(ភ្នំពេញ)៖ ជំនាញលេចធ្លោជាងគេចំនួន២ ដែលសិស្សសម្រេចចិត្តជ្រើសរើសរៀនច្រើនជាងគេនៅវិទ្យាស្ថានជាតិពហុបច្ចេកទេសកម្ពុជា (NPIC) នោះគឺជំនាញមេកានិករថយន្ត និងជំនាញអគ្គិសនី។ នេះបើតាមលោក ស៊ុំ សុចិន្តា អ្នកនាំពាក្យ នៃវិទ្យាស្ថាន NPIC។

លោកបានបន្តថា ការជ្រើសរើសជំនាញសិក្សា គឺជាកត្តាសំខាន់មួយសម្រាប់យុវជន ព្រោះជំនាញដែលពួកគេសម្រេចចិត្តរៀន អាចក្លាយជាមូលដ្ឋាន សម្រាប់ការកសាងអនាគត និងការចាប់យកឱកាសការងារនាពេលខាងមុខ។ ក្នុងន័យនេះ វិទ្យាស្ថានជាតិពហុបច្ចេកទេសកម្ពុជា (NPIC) បានយកចិត្តទុកដាក់ខ្ពស់លើការជ្រើសរើស និងរៀបចំកម្មវិធីបណ្តុះបណ្តាលឱ្យស្របតាមតម្រូវការជាក់ស្តែងនៃទីផ្សារការងារ។

បើតាមអ្នកនាំពាក្យវិទ្យាស្ថានជាតិពហុបច្ចេកទេសកម្ពុជា មុននឹងសម្រេចផ្តល់ជំនាញសិក្សាដល់អ្នកសិក្សា វិទ្យាស្ថានតែងតែពិនិត្យ និងគិតគូរយ៉ាងហ្មត់ចត់ទៅលើតម្រូវការជំនាញ ដោយផ្តោតលើស្ថានភាពជាក់ស្តែងនៃទីផ្សារការងារ និងការប្រែប្រួលនៃបរិបទសង្គម និងសេដ្ឋកិច្ច។

លោកបានបញ្ជាក់ថា៖ «ជំនាញដែលវិទ្យាស្ថានកំពុងផ្តល់ជូន សុទ្ធតែជាជំនាញដែលបានជ្រើសរើសដោយផ្អែកលើការសិក្សាពីតម្រូវការទីផ្សារជាក់ស្តែង។ ទោះជាយ៉ាងណា តម្រូវការជំនាញអាចមានការប្រែប្រួលទៅតាមស្ថានភាពសង្គម និងសេដ្ឋកិច្ច ដូច្នេះការបណ្តុះបណ្តាលក៏ត្រូវមានការសម្របខ្លួនទៅតាមការវិវត្តនៃទីផ្សារផងដែរ»។

ក្រៅពីការជ្រើសរើសជំនាញដែលមានតម្រូវការទីផ្សារ ការសម្រេចចិត្តចុះឈ្មោះចូលរៀនរបស់យុវជន គឺជាកត្តាសំខាន់មួយផងដែរ។ លោក ស៊ុំ សុចិន្តា បានណែនាំថា សិស្សានុសិស្សគួរពិចារណាឱ្យបានច្បាស់ថា តើជំនាញណាដែលសមស្របនឹងចំណង់ចំណូលចិត្ត សមត្ថភាព និងគោលដៅអនាគតរបស់ខ្លួន។ ជម្រើសនេះមិនគួរធ្វើឡើងដោយគ្រាន់តែធ្វើតាមគ្នា ឬផ្អែកលើការពេញនិយមនោះទេ។

លោកបានឱ្យដឹងថា យុវជនគួរជ្រើសរើសជំនាញដែលខ្លួនអាចរៀនបានល្អ អាចអភិវឌ្ឍសមត្ថភាព និងយកចំណេះដឹងជំនាញនោះទៅប្រើប្រាស់សម្រាប់ការងារ និងការកសាងអនាគតរបស់ខ្លួន។

ជាមួយគ្នានេះអ្នកនាំពាក្យវិទ្យាស្ថាន NPIC បានលើកទឹកចិត្តដល់សិស្សានុសិស្សដែលទើបបញ្ចប់ថ្នាក់ទី១២ ឱ្យពិចារណាឱ្យបានហ្មត់ចត់មុនសម្រេចចិត្តជ្រើសរើស ជំនាញ ព្រោះការមានជំនាញច្បាស់លាស់ និងស្របតាមតម្រូវការទីផ្សារ អាចជួយឱ្យពួកគេមានមូលដ្ឋានកាន់តែរឹងមាំក្នុងការស្វែងរកការងារ និងអភិវឌ្ឍអាជីព នាពេលអនាគតបានល្អ៕