(កំពង់ស្ពឺ)៖ មន្ត្រីឧទ្យានុរក្សនៃមន្ទីរបរិស្ថានខេត្តកំពង់ស្ពឺ នាថ្ងៃទី២៦ ខែសីហា ឆ្នាំ២០២៦ បានចុះប្រតិបត្តិការបង្ក្រាបការទន្ទ្រានដីព្រៃខុសច្បាប់ចំនួន២ករណីបន្ថែមទៀត នៅក្នុងឧទ្យានជាតិព្រះសុរាម្រិតកុសុមៈ «គិរីរម្យ» ក្នុងគោលបំណងការពារធនធានធម្មជាតិ និងអនុវត្តតាមនីតិវិធីច្បាប់។

ករណីទីមួយ មន្ត្រីឧទ្យានុរក្សបានចុះបង្ក្រាបការបោះបង្គោលហ៊ុមព័ទ្ធលើដីទ្រព្យសម្បត្តិរដ្ឋនៅចំណុចជិតស្ទឹងក្រឡាញ់ ភូមិទី៣ ឃុំយាយម៉ៅពេជ្រនិល ស្រុកភ្នំស្រួច។ ពេលទៅដល់ទីតាំង ក្រុមការងារបានប្រទះឃើញបង្គោលរបងថ្ម និងឈើចំនួន ១៥បង្គោល លើផ្ទៃដីប្រមាណ ០.២០ហិកតា។ មន្ត្រីឧទ្យានុរក្សបានដកកម្ទេចចោលនៅនឹងកន្លែង និងកំពុងបន្តស្រាវជ្រាវរកអ្នកប្រព្រឹត្តដើម្បីចាត់ការតាមនីតិវិធី។

ក្នុងថ្ងៃដដែលនោះ លោក ពៅ វុទ្ធី បានដឹកនាំមន្ត្រីឧទ្យានុរក្សចុះប្រតិបត្តិការបង្ក្រាបការកាប់ឆ្ការរុករានដីព្រៃនៅចំណុចអូរកសេះ ស្ថិតក្នុងឃុំចំបក់ ស្រុកភ្នំស្រួច។ នៅទីនោះ ក្រុមការងារបានរកឃើញការកាប់ឆ្ការព្រៃលើផ្ទៃដីទំហំប្រមាណ ០.៨០ហិកតា និងដាំដំណាំចេកចំនួន ៧៥ដើម។ ជាលទ្ធផល មន្ត្រីឧទ្យានុរក្សបានដកកម្ទេចចោលដំណាំ និងកំពុងបន្តស្រាវជ្រាវរកអ្នកប្រព្រឹត្តដើម្បីអនុវត្តតាមក្រមបរិស្ថាន និងធនធានធម្មជាតិ។

សូមបញ្ជាក់ថា ក្នុងរយៈពេលមួយសប្តាហ៍កន្លងមកនេះ មន្ត្រីឧទ្យានុរក្សបានចុះល្បាត និងបង្ក្រាបការទន្ទ្រានដីព្រៃខុសច្បាប់ ការបោះបង្គោលហ៊ុមព័ទ្ធ និងសំណង់ខុសច្បាប់បានចំនួន៧ករណីហើយ នៅក្នុងឧទ្យានជាតិព្រះសុរាម្រិតកុសុមៈ «គិរីរម្យ»។ សកម្មភាពទាំងនេះ គឺអនុវត្តតាមយុទ្ធសាស្ត្រចក្រាវិស័យបរិស្ថាន និងបទបញ្ជារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលក្រសួងបរិស្ថានកំពុងយកចិត្តទុកដាក់អនុវត្តវិធានការអាទិភាពចំនួន ៣ គឺការទប់ស្កាត់និងការពារ ការរៀបចំសណ្តាប់ធ្នាប់ និងការអភិវឌ្ឍប្រកបដោយចីរភាព៕