(ព្រៃវែង)៖ នៅថ្ងៃទី៦ ខែកញ្ញា ឆ្នាំ២០២៦ ព្រះចៅអធិការ ព្រះសង្ឃ លោកអាចារ្យ គណៈកម្មការ និងពុទ្ធបរិស័ទចំណុះជើងវត្តសំសមី រៀបចំពិធីបុណ្យ សលាកភត្តប្រគេនទេយ្យទាន និងបច្ច័យបួនដល់ព្រះសង្ឃចំនួន ២៥០អង្គ ដែលមានការអញ្ជើញចូលរួមពី លោកស្រី ហ៊ន់ សុធារី អភិបាលរងខេត្ត ដំណាង លោក សួន សុម៉ាលីន អភិបាលខេត្តព្រៃវែង ស្ថិតនៅភូមិលេខ០៣ សង្កាត់កំពង់លាវ ក្រុងព្រៃវែង ខេត្តព្រៃវែង។

ព្រះគ្រូចៅអធិការវត្តមានសង្ឃដីការថា ពិធីបុណ្យសលាកភត្ត គឺជាទានដែលទាយកទាយិកាប្រគេនដល់ព្រះសង្ឃដោយចាប់ស្លាក (ចាប់ឆ្នោត) ដោយមិនបានកំណត់ចំពោះព្រះអង្គណាមួយឡើយ គឺព្រះសង្ឃអង្គណាបានស្លាកលេខអ្វី ក៏ទទួលវត្ថុទានតាមលេខនោះ។ ពិធីនេះបង្កើតឡើងក្នុងសម័យពុទ្ធកាល ដើម្បីរៀបចំការប្រគេនទានដោយស្មើភាពគ្នា មិនឱ្យមានការលំអៀងទៅលើព្រះសង្ឃអង្គណាមួយ។

លោកព្រះចៅអធិការ មានសង្ឃដីការថាបន្តថា គោលបំណង រក្សាភក្តីភាពនិងសេចក្តីស្មើភាព ដើម្បីចៀសវាងការលំអៀងក្នុងការប្រគេន ដោយមិនបែងចែកថាព្រះសង្ឃអង្គណាសក្ដិសមជាង ឬជាទីស្រឡាញ់ជាង។ ដើរតាមគំរូនិងការអនុញ្ញាតរបស់ព្រះសង្ឃក្នុងសម័យពុទ្ធកាល នៅពេលដែលមានទាយកចង់ថ្វាយទានដល់ព្រះសង្ឃទូទៅដោយមិនចាត់ចែងឬរើសអើង និងជួយឱ្យព្រះសង្ឃគ្រប់អង្គទទួលបានបច្ច័យ និងវត្ថុទានដូចៗគ្នា ព្រមទាំងបង្ហាញពីសទ្ធាជ្រះថ្លារបស់ពុទ្ធបរិស័ទក្នុងការទ្រទ្រង់ព្រះពុទ្ធសាសនា។

ការធ្វើទានដោយសលាកភត្តទទួលបានអានិសង្ឃដ៏ច្រើនក្រៃលែង ព្រោះជាទានដែលមិនមានការរើសអើង និងធ្វើឡើងដោយចិត្តបរិសុទ្ធ។ ដោយសារការចាប់ស្លាកធ្វើឡើងដោយចៃដន្យ ធ្វើឱ្យទាននោះមិនជាប់ពាក់ព័ន្ធនឹងលោភៈ ទោសៈ ឬមោហៈ ក្នុងការរើសព្រះសង្ឃ៕