(ភ្នំពេញ)៖ ក្រុមការងារអធិការកិច្ច នៃអគ្គនាយកដ្ឋានគាំពារបរិស្ថានដឹកនាំដោយលោក ចាប យុធី អនុប្រធាននាយកដ្ឋាន ដោយមានការចូលរួមពីមន្ទីរបរិស្ថានរាជធានីភ្នំពេញ នាថ្ងៃទី២ ខែកញ្ញា ឆ្នាំ២០២៦ បានចុះត្រួតពិនិត្យនៅទីតាំងក្រុមហ៊ុន XIN HAOWEI CLOTHING (CAMBODIA) CO., LTD. ស្ថិតនៅភូមិសំរោងទាវ សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ដែលត្រូវបានប្រជាពលរដ្ឋប្តឹងតវ៉ាថា បានបង្កផលប៉ះពាល់ដល់ការរស់ ដោយសារផ្សែងនិងក្លិនឈ្ងៀម ចេញឡដុតចំហាយទឹក។

ក្រុមការងារបានពិនិត្យឃើញថា កន្លងមកក្រុមហ៊ុនបានប្រើប្រាស់អុស សម្រាប់ដុតយកចំហាយ ប៉ុន្ដែឡចំហាយ ជាប្រភេទឡធម្មតា ពុំមានប្រព័ន្ធសម្រាប់សម្អាតផ្សែងនោះទេ។ ក្រុមការងារបានធ្វើការត្រួតពិនិត្យគុណភាពខ្យល់ចេញពីបំពង់ផ្សែងឡចំហាយបឋម ឃើញថាលទ្ធផលលើសកម្រិតស្ដង់ដារ។ ក្រុមហ៊ុន ពុំមានកិច្ចសន្យាការពារបរិស្ថាន និងលិខិតអនុញ្ញាតបញ្ចេញសំណល់ពាក់ព័ន្ធនោះទេ។

ក្រសួងបរិស្ថានបានចាត់វិធានការចំពោះក្រុមហ៊ុនរួមមាន៖

ទី១៖ តម្រូវឱ្យក្រុមហ៊ុនផ្លាស់ប្ដូរការប្រើប្រាស់ឡចំហាយដុតអុស ទៅប្រើប្រាស់ឡចំហាយដើរដោយអគ្គិសនីវិញឱ្យបានរួចរាល់ក្នុងរយៈពេល ៤៥ថ្ងៃ គិតចាប់ពីថ្ងៃចុះពិនិត្យនេះតទៅ។
ទី២៖ ត្រូវធ្វើការបិទភ្ជិតរោងនៅទីតាំងឡចំហាយ ដើម្បីការពារកុំឱ្យមានផ្សែងភាយចេញ។
ទី៣៖ ត្រូវរៀបចំរោងទុកដាក់ និងបែងចែកទៅតាមប្រភេទសំណល់រឹង ឱ្យបានត្រឹមត្រូវតាមលក្ខណៈបច្ចេកទេស។
និងទី៤៖ ត្រូវស្នើសុំលិខិតអនុញ្ញាតបញ្ចេញសំណល់ពាក់ព័ន្ធ ពីក្រសួងបរិស្ថាន។ នៅក្នុងការអនុវត្តវិធានការលើក្រុមហ៊ុន មន្ទីរបរិស្ថានខេត្ត និងអាជ្ញាធរមូលដ្ឋាន បន្ដតាមដានការអនុវត្តរបស់ក្រុមហ៊ុន៕