(ភ្នំពេញ)៖ អ្នកតាមដានស្ថានភាពនយោបាយនៅកម្ពុជា លោក យឿន យឿត បានមើលឃើញថា សន្និសីទប្រធានសភា នៃអន្តរសភាលើកទី២ ដែលកម្ពុជាបានធ្វើជាម្ចាស់ផ្ទះនោះ បានធ្វើឲ្យប្រទេសកម្ពុជា កាន់តែមានកិត្យានុភាពខ្ពស់ត្រដែតលើឆាក់អន្តរជាតិ និងចំណេញទាំងផ្នែកការទូត និងសេដ្ឋកិច្ច។

លោក យឿន យឿត បានបង្ហាញនូវការអបអរសាទរ និងមានមោទនភាពដ៏ធំធេងមួយសម្រាប់ប្រទេសកម្ពុជា ដែលបានបង្ហាញពីសមត្ថភាព និងតួនាទីយ៉ាងសំខាន់នៅលើឆាកអន្តរជាតិ ខណៈការរៀបចំកិច្ចប្រជុំកម្រិតតំបន់ និងអន្តរជាតិបានជោគជ័យ បញ្ជាក់ពីស្ថិរភាពនយោបាយ និងការរីកចម្រើនរបស់ប្រទេសកម្ពុជាទាំងមូល។

លោកបានលើកឡើងថា សន្និសីទប្រធានសភានៃអន្តរសភាលើកទី២ (ISC-2) ដែលកម្ពុជាធ្វើជាម្ចាស់ផ្ទះពីថ្ងៃទី២៦ ដល់២៨ ខែសីហា ឆ្នាំ២០២៦ ក្រោមការដឹកនាំរបស់សម្តេចតេជោ ហ៊ុន សែន ប្រធានព្រឹទ្ធសភា បានបិទបញ្ចប់ទៅដោយជោគជ័យ និងទទួលបានផ្លែផ្កាយ៉ាងត្រចះត្រចង់។ អ្នកតាមដានស្ថានភាពនយោបាយរូបនេះបាន កត់សម្កាល់ឃើញថា ផលចំណេញដែលកម្ពុជាទទួលបានពីសន្និសីទនេះគឺ មានចំនួន៣ចំណុច ដោយក្នុងនោះរួមមាន៖

១. ការអនុម័តសេចក្តីថ្លែងការណ៍រួម៖ បណ្តាប្រទេសមាជិកប្រមាណ២០ប្រទេសបានឯកភាពគ្នាពង្រឹងយន្តការការទូតសភា ដើម្បីដោះស្រាយវិបត្តិសកល។ ការចងក្រងបណ្តាញសន្តិភាព, បង្កើតសម្ព័ន្ធភាពរឹងមាំរវាងថ្នាក់ដឹកនាំសភាជុំវិញពិភពលោក ដើម្បីលើកកម្ពស់ការគោរពច្បាប់អន្តរជាតិ និងសិទ្ធិមនុស្ស និងការចែករំលែកបទពិសោធន៍កម្ពុជា ដោយកម្ពុជាបានបង្ហាញពីជោគជ័យនៃ «នយោបាយឈ្នះ-ឈ្នះ» និងការផ្សះផ្សាជាតិ ដែលជាគំរូជាក់ស្តែងដល់ប្រទេសដែលមានជម្លោះ។

២.ផលចំណេញផ្នែកការទូតនិងសេដ្ឋកិច្ច ព្រឹត្តិការណ៍ជាប្រវត្តិសាស្ត្រនេះបានផ្តល់ផលប្រយោជន៍ដ៏មហាសាលដល់ប្រទេសកម្ពុជានិងប្រជាពលរដ្ឋខ្មែរ ដោយបានលើកកម្ពស់កិត្យានុភាពជាតិខ្ពស់ត្រដែតលើឆាកអន្តរជាតិ បញ្ជាក់ថាទោះជាប្រទេសតូច ប៉ុន្តែកម្ពុជាមានសមត្ថភាពខ្ពស់ក្នុងការដឹកនាំកិច្ចប្រជុំកម្រិតពិភពលោក។ ផ្នែកយុទ្ធសាស្ត្រការទូតសេដ្ឋកិច្ច គឺបើកឱកាសទាក់ទាញវិនិយោគិនបរទេសតាមរយៈការបង្ហាញពីស្ថិរភាពនយោបាយនិងបរិយាកាសកិច្ចសហប្រតិបត្តិការសេរី។ សេដ្ឋកិច្ចក្នុងស្រុកដោយជំរុញវិស័យទេសចរណ៍ សណ្ឋាគារ ដឹកជញ្ជូន និងសេវាកម្មក្នុងរាជធានីភ្នំពេញតាមរយៈការធ្វើដំណើរ និងស្នាក់នៅរបស់គណៈប្រតិភូអន្តរជាតិជាច្រើនរូបជាដើម។

និងទី៣. មតិយោបល់របស់ប្រជាពលរដ្ឋ និង អន្តរជាតិ
ការឆ្លើយតបជុំវិញព្រឹត្តិការណ៍នេះមានភាពវិជ្ជមានខ្លាំង ដោយក្នុងនោះមតិអន្តរជាតិ៖ថ្នាក់ដឹកនាំសភាបរទេសបានកោតសរសើរយ៉ាងខ្លាំងចំពោះការបដិសណ្ឋារកិច្ចនិងការរៀបចំប្រកបដោយវិជ្ជាជីវៈខ្ពស់របស់កម្ពុជា ព្រមទាំងគាំទ្រគំនិតផ្តួចផ្តើមសន្តិភាពរបស់សម្តេចតេជោ ខណៈមតិប្រជាពលរដ្ឋ ដោយប្រជាជនខ្មែរសម្តែងការអបអរសាទរ និងមានមោទនភាពជាតិជាពន់ពេក ដែលបានឃើញទង់ជាតិខ្ពស់ត្រដែត និងមានការផ្សាយផ្ទាល់លទ្ធផលជាផ្លូវការទូទាំងប្រទេស គឺជារបៀបវារៈការទូតសភាដ៏មុតស្រួចមួយ ដើម្បីប្រាប់ទៅកាន់ពិភពលោកអំពីការឈ្លានពានខុសច្បាប់របស់យោធាថៃមកលើទឹកដីកម្ពុជា និងស្វែងរកការគាំទ្រពីអន្តរជាតិក្នុងការដោះស្រាយជម្លោះនេះដោយយុត្តិធម៌ និងសន្តិវិធីជាដើម៕