(ភ្នំពេញ)៖ ក្នុងរយៈពេលតែ ១សប្តាហ៍ ចាប់ពីថ្ងៃទី៦ ដល់ថ្ងៃទី១២ ខែសីហា ឆ្នាំ២០២៦ មន្ត្រីជំនាញនៃក្រសួងបរិស្ថាន បានសហការយ៉ាងជិតស្និទ្ធជាមួយអាជ្ញាធរពាក់ព័ន្ធ អង្គការដៃគូ និងប្រជាពលរដ្ឋ បានចុះបង្ក្រាបបទល្មើសធនធានធម្មជាតិបានចំនួន ៣៣ករណី និងបានកសាងសំណុំរឿងចំនួន ៤ករណី បញ្ជូនទៅតុលាការ ដើម្បីចាត់ការតាមនីតិវិធីច្បាប់។

ប្រតិបត្តិការដ៏ម៉ឺងម៉ាត់នេះ បានធ្វើឡើងនៅតាមតំបន់ការពារធម្មជាតិទូទាំងប្រទេស ដោយក្រុមការងារបានចាប់ឃាត់ និងរក្សាទុកវត្ថុតាងជាច្រើន រួមមាន៖ រថយន្តចំនួន ១គ្រឿង គោយន្ត/រ៉ឺម៉កចំនួន ៦គ្រឿង រណាយន្តចំនួន ២៥គ្រឿង កាំភ្លើងកែច្នៃចំនួន ៣ដើម និងអន្ទាក់ចំនួន ៦៨ខ្សែ។ ជាមួយគ្នានេះ ឈើចំនួន ១៨,៤៣ម៉ែត្រគូប ត្រូវបានដកហូត និងការទន្ទ្រានដីព្រៃធ្វើជាកម្មសិទ្ធិខុសច្បាប់ចំនួន ២,៧០ហិកតា ត្រូវបានបង្ក្រាប។

ក្រសួងបរិស្ថានបានបញ្ជាក់ថា ខ្លួនបានដាក់ចេញនូវវិធានការម៉ឺងម៉ាត់ក្នុងការអនុវត្តច្បាប់ និងមិនមានការលើកលែង ដើម្បីបង្ក្រាបបទល្មើសធនធានធម្មជាតិ និងពង្រឹងប្រសិទ្ធភាពនៃការគ្រប់គ្រងការពារធនធានធម្មជាតិ និងការពង្រីកគម្របបៃតង នៅតាមតំបន់ការពារធម្មជាតិទាំង ៧៣កន្លែងទូទាំងប្រទេស។

ជាពិសេស ដើម្បីពង្រឹងការគ្រប់គ្រងធនធានធម្មជាតិនៅឧទ្យានជាតិព្រះសុរាម្រិត-កុសមៈ «គីរីរម្យ» ក្នុងភូមិសាស្រ្តខេត្តកំពង់ស្ពឺ ក្រសួងបានបន្តធ្វើការរួមគ្នាជិតស្និទ្ធជាមួយក្រសួង-ស្ថាប័នពាក់ព័ន្ធ អាជ្ញាធរមូលដ្ឋានគ្រប់ថ្នាក់ អង្គការដៃគូ សាលាដំបូងខេត្ត អង្គការ សមាគម សង្គមស៊ីវិល និងប្រជាពលរដ្ឋនៅតាមសហគមន៍មូលដ្ឋាន ដើម្បីទប់ស្កាត់បទល្មើសព្រៃឈើ និងធានានិរន្តរភាពបរិស្ថាននៅក្នុងតំបន់ការពារធម្មជាតិ។

ក្រសួងក៏បានជំរុញឱ្យការចុះល្បាតកាន់តែមានប្រសិទ្ធភាព ដោយផ្តោតលើការស្រាវជ្រាវ ប្រមូលភស្តុតាង រៀបចំឯកសារឱ្យបានច្បាស់លាស់ ដើម្បីបញ្ជូនជនល្មើសទៅតុលាការ។ យោងតាមក្រមបរិស្ថាន និងធនធានធម្មជាតិ មាត្រា៨៥០ ចំណុច គ បទល្មើសកាប់ ផ្តួល រំលំ ឬបំផ្លាញព្រៃឈើ និងរុក្ខជាតិព្រៃដោយគ្មានការអនុញ្ញាត នឹងត្រូវផ្តន្ទាទោសដាក់ពន្ធនាគារពី ១ឆ្នាំ ទៅ ៥ឆ្នាំ និងពិន័យជាប្រាក់ពី ១០០ ០០០ ០០០រៀល ទៅ ៥០០ ០០០ ០០០រៀល។ នេះជាការបង្ហាញពីការប្តេជ្ញាចិត្តខ្ពស់របស់រាជរដ្ឋាភិបាលកម្ពុជា ក្នុងការការពារ និងអភិរក្សធនធានធម្មជាតិសម្រាប់បច្ចុប្បន្ន និងអនាគត៕