(ភ្នំពេញ)៖ ក្រសួងពាណិជ្ជកម្មកម្ពុជា នឹងរៀបចំ «វេទិកាពាណិជ្ជកម្មឌីជីថលកម្ពុជា និងពិព័រណ៍អនឡាញ លើកទី៣» រយៈពេល ៣ថ្ងៃ ចាប់ពីថ្ងៃទី១១ ដល់ថ្ងៃទី១៣ ខែកញ្ញា ឆ្នាំ២០២៦ នៅមជ្ឈមណ្ឌលសន្និបាត និងពិព័រណ៍កោះពេជ្រ អគារ G-L ចាប់ពីម៉ោង ៩ព្រឹក ដល់ ៨យប់។

ក្នុងសន្និសីទសារព័ត៌មាន នៅថ្ងៃទី២៦ ខែសីហា ឆ្នាំ២០២៦នេះ លោក ប៉ែន សុវិជាតិ រដ្ឋលេខាធិការក្រសួងពាណិជ្ជកម្ម បានឲ្យដឹងថា វេទិកាដ៏សំខាន់នេះ នឹងប្រព្រឹត្តទៅក្រោមមូលបទ «ជំរុញពាណិជ្ជកម្មឌីជីថលកម្ពុជា ឆ្ពោះទៅឆ្នាំ២០៣០»។

បើតាមលោក ប៉ែន សុវិជាតិ, គោលបំណងសំខាន់នៃវេទិការួមមាន៖

ទី១៖ បង្កើតកិច្ចសន្ទនារវាងរាជរដ្ឋាភិបាល វិស័យឯកជន ដៃគូអភិវឌ្ឍន៍ និងអ្នកជំនាញ អំពីទិសដៅអភិវឌ្ឍ ពាណិជ្ជកម្មឌីជីថលកម្ពុជា ឆ្ពោះទៅឆ្នាំ២០៣០។
ទី២៖ ជំរុញការប្រើប្រាស់បច្ចេកវិទ្យា និងពាណិជ្ជកម្មអេឡិចត្រូនិករបស់សហគ្រាសកម្ពុជា ដើម្បីពង្រីកទីផ្សារ និងបង្កើនភាពប្រកួតប្រជែង។
ទី៣៖ បង្កើតឱកាសផ្សារភ្ជាប់ធុរកិច្ចរវាងសហគ្រាសកម្ពុជា និងក្រុមហ៊ុនដៃគូ និងទីផ្សារអន្តរជាតិ
ទី៤៖ ជំរុញការចូលរួមរបស់ស្ត្រី និងយុវជនក្នុងសេដ្ឋកិច្ច និងពាណិជ្ជកម្មឌីជីថល
ទី៥៖ ពង្រឹងទំនុកចិត្ត សុវត្ថិភាព និងការទទួលខុសត្រូវក្នុងប្រព័ន្ធពាណិជ្ជកម្ម តាមប្រព័ន្ធអេឡិចត្រូនិក និង
ទី៦៖ ជំរុញឱ្យការប្រើប្រាស់ប្រព័ន្ធឌីជីថល នាំទៅរកលទ្ធផលពាណិជ្ជកម្មជាក់ស្តែង សម្រាប់សហគ្រាសកម្ពុជា។

វេទិកាឆ្នាំនេះ ក៏បានដាក់ចេញនូវ «បេសកកម្ម ៥០០ ប្រតិបត្តិការ» (Mission 500 Transactions) លើថ្នាលពាណិជ្ជកម្មអេឡិចត្រូនិកជាតិ CambodiaTrade.com ដែលមានគោលបំណងបំលែងការផ្សព្វផ្សាយផលិតផលកម្ពុជា ទៅជាការបញ្ជាទិញ និងប្រតិបត្តិការពាណិជ្ជកម្មជាក់ស្តែង។

សាធារណជន ក៏អាចចូលរួមកម្មវិធីលើកទឹកចិត្តផ្សេងៗ ដែលមានឱកាសទទួលបាន Mascot ផ្លូវការរបស់ DTF ព្រមទាំងមានឱកាស ឈ្នះរង្វាន់ជាច្រើន ពីដៃគូកម្មវិធី។

ក្រសួងពាណិជ្ជកម្ម សូមអំពាវនាវដល់សាធារណជន សហគ្រិន សហគ្រាសធុនមីក្រូ តូច និងមធ្យម សហគ្រិនស្ត្រី យុវជន និស្សិត និងអ្នកចាប់អារម្មណ៍លើបច្ចេកវិទ្យា និងពាណិជ្ជកម្ម សូមចូលរួមឱ្យបានច្រើនកុះករ។

លោក ប៉ែន សុវិជាតិ បានលើកឡើងថា ការទិញផលិតផលកម្ពុជា មិនមែនគ្រាន់តែជាប្រតិបត្តិការពាណិជ្ជកម្មមួយប៉ុណ្ណោះទេ ប៉ុន្តែជាការរួមចំណែក គាំទ្រដល់សហគ្រាសក្នុងស្រុក ការបង្កើតការងារ ការបង្កើនប្រាក់ចំណូល និងការពង្រឹងសមត្ថភាពផលិតរបស់សេដ្ឋកិច្ចជាតិ។

សូមជម្រាបថា វេទិកានេះ ត្រូវបានបន្តរៀបចំឡើង ជាលើកទី៣ តាមគំនិតផ្តួចផ្តើមរបស់លោកស្រី រដ្ឋមន្ត្រីក្រសួងពាណិជ្ជកម្ម ដើម្បីបន្តកិច្ចខិតខំ ប្រឹងប្រែងរបស់ក្រសួង ក្នុងការជំរុញការធ្វើបរិវត្តកម្មឌីជីថល ក្នុងវិស័យពាណិជ្ជកម្ម។

ព្រមទាំងពង្រឹងប្រព័ន្ធអេកូឡូស៊ីពាណិជ្ជកម្មឌីជីថល និងបង្កើនលទ្ធភាពរបស់ធុរកិច្ចកម្ពុជា ជាពិសេសសហគ្រាសធុនមីក្រូ តូច និងមធ្យម សហគ្រិនស្ត្រី និងយុវជន ក្នុងការប្រើប្រាស់បច្ចេកវិទ្យាឌីជីថល ដើម្បីពង្រីកទីផ្សារទាំងក្នុងស្រុក និងអន្តរជាតិ៕