(ព្រៃវែង)៖ លោក សួន សុម៉ាលីន អភិបាលខេត្តព្រៃវែង បានគូសបញ្ជាក់ថា ការបង្កើត និងពង្រឹងយន្តការច្រកចេញចូលតែមួយ គឺជាជំហានកំណែទម្រង់ដ៏សំខាន់ និងជាប្រវត្តិសាស្ត្រនៃការកែទម្រង់ការគ្រប់គ្រងរដ្ឋបាលថ្នាក់ក្រោមជាតិរបស់រាជរដ្ឋាភិបាលកម្ពុជា ក្នុងការបង្ខិតសេវាសាធារណៈជូនប្រជាពលរដ្ឋ ធានានូវតម្លាភាព កាត់បន្ថយនីតិវិធីស្មុគស្មាញ និងលុបបំបាត់បាតុភូតអសកម្មនានា។

លោកគូសបញ្ជាក់បែបនេះធ្វើឡើងក្នុងឱកាសដែល លោក អភិបាលខេត្តនិង លោក តូច សេដ្ឋា សមាជិកក្រុមប្រឹក្សាខេត្ត តំណាងស្បោង សារ៉ាត ប្រធានក្រុមប្រឹក្សាខេត្តអញ្ជើញបិទសិក្ខាសាលាផ្សព្វផ្សាយពិគ្រោះយោបល់លើការងារផ្តល់សេវានៅអង្គភាពច្រកចេញចូលតែមួយខេត្ត និងការិយាល័យច្រកចេញចូលតែមួយក្រុង ស្រុក និងយន្តការច្រកចេញចូលតែមួយឃុំសង្កាត់នៅថ្ងៃទី២ខែកញ្ញាឆ្នាំ២០២៦ ។

ក្នុងពិធីនោះ អង្គសិក្ខាសាលាទាំងមូលបានពិភាក្សាយ៉ាងផុសផុល និងស៊ីជម្រៅ លើការងាររៀបចំ និងប្រតិបត្តិការរបស់អង្គភាពច្រកចេញចូលតែមួយរដ្ឋបាលខេត្ត ការិយាល័យច្រកចេញចូលតែមួយរដ្ឋបាលក្រុង-ស្រុក និងយន្តការច្រកចេញចូលតែមួយនៅថ្នាក់ឃុំ-សង្កាត់។

​ដើម្បីបន្តលើកកម្ពស់គុណភាពសេវា លោក សួន សុម៉ាលីន បានដាក់ចេញនូវទិសដៅអនុវត្តសំខាន់ៗចំនួន ៤ ចំណុច រួមមាន៖ ទី១. ពង្រឹងសមត្ថភាព និងវិជ្ជាជីវៈមន្ត្រី តាមរយៈវគ្គបណ្តុះបណ្តាលជំនាញឌីជីថល និងក្រមសីលធម៌អាជីព។ ទី២. បង្កើនការផ្សព្វផ្សាយ និងអប់រំសាធារណៈ ឲ្យប្រជាពលរដ្ឋយល់ដឹងច្បាស់ពីសិទ្ធិ តម្លៃសេវា រយៈពេល និងរបៀបស្នើសុំសេវាតាមអនឡាញ។ ទី៣. ពង្រឹងយន្តការសម្របសម្រួល និងកាត់បន្ថយនីតិវិធី ដោយរៀបចំប្រជុំដោះស្រាយបញ្ហាប្រឈមជាទៀងទាត់។ ទី៤. វិនិយោគលើហេដ្ឋារចនាសម្ព័ន្ធឌីជីថល កែលម្អប្រព័ន្ធអ៊ីនធឺណិត និងបំពាក់ឧបករណ៍បច្ចេកវិទ្យុបនីយកម្មបន្ថែម។

លោកអភិបាលខេត្តមានជំនឿយ៉ាងមុតមាំថា តាមរយៈស្មារតីទទួលខុសត្រូវខ្ពស់ និងកិច្ចសហការជិតស្និទ្ធរវាងគ្រប់ភាគីពាក់ព័ន្ធ ការផ្តល់សេវាសាធារណៈតាមយន្តការច្រកចេញចូលតែមួយនៅក្នុងខេត្តព្រៃវែង នឹងកាន់តែមានភាពរលូន ប្រកបដោយតម្លាភាព ប្រសិទ្ធភាព និងឆ្លើយតបបានយ៉ាងពេញលេញទៅនឹងសេចក្តីត្រូវការរបស់បងប្អូនប្រជាពលរដ្ឋ៕