(ឧត្តរមានជ័យ)៖ លោកវរសេនីយ៍ទោ ជ័យ វាសនា អធិការនគរបាលស្រុកត្រពាំងប្រាសាទ ខេត្តឧត្តរមានជ័យ បានថ្លែងអំពាវនាវយ៉ាងទទូចដល់បងប្អូនប្រជាពលរដ្ឋដែលរស់នៅក្នុងមូលដ្ឋានទាំងអស់ សូមមេត្តារក្សាទុកលេខទូរស័ព្ទរបស់នគរបាលមូលដ្ឋានជាប់តាមខ្លួន ដើម្បីងាយស្រួលក្នុងការទំនាក់ទំនង រាយការណ៍ពីបញ្ហាផ្សេងៗ ឬស្នើសុំការអន្តរាគមន៍នៅពេលមានហេតុការណ៍ចាំបាច់។

តាមរយៈការបង្ហោះតាមបណ្តាញសង្គមហ្វេកប៊ុកផ្លូវការ នៅថ្ងៃទី២៨ ខែសីហា ឆ្នាំ២០២៦ លោកវរសេនីយ៍ទោ ជ័យ វាសនា បានលើកឡើងថា ប្រជាពលរដ្ឋគួរចាត់ទុកលេខទូរស័ព្ទរបស់នគរបាលមូលដ្ឋាន ប្រៀបដូចជា លេខទូរស័ព្ទរបស់សាច់ញាតិ ក្រុមគ្រួសារ និងមិត្តភក្តិ ដែលត្រូវរក្សាទុកជាប់ជានិច្ច ដើម្បីអាចទាក់ទងបានភ្លាមៗនៅពេលមានបញ្ហា ឬទុក្ខកង្វល់ណាមួយកើតឡើង។

លោកបានបន្តថា ការផ្តល់ព័ត៌មាន និងការទំនាក់ទំនងរបស់ប្រជាពលរដ្ឋទៅកាន់សមត្ថកិច្ចបានទាន់ពេលវេលា នឹងជួយឱ្យកម្លាំងនគរបាលអាចចុះស្រាវជ្រាវ ពិនិត្យ និងអន្តរាគមន៍បានឆាប់រហ័ស ដើម្បីដោះស្រាយបញ្ហា និងទប់ស្កាត់ហេតុការណ៍ដែលអាចប៉ះពាល់ដល់សន្តិសុខ សុវត្ថិភាព និងសណ្តាប់ធ្នាប់ក្នុងមូលដ្ឋាន។

លោកវរសេនីយ៍ទោ ជ័យ វាសនា បានសង្កត់ធ្ងន់ថា «បើមានបញ្ហា សូមកុំស្ទាក់ស្ទើរក្នុងការទាក់ទងមកសមត្ថកិច្ច» ព្រោះព័ត៌មានដែលប្រជាពលរដ្ឋផ្តល់ជូន ទោះតូចឬធំ ក៏អាចជួយឱ្យសមត្ថកិច្ចមានមូលដ្ឋានក្នុងការចុះអន្តរាគមន៍ និងដោះស្រាយបានទាន់ពេលវេលា។

ជាមួយគ្នានេះ លោកអធិការបានអំពាវនាវដល់ប្រជាពលរដ្ឋក្នុងស្រុកត្រពាំងប្រាសាទទាំងអស់ សូមបន្តចូលរួមសហការជាមួយកម្លាំងនគរបាល និងអាជ្ញាធរមូលដ្ឋាន ដោយចូលរួមរាយការណ៍ពីសកម្មភាព ឬហេតុការណ៍គួរឱ្យសង្ស័យនានា ដើម្បីរួមគ្នារក្សាសន្តិសុខ សុវត្ថិភាព និងសណ្តាប់ធ្នាប់សាធារណៈនៅក្នុងមូលដ្ឋាន។

លោកអធិការបញ្ជាក់ថា សន្តិសុខ និងសុវត្ថិភាពរបស់ប្រជាពលរដ្ឋ គឺជាការងាររួមរបស់សមត្ថកិច្ច និងប្រជាពលរដ្ឋ ហើយកិច្ចសហការដ៏ល្អរវាងភាគីទាំងពីរ នឹងរួមចំណែកធ្វើឱ្យមូលដ្ឋានមានសុខសន្តិភាព សុវត្ថិភាព និងភាពកក់ក្តៅកាន់តែប្រសើរ សូមធ្វើការទំនាក់ទំនងលេខប្រចាំបញ្ជា២៤ម៉ោង ០៩៧ ៧៧៨០២១៨៕