(ហ្សាការតា)៖ ប៉ូលិសឥណ្ឌូណេស៉ីបានឃាត់ខ្លួនមនុស្សជាង ៣០០នាក់ និងបានកំណត់អត្តសញ្ញាណជនសង្ស័យរាប់សិបនាក់ បន្ទាប់ពីការតវ៉ាប្រឆាំងរដ្ឋាភិបាលបានប្រែក្លាយទៅជាអំពើកុបកម្មហិង្សានៅរដ្ឋធានីហ្សាការតា កាលពីយប់រំលងអធ្រាត្រឈានចូលថ្ងៃសុក្រនេះ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី២៨ ខែសីហា ឆ្នាំ២០២៦។

អ្នកនាំពាក្យប៉ូលិសរដ្ឋធានីហ្សាការតា លោក Budi Hermanto បានឱ្យដឹងថាមនុស្សសរុប ៣២២នាក់ (ក្នុងនោះមានអនីតិជន ១៦០នាក់) ត្រូវបានឃាត់ខ្លួនដើម្បីសាកសួរ ហើយមនុស្ស ៤៥នាក់ត្រូវបានចោទប្រកាន់ជាផ្លូវការពីបទបំផ្លិចបំផ្លាញសម្បត្តិសាធារណៈ និងបង្កអំពើហិង្សា។ ក្រុមបាតុករបានដុតបំផ្លាញប៉ុស្តិ៍ប៉ូលិស ម៉ូតូ និងបានគប់ដុំថ្មលើសមត្ថកិច្ច ដែលបង្ខំឱ្យកម្លាំងប៉ូលិសប្រើប្រាស់ឧស្ម័នបង្ហូរទឹកភ្នែក និងរថយន្តបាញ់ទឹកដើម្បីបំបែកហ្វូងមនុស្ស។ ក្នុងហេតុការណ៍នោះ បុរសម្នាក់បានស្លាប់នៅឯមន្ទីរពេទ្យបន្ទាប់ពីសន្លប់នៅកន្លែងកើតហេតុ។

គួរបញ្ជាក់ថា ការតវ៉ានេះធ្វើឡើងចំពេលដែលប្រធានាធិបតីឥណ្ឌូណេស៉ី លោក ប្រាបូវ៉ូ ស៊ូប៊ីយ៉ាន់តូ (Prabowo Subianto) កំពុងរងសម្ពាធសេដ្ឋកិច្ចយ៉ាងខ្លាំង ខណៈដែលប្រជាប្រិយភាព និងអត្រាគាំទ្ររបស់លោកបានធ្លាក់ចុះមកនៅត្រឹម ៣៨ភាគរយ នៅក្នុងការស្ទង់មតិចុងក្រោយនេះ៕