(ភ្នំពេញ)៖ ដោយមានការឧបត្ថម្ភពីភេសជ្ជៈ Pocari Sweat ក្រុមបាល់ទាត់ FCA ក្រោមការដឹកនាំដោយលោក លឹម ជាវុត្ថា អគ្គនាយកបណ្តាញព័ត៌មាន Fresh News កម្មវិធីផ្ញើសារ CoolApp និងកម្មវិធីឆ្លាតវៃ Fresh AI នៅល្ងាចថ្ងៃទី២៨ ខែសីហា ឆ្នាំ២០២៦ បានប្រកួតមិត្តភាពជាមួយក្រុមបាល់ទាត់ Veteran FT ដើម្បីជំរុញស្មារតីស្រឡាញ់សុខភាព តាមរយៈការលេងកីឡា និងការហាត់ប្រាណ។

លើវាលស្មៅសប្បនិម្មិតរយៈពេល២ម៉ោង កីឡាករទាំងពីរក្រុម បានប្រកួតដោយការយោគយល់ អធ្យាស្រ័យគ្នាទៅវិញទៅមក មិនមានការប៉ះទង្គិចគ្នា ធ្វើឱ្យកីឡាករណាម្នាក់រងរបួសនោះឡើយ។ ជាលទ្ធផលក្រុមបាល់ទាត់ FCA បានយកឈ្នះ ក្រុមបាល់ទាត់ Veteran FT ដោយលទ្ធផល ១០:៦។

គោលបំណងនៃការប្រកួតបាល់ទាត់នេះ ដើម្បីតែមិត្តភាព និងសុខភាពប៉ុណ្ណោះ ហើយការប្រកួតនេះគ្មានអ្នកឈ្នះ ក៏គ្មានអ្នកចាញ់ដែរ គឺឈ្នះទាំងអស់គ្នា ឈ្នះមិត្តភាព និងឈ្នះសុខភាព។

ជាមួយគ្នានេះ សូមអំពាវនាវដល់បងប្អូនប្រជាពលរដ្ឋ ពិសេសបងប្អូនអ្នកសារព័ត៌មាន ដែលមានសុខភាពមិនសូវល្អ សូមនាំគ្នាលេងកីឡាឱ្យបានគ្រប់ៗគ្នា ព្រោះមានសុខភាពល្អ ទើបមានអ្វីៗតាមក្រោយ។

សូមជម្រាបថា ក្រុមបាល់ទាត់ FCA តែងតែប្រកួតមិត្តភាពជាញឹកញាប់ជាមួយស្ថាប័នព័ត៌មានដូចគ្នា និងស្ថាប័នផ្សេងទៀត ដូចជា ស្ថានីយទូរទស្សន៍ជាតិកម្ពុជា, អង្គភាពសារព័ត៌មាន AMS, កងរាជអាវុធហត្ថរាជធានីភ្នំពេញ ក្រុមបាល់ទាត់ក្រុមមន្ត្រីនៃក្រសួងសេដ្ឋកិច្ច និងក្រុមបាល់ទាត់ Veteran FTជាដើម៕