(ព្រះសីហនុ)៖ មន្ទីរបរិស្ថានខេត្តព្រះសីហនុ បានឱ្យដឹងថា ពេលថ្មីៗនេះ មន្ត្រីឧទ្យានុរក្សបានសហការជាមួយអាជ្ញាធរមូលដ្ឋាន ចុះទប់ស្កាត់ និងបង្ក្រាបសកម្មភាពនៃការចូលទន្ទ្រានកាន់កាប់ដីរដ្ឋ សង់ខ្ទម និងបោះបង្គោលរបងហ៊ុំព័ទ្ធកាន់កាប់យកដីធ្វើជាកម្មសិទ្ធិដោយខុសច្បាប់។ សកម្មភាពនេះបានកើតឡើងនៅចំណុចអូរតាអឹង ភូមិ៣ សង្កាត់លេខ១ ក្រុងព្រះសីហនុ ខេត្តព្រះសីហនុ ដែលស្ថិតនៅក្នុងតំបន់ប្រើប្រាស់ច្រើនយ៉ាងព្រែកទឹកសាបក្បាលឆាយ។

មន្ទីរបរិស្ថានខេត្ត សូមបញ្ជាក់ជូនថា កាលពីថ្ងៃទី២៦ ខែសីហា ឆ្នាំ២០២៦ កម្លាំងមន្ត្រីឧទ្យានុរក្ស តំបន់ប្រើប្រាស់ច្រើនយ៉ាងព្រែកទឹកសាបក្បាលឆាយ នៃមន្ទីរបរិស្ថានខេត្តព្រះសីហនុ បានចុះល្បាតនៅចំណុចអូរតាអឹង ភូមិ៣ សង្កាត់លេខ១ ក្រុងព្រះសីហនុ ខេត្តព្រះសីហនុ និងបានរកឃើញថាមានការលួចសង់ខ្ទមថ្មីៗចំនួន ២២ខ្ទម ដាំដំណាំ និងហ៊ុំព័ទ្ធរបងដើម្បីធ្វើជាកម្មសិទ្ធិ ប៉ុន្តែពុំជួបជនសង្ស័យនោះទេ។

នៅថ្ងៃទី២៧ ខែសីហា ឆ្នាំ២០២៦ កម្លាំងមន្ត្រីឧទ្យានុរក្សបានសហការជាមួយកម្លាំងគណៈបញ្ជាការឯកភាពរដ្ឋបាលក្រុងព្រះសីហនុ បានចុះធ្វើការ ទប់ស្កាត់ និងរុះរើខ្ទមអនាធិបតេយ្យចំនួន ២២ខ្ទមខាងលើនេះ។ ក្រុមការងារមន្ទីរបរិស្ថានខេត្តព្រះសីហនុ កំពុងបន្តស្រាវជ្រាវ អង្កេត និងស្វែងរកមុខសញ្ញាជនប្រព្រឹត្តបទល្មើស ដើម្បីចាត់វិធានការតាមនីតិវិធីច្បាប់។

សូមបញ្ជាក់ថា ក្រមបរិស្ថាន និងធនធានធម្មជាតិ មាត្រា៨៥១ បទល្មើសធនធានធម្មជាតិថ្នាក់ទី៣ ក្នុងតំបន់ការពារធម្មជាតិ ចំណុច «ច» មានចែងពី កាប់គាស់ ឬរុករានដីព្រៃ ឬឆ្ការ ដុត ឬឈូសឆាយដីព្រៃយកមកធ្វើជាកម្មសិទ្ធិ ត្រូវមានទោសដាក់ពន្ធនាគារពី៥(ប្រាំ)ឆ្នាំ ទៅ ១០(ដប់)ឆ្នាំ។

មន្ទីរបរិស្ថានខេត្តព្រះសីហនុ សូមថ្លែងអំណរគុណចំពោះការចូលរួមពីគ្រប់ភាគីពាក់ព័ន្ធទាំងអស់ ដែលបានចូលរួមរាយការណ៍អំពីបទល្មើសធនធានធម្មជាតិ និងចូលរួមថែរក្សា ការពារ និងអភិរក្សធនធានធម្មជាតិ ក្នុងតំបន់ការពារធម្មជាតិ។ មន្ទីរបរិស្ថានខេត្តព្រះសីហនុ នឹងបន្តអនុវត្តវិធានការផ្លូវច្បាប់ឱ្យបានម៉ឺងម៉ាត់ដោយគ្មានការលើកលែងចំពោះជនទាំងឡាយណា ដែលប្រព្រឹត្តល្មើសកាប់ទន្ទ្រានដីរដ្ឋនៅតាមតំបន់ការពារធម្មជាតិ ដើម្បីធានាចីរភាពបរិស្ថាន៕