អធិការស្រុកឈូក ខេត្តកំពត និងអធិការរងទទួលផែនសណ្តាប់ធ្នាប់ ត្រូវដកបញ្ឈរជើងព្រោះតែខ្ជីខ្ជារឿងគ្រោះថ្នាក់ចរាចរណ៍, រថយន្តខុសបែរជាអះអាងថា ម៉ូតូជិះចូលរថយន្ត រួចសុំគោលការណ៍ដោះលែងអ្នកបើករថយន្ត
08-09-2026 14:46
(កំពត)៖ អធិការនគរបាលស្រុកឈូក ខេត្តកំពត លោកវរសេនីយ៍ឯក ប៉ោ យ៉ា និងអធិការរងនគរបាលទទួលផែនសណ្តាប់ធ្នាប់ លោកវរសេនីយ៍ទោ ឯក វ៉ាន្នី ត្រូវបានដកមកបញ្ឈរជើងនៅការិយាល័យបុគ្គលិក នៃស្នងការដ្ឋាន នគរបាលខេត្ត ដើម្បីបន្តនីតិវិធីដោយសារតែខ្ជីខ្ជារឿងគ្រោះថ្នាក់ចរាចរណ៍។
គ្រោះថ្នាក់ចរាចរណ៍នេះ បង្កដោយរថយន្តបណ្តាលឲ្យបុកម៉ូតូស្លាប់២នាក់ ស្រាប់តែលោកអធិការ និងអធិការរង មិនយកចិត្តទុកដាក់លើការវាស់វែង និងស្រាវជ្រាវ ហើយអះអាងថា រថយន្តមិនខុស រួចសុំគោលការណ៍ដោះលែងអ្នកបើកបរទៅបាត់។
ក្រោយទទួលបានករណីនេះ ស្នងការនគរបាលខេត្តកំពត លោកឧត្តមសេនីយ៍ទោ ម៉ៅ ច័ន្ទមធុរិទ្ធ នៅរសៀលថ្ងៃទី៧ ខែកញ្ញា ឆ្នាំ២០២៦ បានបញ្ជាឲ្យកម្លាំងជំនាញចរាចរណ៍ថ្នាក់ខេត្ត ដឹកនាំដោយស្នងការរងទទួលផែនចរាចរណ៍ ចុះទៅវាស់វែង និងស្រាវជ្រាវឡើងវិញ ទើបបង្ហាញការពិតថា រថយន្តបើកចូលគន្លងខាងម៉ូតូ២តឹកកន្លះ ដូច្នេះគ្រោះថ្នាក់នេះបង្កដោយរថយន្ត។
ក្រោយរកឃើញការពិត កម្លាំងនគរបាលតាមចាប់អ្នកបើកឡានមកវិញ ដើម្បីបញ្ជូនទៅតុលាការ ចាត់ការបន្តទៀត។
សូមបញ្ជាក់ថា កាលពីវេលាម៉ោង ២២៖១០នាទីយប់ថ្ងៃទី៥ ខែកញ្ញា ឆ្នាំ២០២៦ មានករណីគ្រោះថ្នាក់ចរាចរណ៍ដ៏រន្ធត់មួយបានកើតឡើងនៅលើកំណាត់ផ្លូវជាតិលេខ៣ ចន្លោះគីឡូម៉ែត្រលេខ១០៥-១០៦ ស្ថិតក្នុងភូមិដំណាក់ ទ្រព្យខាងត្បូង ឃុំក្រាំងស្នាយ ស្រុកឈូក ខេត្តកំពត រវាងរថយន្ត និងម៉ូតូ ដែលធ្វើដំណើរក្នុងទិសដៅផ្ទុយគ្នា បណ្តាលឲ្យមនុស្សចំនួន ២នាក់បានបាត់បង់ជីវិត។
យោងតាមរបាយការណ៍បានឲ្យដឹងថា ហេតុការណ៍នេះបានកើតឡើងរវាងរថយន្តម៉ាក TOYOTA PRIUS ពណ៌ស ពាក់ផ្លាកលេខ ភ្នំពេញ 2BO-9916 បើកបរដោយឈ្មោះ កែម ឡៃ ភេទប្រុស អាយុ៣៤ឆ្នាំ មានទីលំនៅភូមិល្វេ ឃុំក្រាំងស្នាយ ស្រុកឈូក ខេត្តកំពត ដែលធ្វើដំណើរពីទិសខាងកើតទៅលិច។
ចំណែកភាគីម៉ូតូវិញ ម៉ូតូម៉ាក YAMAHA PG1 ពណ៌ប៉ារ៉ា ពាក់ផ្លាកលេខ ភ្នំពេញ 1MC-0969 បើកបរដោយឈ្មោះ អុឹម សុខហេង ភេទប្រុស អាយុ៣៤ឆ្នាំ មានទីលំនៅភូមិឃុំកើតហេតុ បានធ្វើដំណើរពីទិសខាងលិចទៅកើត។
ឈ្មោះ អ៊ឹម សុខហេង បានស្លាប់បាត់បង់ជីវិតភ្លាមៗនៅកន្លែងកើតហេតុ ដោយឡែកអ្នករួមដំណើរម្នាក់ទៀតឈ្មោះ នឹម ពិសិត ភេទប្រុស អាយុ១៩ឆ្នាំ មានទីលំនៅភូមិក្រសាំង ឃុំឈូក ស្រុកឈូក បានស្លាប់ពេលបញ្ជូនទៅកាន់មន្ទីរពេទ្យ៕
