(ឌីលី-ទីម័រឡេស្តេ)៖ នៅថ្ងៃទី៤ ខែសីហា ឆ្នាំ២០២៦ លោកបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានដឹកនាំគណៈប្រតិភូកម្ពុជា ចូលរួមកិច្ចប្រជុំថ្នាក់រដ្ឋមន្ត្រីនៃក្រុមប្រទេសអភិវឌ្ឍន៍តិចតួច (LDC) ស្តីពីការប្រែប្រួលអាកាសធាតុ។

ក្នុងឱកាសនោះ លោករដ្ឋមន្ត្រី អ៊ាង សុផល្លែត បានថ្លែងសន្ទរកថាគន្លឹះ ដោយបានគូសបញ្ជាក់ពីផលប៉ះពាល់ធ្ងន់ធ្ងរនៃការប្រែប្រួលអាកាសធាតុមកលើវិស័យសំខាន់ៗរបស់កម្ពុជា រួមមានកសិកម្ម សុខាភិបាល បរិស្ថាន និងធនធានធម្មជាតិ ដែលបានជះឥទ្ធិពលដល់សេដ្ឋកិច្ច និងសង្គមជាតិ។

លោករដ្ឋមន្ត្រីបានសង្កត់ធ្ងន់ថា កម្ពុជាបានប្តេជ្ញាចិត្តយ៉ាងមុតមាំជាមួយសហគមន៍អន្តរជាតិ តាមរយៈការដាក់ចេញនូវផែនការជាតិរួមចំណែកការឆ្លើយតបការប្រែប្រួលអាកាសធាតុដំណាក់កាលទី៣ (NDC 3.0)។ ផែនការនេះកំណត់គោលដៅកាត់បន្ថយការបញ្ចេញឧស្ម័នផ្ទះកញ្ចក់រហូតដល់ ៥៥% ត្រឹមឆ្នាំ២០៣៥ និងឆ្ពោះទៅរកគោលដៅកម្ពុជាជាប្រទេសអព្យាក្រឹតកាបូនត្រឹមឆ្នាំ២០៥០។

លោករដ្ឋមន្ត្រី អ៊ាង សុផល្លែត ក៏បានអំពាវនាវឱ្យសហគមន៍អន្តរជាតិ រក្សាសីតុណ្ហភាពពិភពលោកត្រឹម ១.៥ អង្សាសេ ស្របតាមឆន្ទៈនៃកិច្ចព្រមព្រៀងទីក្រុងប៉ារីស។

ក្នុងន័យនេះ លោករដ្ឋមន្ត្រីបានអំពាវនាវជាពិសេសដល់បណ្តាប្រទេសអភិវឌ្ឍន៍ ឱ្យបង្កើននូវកញ្ចប់ថវិកាសម្រាប់ការដោះស្រាយ និងឆ្លើយតបទៅនឹងផលប៉ះពាល់នៃការប្រែប្រួលអាកាសធាតុ តាមការស្នើសុំរបស់ប្រទេសដែលមានការអភិវឌ្ឍន៍តិចតួច (LDC)។

កម្ពុជាក៏បានចូលរួមរៀបចំសេចក្តីប្រកាសរួមទីក្រុងឌីលី ឆ្នាំ២០២៦ ស្តីពីការប្រែប្រួលអាកាសធាតុ ដែលជាការបង្ហាញជំហររួមរបស់ LDCs ឆ្ពោះទៅកាន់ COP31។

សេចក្តីប្រកាសនេះអំពាវនាវឱ្យមានសកម្មភាពអាកាសធាតុដែលកាន់តែរឹងមាំ និងលឿនជាងមុន ដើម្បីសម្រេចបានគោលដៅ ១.៥°C ព្រមទាំងពង្រឹងកិច្ចសហប្រតិបត្តិការអន្តរជាតិ និងតស៊ូមតិសម្រាប់ការបង្កើនហិរញ្ញប្បទានអាកាសធាតុ ជាពិសេសសម្រាប់ការសម្របខ្លួន ការផ្ទេរបច្ចេកវិទ្យា ការកសាងសមត្ថភាព និងការអនុវត្តប្រកបដោយប្រសិទ្ធភាពនៃ NDCs និង NAPs។ ដើម្បីធានាថា ភាពងាយរងគ្រោះជាក់លាក់ និងតម្រូវការអភិវឌ្ឍន៍របស់ LDCs ត្រូវបានឆ្លុះបញ្ចាំងយ៉ាងពេញលេញនៅក្នុងលទ្ធផលនៃកិច្ចប្រជុំ COP31 ផងដែរ៕