(ភ្នំពេញ)៖ សន្និសីទប្រធានសភាអន្តរជាតិលើកទី២ បានបិទបញ្ចប់ដោយជោគជ័យ នៅថ្ងៃទី២៨ ខែសីហានេះ បន្ទាប់ពីអង្គប្រជុំបានអនុម័តជាផ្លូវការនូវ «សេចក្តីប្រកាសក្រុងភ្នំពេញ» ដើម្បីកំណត់ទិសដៅ និងអាទិភាពរួមក្នុងការដោះស្រាយវិបត្តិសកលតាមរយៈកិច្ចសហប្រតិបត្តិការអន្តរសភា។

ពិធីបិទសន្និសីទបានរៀបចំឡើងយ៉ាងអធិកអធម ក្រោមអធិបតីភាពដ៏ខ្ពង់ខ្ពស់ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានសន្និសីទ។

នៅក្នុងពិធីបិទសន្និសីទ សម្តេចប្រធានរដ្ឋសភា បានគូសបញ្ជាក់ពីសារៈសំខាន់នៃការអនុវត្តសេចក្តីប្រកាសនេះ ដោយបានថ្លែងថា៖ «ការប្តេជ្ញាចិត្ត និងសំឡេងរួមគ្នានៃសន្និសីទនេះ ត្រូវបានស្តែងចេញយ៉ាងច្បាស់នៅក្នុង "សេចក្តីប្រកាសក្រុងភ្នំពេញ" ដែលយើងទើបតែបានអនុម័ត។ ជាចុងក្រោយយើងត្រូវតែបម្លែងការប្តេជ្ញាចិត្តនយោបាយ
របស់យើងឱ្យទៅជាលទ្ធផលជាក់ស្តែង តាមរយៈការសម្របសម្រួលជិតស្និទ្ធ និងមានប្រសិទ្ធភាពរវាងអំណាចនីតិប្រតិបត្តិ និងនីតិបញ្ញត្តិ»។

សេចក្តីប្រកាសក្រុងភ្នំពេញ បានផ្តោតលើខ្លឹមសារគន្លឹះសំខាន់ៗ ដោយបានបញ្ជាក់សារជាថ្មីអំពីកាតព្វកិច្ចដោះស្រាយជម្លោះដោយសន្តិវិធីតាមរយៈការទូត និងកិច្ចសន្ទនា ស្របតាមច្បាប់អន្តរជាតិ។ ជាមួយគ្នានេះ អង្គសន្និសីទបានអំពាវនាវឱ្យបញ្ឈប់ការយកពាណិជ្ជកម្ម បច្ចេកវិទ្យា និងខ្សែច្រវាក់ផ្គត់ផ្គង់ជាដើម ធ្វើជា «អាវុធ» ដែលបង្កការបែកបាក់ និងគំរាមកំហែងដល់សន្តិភាព និងវិបុលភាពសកល ព្រមទាំងបានជំរុញប្រព័ន្ធពហុភាគីនិយមបើកចំហ បរិយាបន្ន និងមានប្រសិទ្ធភាព ដើរទន្ទឹមគ្នានឹងការពន្លឿនការសម្រេចគោលដៅអភិវឌ្ឍន៍ប្រកបដោយចីរភាព (SDGs) របស់អង្គការសហប្រជាជាតិ។

ស្របពេលជាមួយគ្នានេះ កម្ពុជាបានប្រកាសផ្ទេរតួនាទីធ្វើជាម្ចាស់ផ្ទះរៀបចំសន្និសីទប្រធានសភាអន្តរជាតិលើកទី៣ ជូនទៅព្រឹទ្ធសភានៃសាធារណរដ្ឋឥណ្ឌូនេស៊ី។ ក្នុងឱកាសនោះ សម្តេចមហារដ្ឋសភាធិការធិបតី ឃួន សុដារី បានថ្លែងអបអរសាទរ និងសម្តែងនូវជំនឿជាក់យ៉ាងមុតមាំចំពោះព្រឹទ្ធសភានៃសាធារណរដ្ឋឥណ្ឌូនេស៊ី ដែលបានទទួលធ្វើជាប្រធានរៀបចំសន្និសីទប្រធានសភាអន្តរជាតិលើកទី៣ ដោយសម្តេចបានបញ្ជាក់ថា «យើងរង់ចាំដោយក្តីរីករាយក្នុងការជួបជុំគ្នាសារជាថ្មីនៅប្រទេសឥណ្ឌូនេស៊ី សម្រាប់សន្និសីទដ៏មានអត្ថន័យ និងជោគជ័យថ្មីៗបន្ថែមទៀត»៕