(បន្ទាយមានជ័យ)៖ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តបន្ទាយមានជ័យ សហការជាមួយរដ្ឋបាលស្រុកព្រះនេត្រព្រះ បានរៀបចំពិធីចែកវិញ្ញាបនបត្រសម្គាល់ម្ចាស់អចលនវត្ថុ (បណ្ណកម្មសិទ្ធិ) ចំនួន ២ ២៤៧ បណ្ណ ជូនដល់ប្រជាពលរដ្ឋក្នុងភូមិខ្វាវ និងភូមិត្បែង នៃឃុំបុស្បូវ ស្រុកព្រះនេត្រព្រះ។

ពិធីនេះ ត្រូវបានប្រារព្ធឡើងក្រោមអធិបតីភាពរបស់លោក អ៊ុំ រាត្រី អភិបាលខេត្តបន្ទាយមានជ័យ កាលពីព្រឹកថ្ងៃទី២៧ ខែសីហា ឆ្នាំ២០២៦។

លោក ហឿន វីរៈ អភិបាលស្រុកព្រះនេត្រព្រះ បានបញ្ជាក់ថា រដ្ឋបាលស្រុកបានសហការយ៉ាងជិតស្និទ្ធជាមួយមន្ទីរជំនាញ ដើម្បីសម្រេចបាននូវការវាស់វែង និងចុះបញ្ជីដីធ្លីជាប្រព័ន្ធទូទាំងស្រុក។ ការចែកបណ្ណកម្មសិទ្ធិនៅពេលនេះ រួមមានបណ្ណចំនួន ១ ១៤០ សម្រាប់ភូមិខ្វាវ និង ១ ១០៧ បណ្ណ សម្រាប់ភូមិត្បែង ដែលសរុបទាំងអស់ ២ ២៤៧ បណ្ណ គឺបានបញ្ចប់ទាំងស្រុងនូវការចែកបណ្ណកម្មសិទ្ធិនៅក្នុងឃុំបុស្បូវ។

ថ្លែងក្នុងឱកាសនោះ លោក អ៊ុំ រាត្រី បានគូសបញ្ជាក់ពីអត្ថប្រយោជន៍ដ៏ធំធេងនៃបណ្ណកម្មសិទ្ធិ ដែលជាការធានានូវភាពស្របច្បាប់នៃកម្មសិទ្ធិដីធ្លី កាត់បន្ថយវិវាទដីធ្លី សម្រួលដល់ការផ្ទេរសិទ្ធិ (ជាអំណោយ ឬការលក់) និងអាចប្រើប្រាស់ជាទ្រព្យបញ្ចាំនៅធនាគារ ដើម្បីពង្រីកមុខរបរ និងលើកកម្ពស់ជីវភាពគ្រួសារ។

លោកបានអំពាវនាវដល់ប្រជាពលរដ្ឋបន្តសហការជាមួយអាជ្ញាធរ និងក្រុមការងារវាស់វែង ដើម្បីកំណត់ព្រំប្រទល់ដីឱ្យបានច្បាស់លាស់ និងដោះស្រាយវិវាទដីធ្លីដោយសន្តិវិធី ដើម្បីឱ្យមន្ទីរជំនាញអាចចេញបណ្ណកម្មសិទ្ធិ ជូនបានទាន់ពេលវេលា។

សូមបញ្ជាក់ថា យុទ្ធនាការចែកវិញ្ញាបនបត្រសម្គាល់ម្ចាស់អចលនវត្ថុនេះ នឹងប្រព្រឹត្តទៅរយៈពេល ៧ ថ្ងៃ ចាប់ពីថ្ងៃទី២៧ ខែសីហា ដល់ថ្ងៃទី០២ ខែកញ្ញា ឆ្នាំ២០២៦។ បន្ទាប់ពីរយៈពេលកំណត់នេះ មន្ត្រីជំនាញនៃមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត នឹងបន្តចែកបណ្ណជូនប្រជាពលរដ្ឋនៅទីតាំងមន្ទីរផ្ទាល់ រៀងរាល់ម៉ោងធ្វើការ ដោយមិនកំណត់រយៈពេល៕