(វៀតណាម)៖ ដោយទទួលបានគោលការណ៍អនុញ្ញាតដ៏ខ្ពង់ខ្ពស់ពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា លោក ហួត ហាក់ រដ្ឋមន្ត្រីក្រសួងទេសចរណ៍ បានដឹកនាំគណៈប្រតិភូជាន់ខ្ពស់ក្រសួងទេសចរណ៍ និងវិស័យឯកជន ចូលរួមពិព័រណ៍ទេសចរណ៍អន្តរជាតិនាទីក្រុងហូជីមិញ លើកទី២០ (ITE-HCMC 2026) នៅទីក្រុងហូជីមិញ សាធារណរដ្ឋសង្គមនិយមវៀតណាម។

ក្នុងឱកាសនេះ លោក ហួត ហាក់ បានអញ្ជើញចូលរួមជាគណៈអធិបតីក្នុងពិធីបើកសម្ពោធជាផ្លូវការនៃពិព័រណ៍ ITE-HCMC 2026 ក្រោមអធិបតីភាពលោកស្រី Pham Thi Thanh Tra ឧបនាយករដ្ឋមន្ត្រីនៃសាធារណរដ្ឋសង្គមនិយមវៀតណាម ដោយមានការចូលរួមពីរដ្ឋមន្ត្រីទេសចរណ៍មកពីបណ្តាប្រទេសក្នុងតំបន់ អង្គទូត ថ្នាក់ដឹកនាំស្ថាប័នសាធារណៈ និងវិស័យឯកជន ព្រមទាំងភ្ញៀវជាតិ និងអន្តរជាតិជាច្រើនរូប។

ពិព័រណ៍ទេសចរណ៍អន្តរជាតិនាទីក្រុងហូជីមិញ (ITE-HCMC) ជាព្រឹត្តិការណ៍ទេសចរណ៍អន្តរជាតិដ៏សំខាន់មួយនៅតំបន់មេគង្គ និងជាវេទិកាយុទ្ធសាស្ត្រសម្រាប់ជំរុញកិច្ចសហប្រតិបត្តិការទេសចរណ៍ ការតភ្ជាប់អាជីវកម្ម និងការពង្រីកទីផ្សារទេសចរណ៍រវាងបណ្តាប្រទេសក្នុងតំបន់ និងដៃគូអន្តរជាតិ។

សម្រាប់ឆ្នាំ២០២៦នេះ ITE-HCMC បានប្រារព្ធខួបលើកទី២០ ក្រោមប្រធានបទ «ការតភ្ជាប់ទំនាក់ទំនងយ៉ាងរស់រវើក – គោលដៅទេសចរណ៍សកល» (Vibrant Connections – Global Destinations) ដោយមានអ្នកទិញអន្តរជាតិលំដាប់ខ្ពស់ជាង២៦០នាក់ មកពីប្រទេសជាង៤០ និងអ្នកលក់ ឬអ្នកតាំងពិព័រណ៍ជាង៥០០ក្រុមហ៊ុនមកពីប្រទេសវៀតណាម និងបណ្តាប្រទេសផ្សេងៗ។ ព្រឹត្តិការណ៍នេះក៏មានការកក់ជំនួបអាជីវកម្មជាមុនជាង២០,០០០ជំនួប និងអ្នកចូលរួមជាង៣០,០០០នាក់។

តាមរយៈការចូលរួមក្នុងពិធីបើកជាផ្លូវការនៃ ITE-HCMC 2026 កម្ពុជាបានបន្តបង្ហាញវត្តមានយ៉ាងសកម្មក្នុងការពង្រឹងកិច្ចសហប្រតិបត្តិការទេសចរណ៍ជាមួយវៀតណាម និងបណ្តាប្រទេសក្នុងតំបន់ ព្រមទាំងផ្សព្វផ្សាយសក្តានុពលទេសចរណ៍កម្ពុជា ពង្រីកទីផ្សារទេសចរណ៍អន្តរជាតិ និងទាក់ទាញភ្ញៀវទេសចរវៀតណាម និងអន្តរជាតិឱ្យមកទស្សនាព្រះរាជាណាចក្រកម្ពុជាកាន់តែច្រើន៕