណ្ឌលពាណិជ្ជកម្មអាស៊ានអន្តរជាតិ ដែលគេស្គាល់ជាផ្លូវការថា «ផ្សារដើមគរថ្មី» បានបើកទ្វារស្វាគមន៍អាជីវករ និងអតិថិជនជាផ្លូវការ ដែលបច្ចុប្បន្ននេះ អាជីវករជាច្រើនបានចូលមកដូរនៅទីនេះ។

ផ្សារនេះដំណើរការលក់ពេញ ២៤ម៉ោងក្នុងមួយថ្ងៃ ដោយពេលយប់ភាគច្រើនអ្នកដែលមកទិញបោះដុំ និងពេលថ្ងភាគច្រើនជាប្រភេទអតិថិជនទិញរាយ។

ផ្សារទំនើបដ៏ធំទូលាយឬមជ្ឈមណ្ឌល ពាណិជ្ជកម្មថ្មីនេះ ត្រូវបានសាងសង់លើផ្ទៃដីទំហំ ៣០ ហិកតា ស្ថិតនៅលើមហាវិថីឈ្នះឈ្នះ ក្នុងខណ្ឌព្រែកព្នៅ រាជធានីភ្នំពេញ ដែលឥឡូវនេះបានក្លាយជាផ្សារលក់ដុំដ៏ធំបំផុតនៅក្នុងប្រទេស កម្ពុជា និងជាទីតាំងយុទ្ធសាស្ត្រកំពុងអភិវឌ្ឍយ៉ាងឆាប់រហ័ស និងមានសក្តានុពលខ្ពស់។

បច្ចុប្បន្ននេះ អាជីវករជាច្រើនបាននាំគ្នាចូលមកលក់ដូរផលិតផលស្រស់ៗជាច្រើនប្រភេទរួមមាន៖ បន្លែ ផ្លែឈើ ត្រី សាច់ អាហារសមុទ្រ គ្រឿងទេស គ្រឿងផ្សំ ក៏ដូចជាអាហារកែច្នៃ និងម្ហូបអាហារជាច្រើនមុខទៀត ដែលបំពេញតម្រូវការប្រចាំថ្ងៃរបស់ប្រជាពលរដ្ឋ។

ផ្សារដើមគរថ្មីនេះ បានក្លាយជាជម្រើសដ៏ល្អសម្រាប់អាជីវករ ដោយសារតែទីតាំងធំទូលាយ ហេដ្ឋារចនាសម្ព័ន្ធទំនើប មានចំណតយានយន្តគ្រប់គ្រាន់ ប្រព័ន្ធភ្លើងបំភ្លឺល្អ ដែលបាននូវភាពងាយស្រួលក្នុងការលក់ដូរទាំងពេលថ្ងៃ និងពេលយប់។

អ្វីដែលពិសេសយើងឃើញថា ផ្សារស្ថិតនីទីតាំងយុទ្ធសាស្ត្រលើបណ្តាញផ្លូវគន្លឹះ ដែលអាចតភ្ជាប់ដោយផ្ទាល់ទៅកាន់បណ្តាខេត្តនានា ជួយសម្រួលដល់ការដឹកជញ្ជូនទំនិញ និងការធ្វើដំណើររបស់អតិថិជនពីគ្រប់ទិសទី។ លើសពីនេះ ផ្សារនេះមានទីតាំងតូប និងស្តង់សរុបជិត ២០០០ សម្រាប់លក់ដូរ ដែលបង្កើតបានជាសហគមន៍ពាណិជ្ជកម្មដ៏រស់រវើក។ បើតាមការសាកអាជីវកម្ម មានអតិថិជាច្រើន មកពីតាមបណ្តាខេត្តនានាមកទិញឥវ៉ាន់ពីផ្សារយកទៅលក់បន្ត។

ដើម្បីលើកទឹកចិត្តដល់អាជីវករ ផ្សារដើមគរថ្មី បានផ្តល់ជូនពិសេសសម្រាប់អាជីវករដែលចូលមកលក់ដូរនៅដំណាក់កាលដំបូង ដោយនឹងទទួលបានសិទ្ធិមិនគិតថ្លៃជួលតូប និងស្តង់ទាំងស្រុងក្នុងឆ្នាំ២០២៦។ នេះជាឱកាសដ៏ល្អសម្រាប់អាជីវករក្នុងការចាប់ផ្តើមអាជីវកម្មដោយគ្មានបន្ទុកថ្លៃជួល និងរួមចំណែកដល់ការរីកចម្រើននៃសេដ្ឋកិច្ចក្នុងតំបន់។

សូមទស្សនាការលើកឡើងដូចខាងក្រោម៖