(ភ្នំពេញ)៖ លោក Syed Yousaf Raza Gilani ប្រធានស្ថាបនិកសន្និសីទប្រធានសភាអន្តរសភា និងជាប្រធានព្រឹទ្ធសភាប៉ាគីស្ថាន បានលើកឡើងថា ការគោរពច្បាប់អន្តរជាតិ នឹងបង្កើតឱ្យមានភាពអាចព្យាករណ៍បាន ជួយកាត់បន្ថយហានិភ័យនៃជម្លោះ និងជំរុញការអភិវឌ្ឍប្រកបដោយចីរភាព ខណៈសភាត្រូវតែបំពេញតួនាទីត្រួតពិនិត្យ និងទាមទារឱ្យរដ្ឋាភិបាលរបស់ខ្លួនទទួលខុសត្រូវចំពោះបទដ្ឋានទាំងនេះ។

ការលើកឡើងរបស់លោក Syed Yousaf Raza Gilani បានធ្វើឡើងក្នុងឱកាសដែលលោកដឹកនាំគណៈប្រតិភូអញ្ជើញចូលរួមសន្និសីទប្រធានសភាអន្តរសភាលើកទី២ (ISC-2) នាព្រឹកថ្ងៃទី២៧ ខែសីហា ឆ្នាំ២០២៦ នៅប្រទេសកម្ពុជា។

ក្នុងកម្មវិធីបើកសន្និសីទ លោក Syed Yousaf Raza Gilani បានថ្លែងយ៉ាងដូច្នេះថា «នៅពេលដែលច្បាប់អន្តរជាតិត្រូវបានគោរព វានឹងបង្កើតឱ្យមានភាពអាចព្យាករណ៍បាន ជួយកាត់បន្ថយហានិភ័យនៃជម្លោះ និងជំរុញការអភិវឌ្ឍប្រកបដោយចីរភាព»។

ប្រធានព្រឹទ្ធសភាប៉ាគីស្ថាន បានបញ្ជាក់ថា សភាត្រូវតែបំពេញតួនាទីត្រួតពិនិត្យ និងទាមទារឱ្យរដ្ឋាភិបាលរបស់ខ្លួនទទួលខុសត្រូវចំពោះបទដ្ឋានអន្តរជាតិ ដើម្បីធានាឱ្យការគោរពច្បាប់ក្លាយជាមូលដ្ឋានសម្រាប់សន្តិភាព និងស្ថិរភាព។

លោក Syed Yousaf Raza Gilani បញ្ជាក់បន្ថែមថា ដំណើរវិវឌ្ឍន៍របស់កម្ពុជា គឺជាមេរៀនដ៏មានតម្លៃសម្រាប់ពិភពលោក។ បន្ទាប់ពីឆ្លងកាត់ជម្លោះអស់ជាច្រើនទសវត្សរ៍ មុនពេលសម្រេចបានសន្តិភាពតាមរយៈការផ្សះផ្សាជាតិនៅឆ្នាំ១៩៩៨ កម្ពុជាបានបង្ហាញថា សន្តិភាពផ្តល់នូវមូលដ្ឋានគ្រឹះសម្រាប់កំណើនសេដ្ឋកិច្ច ការអភិវឌ្ឍហេដ្ឋារចនាសម្ព័ន្ធ និងការកាត់បន្ថយភាពក្រីក្រ។

ជាមួយគ្នានេះ ប្រធានព្រឹទ្ធសភាប៉ាគីស្ថាន បានសង្កត់ធ្ងន់ថា ភ្នំពេញនាពេលបច្ចុប្បន្ន គឺជាការក្រើនរំឭកថា សង្គមមួយអាចស្តារឡើងវិញពីការបែកបាក់ តាមរយៈកិច្ចសន្ទនា ការផ្សះផ្សា និងការប្តេជ្ញាចិត្តឥតងាករេចំពោះឯកភាពជាតិ៕